Aesea 24 - Bislama Bible Revised 2012

Hae God bambae i panisim wol ya

1Nao Profet Aesea i talem long ol man blong hem se, “Olgeta. Hae God bambae i spolem wol ya, we bambae i no moa gat wan samting nating i stap long hem. Hem bambae i tantanem graon i go olbaot, mo bambae hem i ronem ol man long wol ya, oli go wanwan.

2Olgeta man long wol ya bambae oli kasem panis ya sem mak nomo. Ol pris* bambae oli kasem sem mak, olsem we ol man blong olgeta bambae oli kasem. Mo ol masta bambae oli kasem sem mak, olsem we ol slef* blong olgeta bambae oli kasem. Mo ol misis bambae oli kasem sem mak, olsem we ol woman slef blong olgeta bambae oli kasem. Mo ol man blong mekem stoa bambae oli kasem sem mak, olsem we ol man we oli kam blong pem ol samting bambae oli kasem. Mo ol man we oli stap letem kaon long ol man bambae oli kasem sem mak, olsem we ol man ya we oli stap kaon long olgeta bambae oli kasem. Mo ol rijman bambae oli kasem sem mak, olsem we ol puaman bambae oli kasem.

3Olbaot long evri ples, graon ya bambae i kam nogud we i nogud olgeta, olsem we ol man oli tektekemaot olgeta samting blong hem. Hemia tok blong Hae God, mo bambae i mas kamtru olsem.

4“Mi luk we olbaot long wol, graon i kam drae olgeta, ol samting oli no moa save gru, mo wol i no moa strong, i kam slak we i slak. Skae mo graon, tufala i stap harem nogud, gogo tufala i kam nogud olgeta.

5Ol man long wol ya oli mekem wol i kam doti long fes blong Hae God, from we oli stap brekem ol loa blong hem, mo oli stap brekem strong promes* ya we hem i mekem wetem olgeta, we fastaem hem i talem se promes ya i no save foldaon samtaem.

6Nao from samting ya, hem i singaot* trabol i kam long wol ya. Ol man blong wol ya oli mas pemaot kaon blong olgeta from ol fasin nogud ya we oli stap mekem, mo namba blong olgeta we oli stap long wol ya, oltaem i stap kam smol moa bakegen.

7Ol rop ya grep* oli stap kam drae, mo waen, i no moa gat. Ol man we fastaem oli stap harem gud, naoia oli stap harem nogud,

8mo ol man we fastaem oli stap kilim gita mo tamborin, mo oli stap singsing, naoia oli finis, oli no moa mekem.

9Mi luk we i no moa gat man we i dring waen, mo i glad, i stap singsing from. Naoia i no moa gat man we i stap glad long tes blong waen.

10Long taon, olgeta samting oli olbaot nomo. Ol man oli go haed insaed long haos, mo oli lokem doa blong oli save stap gud.

11Olbaot long taon, ol man oli stap singsingaot long rod, mo oli stap askem waen, from we i no moa gat. Hapi taem ya we fastaem oli gat, naoia, i finis. Hae God i tekemaot, nao long ples ya, olgeta oli no moa save hapi bakegen.

12Long taon, ol haos oli brobrok olbaot, mo ol doa* blong bigfala stonwol blong hem, ol man oli smasemgud.

13Mo sem fasin ya bambae i kasem olgeta kantri olbaot long wol. Wol ya bambae i kam olsem plantesen blong olif* we long taem blong tekemaot frut blong hem, ol man oli go kilkilimdaon ol frut blong hem finis, nao olbaot long ol tri, i no moa gat frut i stap. Bambae i kam olsem plantesen blong grep we oli tekemaot olgeta frut blong hem finis, ol rabiswan nomo i stap blong ol puaman oli kakae.

14“Biaen long taem ya, olgeta we oli laef i stap, bambae oli glad, oli singsing. Olgeta long saed i go long wes bambae oli stap talemaot we Hae God i King, mo i hae we i hae.

15Mo olgeta long saed i go long is bambae oli stap leftemap nem blong hem i go antap. Mo olgeta we oli stap daon long solwota bambae oli stap presem Hae God we i God blong yumi.

16Aot long ol kantri we oli stap longwe, long narasaed wol olgeta, bambae yumi harem ol man oli sing blong presem hem, from we hem i stret gud olgeta.

“!Be mi luk se mi mi no moa gat rod! !Bodi blong mi i stap kam bunbun moa! Ol fren blong mi oli stap giaman, oli stap letem mi mi go long han blong ol enemi blong mi, mo oltaem, fasin blong olgeta we oli stap giaman, i stap kam nogud moa.

17!Olgeta man long wol ya! !Yufala i lesin long mi! Long rod blong yufala, i gat ol trap mo ol snea oli stap, wetem plante samting blong mekem yufala i fraet.

18Man we i wantem ronwe long ol samting ya blong fraet, bambae i foldaon long trap. Mo man we i wantem ronwe long trap, bambae i fas long snea. Mo bambae i ren we i ren, mo stamba blong graon daon olgeta bambae i seksek we i seksek.

19Graon bambae i seksek gogo i brobrok, mo bambae i open we i open bigwan.

20Nao wol ya bambae i stap lelei olbaot, olsem man we i drong, we i no save wokbaot, i stap foldaon. Wol ya bambae i stap muvmuv olbaot, olsem haos we hariken i stap kilim. Ol sin blong ol man long wol ya oli stap pulumdaon wol ya. Mo bambae hem i foldaon we i foldaon olgeta, we bambae i no moa save girap bakegen samtaem.

21“Long taem ya, Hae God bambae i panisim ol soldia blong Setan* antap long skae we oli gat paoa long wol ya, wetem ol king mo ol haeman we oli stap rul long wol ya.

22Bambae hem i pulum olgeta ya oli kam wanples, olsem we ol man oli kalabus long hol we i godaon we i godaon. Bambae hem i holem olgeta oli stap kalabus, gogo kasem taem we bambae hem i panisim olgeta.

23Long taem ya, mun bambae i haedem fes blong hem, mo san tu bambae i sem, i no moa saen, from we Hae God i gat olgeta paoa, mo hem bambae i kam King. Bambae hem i rul long taon ya Jerusalem,* antap long tabu hil y a Saeon,* mo ol lida blong yumi bambae oli luk paoa blong hem, mo bigfala laet blong hem we i saen we i saen.”