Jeremaea 28 - Bislama Bible Revised 2012

Profet Jeremaea mo Profet Hanania

1 2 King 24.18-20; 2 Kron 36.11-13 Nao long namba faef manis* blong namba fo yia we King Jedekia i king, Profet Hanania, we papa blong hem Asuru, we i man Gibeon, hem i kam toktok long Profet Jeremaea long haos* blong Hae God. Hem i stanap long fes blong ol pris* wetem olgeta man, nao i talem se,

2“Olgeta. Hae God ya we i gat olgeta paoa, hem i God blong yumi, mo hem i talem se, ‘Mi mi brekem paoa blong king blong Babilonia finis.

3Bambae i no kasem tu yia yet, be ol gudgudfala samting ya blong haos blong mi we King Nebukadnesa i bin tekem olgeta i go long Babilonia, mi bambae mi tekem olgeta i kambak long ples ya bakegen.

4Mo bambae mi letem King Jehoeakin, king blong Juda* we papa blong hem King Jehoeakim, i kambak long Juda bakegen wetem ol man Juda ya we oli go wok slef* long Babilonia. Yes, mi bambae mi brekem paoa blong king ya blong Babilonia. Mi mi Hae God, mo hemia tok blong mi.’ ”

5Nao Profet Jeremaea i stanap long fes blong ol pris wetem ol man ya we oli stap stanap long haos blong Hae God, i talem se,

6“Profet Hanania. !Tok ya i gud tumas ya! Sipos Hae God i mekem tok ya blong yu i kamtru olsem, nao bambae i tekembak ol gudgudfala samting blong haos ya we oli stap long Babilonia, wetem ol man ples tu we oli stap wok slef long ples ya, hemia bambae i gud tumas.

7Be naoia, yu lesin gud long ol tok we mi bambae mi talem long yu wetem olgeta man ya.

8Bifo, taem yumitufala i no stap yet, be ol profet oli stap talemaot we bambae i mas gat faet, mo hadtaem blong kasem kakae, mo ol bigfala sik we i nogud we i nogud, oli kam kasem ol man, mo ol samting ya bambae i kasem ol bigbigfala ples we oli gat king blong olgeta, wetem plante narafala kantri tu.

9Be profet we i stap talemaot se bambae i gat pis, sipos ol samting we hem i talem oli kamtru, bambae man i save bilif se profet ya i profet tru, we Hae God i sanem hem.”

10Nao Profet Hanania i tekemaot yok* ya we i stap long nek blong Profet Jeremaea, i brebrekem,

11mo i talemaot long fes blong ol man ya se, “Olgeta. Hae God i talem se long fasin ya nao, bambae hem i brekem yok ya we King Nebukadnesa i stap fosem ol kantri blong oli karem. Mo bambae i no kasem tu yia yet, be samting ya bambae i kamtru.” Nao taem Profet Hanania i talemaot tok ya finis, Profet Jeremaea i girap, i go.

12Nao biaen, Hae God i sanem Profet Jeremaea

13-14blong i go luk Profet Hanania, i talem long hem se, “Profet. Hae God ya we i gat olgeta paoa, hem i God blong yumi, mo hem i talem se, ‘Yu yu naf nomo blong brekem yok ya we man i wokem long wud. Be jenis blong hem we bambae yu kasem, mi bambae mi wokem long aean, nao mi putum long nek blong ol man blong ol kantri ya blong oli wok blong King Nebukadnesa blong Babilonia. Mo bambae mi mekem ol wael anamol tu oli stap mekem wok blong hem.’ ”

15Nao Profet Jeremaea i talem long Profet Hanania se, “!Profet! !Yu lesin! !Yu, Hae God i no sanem yu nating! Yu nomo yu stap mekem ol man oli bilif long giaman toktok ya blong yu.

16Mo from samting ya, Hae God i talem se hem bambae i kilim yu yu ded. Long yia ya nomo, bambae yu yu ded, from we yu stap pusum ol man ya, blong oli girap, oli agens long Hae God.”

17Nao long namba seven manis* long sem yia ya nomo, Profet Hanania i ded.