Maeka 4 - Bislama Bible Revised 2012

Hae God bambae i mekem wol ya i gat pis(Aesea 2.1-4)

1Nao Profet Maeka i talem se,

“Olgeta.

I gat taem i stap kam

we hil* ya we haos* blong Hae God

i stap long hem

bambae i kam hae moa,

i winim ol narafala hil.

Mo ol man blong plante ples long wol

bambae oli save wokbaot blong kam long hem.

2Olgeta ya bambae oli kam,

oli talem se,

‘Hae God i God blong Jekob.*

Yufala i kam.

Yumi go antap long hil ya blong hem.

Yumi go mekem wosip long haos blong hem.

Hem bambae i tijim yumi long ol fasin

we hem i wantem blong yumi folem,

nao bambae yumi save folem

ol rod we hem i jusumaot,

from we oltaem,

tok blong hem i stap kamaot long taon ya Jerusalem,*

mo oltaem, long hil ya Saeon,*

hem i stap tijim ol man blong hem long ol loa blong hem.’

3 Aes 2.4; Joel 3.10 “Hem bambae i jajem ol trabol

blong ol man blong plante ples,

mo bambae i stretem ol rao

blong ol kantri we oli gat paoa,

nating we oli stap klosap no longwe.

Long taem ya,

ol man bambae oli hamarem

ol naef blong faet blong olgeta,

gogo oli kam aean blong digim graon.

Mo ol spia blong olgeta,

bambae oli wokem olgeta

oli kam huknaef blong katem

gru blong ol grep* blong olgeta.

Nao olbaot long wol,

ol man bambae oli no moa save girap

blong go kilim ol narafala man,

neva bambae oli save mekemrere bakegen

blong go mekem faet.

4 Sek 3.10 Olgeta man bambae oli stap gud,

mo oli gat pis olwe.

Bambae oli save stap gud

long ol plantesen blong grep blong olgeta,

mo oli save sidaon aninit

long ol figtri* blong olgeta.

Bambae i no moa gat man

blong mekem olgeta oli fraet.

Hae God i gat olgeta paoa,

mo hemia tok blong hem.”

5“Nating we olgeta man long wol ya oli stap mekem wosip long ol god blong olgeta, mo oli stap obei long olgeta, be yumi ya, Hae God i God blong yumi, mo bambae yumi stap mekem wosip long hem, mo yumi stap obei long hem oltaem nomo, gogo i no save finis.”

Hae God bambae i tekem ol man blong hem oli kamhom bakegen

6-7Nao Profet Maeka i talemaot we Hae God i talem se, “Olgeta. Bambae mi mi panisim yufala. Bambae yufala i aot long ples ya, yufala i go stap long wan narafala kantri longwe, yufala i stap wok slef,* we bambae yufala i stap harem nogud tumas from. Bambae yufala i no gat paoa nating, olsem man we haf bodi blong hem i ded finis. Be i gat taem i stap kam, we bambae mi tekem olgeta we i stap kamaot biaen long smol haf blong yufala we bambae oli stap, oli kam wanples bakegen. Bambae mi givim niufala laef long olgeta. Bambae mi mekem olgeta oli kam plante bakegen, we bambae oli kam wan kantri we i gat paoa. Olgeta ya bambae oli stap long hil ya Saeon,* mo mi bambae mi king blong olgeta olwe, gogo i no save finis.

8“Jerusalem.* Yu yu olsem wajhaos* blong mi, we mi mi stap long yu blong lukaot gud long ol sipsip blong mi. Bambae king blong yu i kambak, i stap long yu bakegen, nao bambae i stap rul long olgeta ples, olsem we i stap mekem fastaem.

9“Ol man Jerusalem. ?Yufala i stap krae tumas olsem from wanem? ?Yufala i stap harem nogud tumas olsem woman we i bonem pikinini, be from wanem? ?Yufala i harem nogud from we yufala i no moa gat king blong yufala, mo ol haeman blong yufala oli ded evriwan finis?

10Olgeta. I stret nomo blong yufala i harem nogud, yufala i stap tantanem yufala, mo yufala i stap singaot bigwan olsem woman we i bonem pikinini. Bambae i no longtaem, ol enemi oli fosem yufala blong yufala i aot long taon ya blong yufala, nao yufala i go stap long open ples nomo. Bambae oli tekem yufala i go long Babilonia, be biaen, mi bambae mi sevem olgeta we oli kamaot biaen long yufala, mi tekemaot olgeta long han blong ol enemi ya blong yufala, oli kambak.”

Ol enemi oli kam raonem Jerusalem

11Mo bakegen, Profet Maeka i talemaot we Hae God i talem se, “Olgeta. Naoia, ol man blong plante kantri oli kam hivap finis blong mekem faet agens long yufala. Oli stap taltalem se, ‘!Yumi mas spolem taon ya Jerusalem*! !Yumi mas mekem taon ya i kam nogud olgeta!’

12Olgeta ya oli stap tok olsem, be oli no save nating tingting blong mi. Oli no save we mi mi tekem olgeta i kam wanples long ples ya, blong mi panisim olgeta, mi flatemgud olgeta, olsem we man i tekem ol hed blong wit* i kam wanples blong buluk i stap purumpurumbut long hem blong tekemaot ol kakae blong hem.

13!Yufala i girap! !Yufala i go givim panis long olgeta! Mi bambae mi mekem yufala i gat paoa. Bambae yufala i strong olsem bul we hon blong hem, aean, mo leg blong hem daon, bras. Bambae yufala i flatemgud ol man blong plante kantri. Nao ol samting we olgeta ya oli bin winim long taem blong faet, bambae yufala i save givim i kam long mi, we mi mi Hae God, mi Masta* blong olgeta man long wol.”