Prija 1 - Bislama Bible Revised 2012

Laef ya blong yumi i blong nating nomo

1Tok blong buk ya i tok blong wan man we i waes gud long ol fasin blong wol ya. Man ya i pikinini blong King Deved. Hem i king, mo hedkwota blong hem i stap long Jerusalem*.

2Tok blong man ya i olsem. Hem i talem se, “!Laef blong yumi long wol ya, hem i blong nating nomo! !Tru, mi talem long yufala, olgeta samting blong hem i blong nating nomo!

3?Long laef ya blong yumi, oltaem yumi stap hadwok we yumi hadwok tumas, be yumi stap kasem wanem long ol hadwok ya blong yumi? !I no gat!

4Ol man oli bon long wol ya, oli stap smoltaem nomo, nao oli ded. Biaen, ol narafala man oli bon, oli stap smoltaem, nao biaen olgeta ya tu oli ded bakegen, be wol ya, hem i stap sem mak nomo, i no jenis nating.

5Evri dei, san i girap, mo i kam antap, mo i godaon bakegen, nao i goraon gogo, i girap long sem ples bakegen long nekis dei.

6Win i blu i go long saot, mo i blu i go long not, nao i stap goraon olsem, gogo i folem rod blong hem i kambak bakegen.

7Oltaem ol reva oli stap ron i godaon long solwota, be solwota i stap sem mak nomo, i no kam fulap we i bitim mak. Oltaem nomo, wota i stap gobak long ples we i kamaot long hem fastaem, nao i folem rod blong hem, i stap ron i godaon bakegen.

8Evri samting i stap mekem yumi taed tumas we i no blong talem. Yumi stap luk ol samting long ae blong yumi gogo, be neva yumi talem se i naf ya. Yumi stap harem ol samting long sora blong yumi gogo, be neva yumi talem se i naf ya.

9Wanem samting we i kamtru bifo, be bambae i stap kamtru bakegen. Wanem samting we oli wokem bifo, be bambae oli stap wokem bakegen. Long wol ya, i no gat wan niufala samting nating we i save kamtru.

10Oltaem ol man oli stap talem se, ‘!Yufala i luk! !I gat wan niufala samting ya!’ !Be giaman ya! Samting ya i stap bifo finis, yumi ya yumi bon biaen.

11Ol man naoia oli no save tingbaot ol samting we ol man blong bifo oli mekem, mo ol man long fiuja bambae oli no save tingbaot ol samting we yumi stap mekem, i stat naoia gogo kasem taem blong olgeta.

Ol samting we i kamtru long laef blong man ya

12“Mi mi wan man we mi waes gud long ol samting blong wol ya, mo mi king blong ol laen* blong Isrel*, we hedkwota blong mi i stap long Jerusalem.

13Mi mekem tingting blong mi i strong se bambae mi stap luklukgud long ol fasin we ol man oli stap mekem long wol ya, blong mi save makemgud olgeta.

“Laef ya we God i givim long yumi, we yumi stap long hem i stat taem yumi bon, hem i strong we i strong.

14Mi mi bin gotru long olgeta fasin ya finis we ol man oli stap mekem long wol ya, be mi save talem se ol samting ya i blong nating nomo. I olsem we yumi stap resis olbaot nomo.

15Ol samting we i kruked, yumi no save stretem, mo ol samting we i no stap, oli plante tumas, yumi no save kaontem.

16 1 King 4.29-31 “Nao mi stap tingting mi wan se, ‘O yes, mi mi kam wan haeman finis, mo mi waes moa, mi winim olgeta king we oli bin rul long ples ya fastaem long mi. Mo mi savegud ol fasin blong waes mo ol fasin blong save.’

17Nao mi mekem tingting blong mi i strong blong faenemaot wanem i defren long fasin we i gat save mo fasin we i krangke, mo wanem i defren long tok blong man we i waes mo tok blong man we i no gat hed. Be mi luk se i olsem we mi stap resis olbaot nomo.

18Taem we man i stap kam waes moa, samting ya i stap mekem hem i wari moa, mo taem we hem i stap kasem moa save, save ya i stap mekem hem i harem nogud moa.