1 Dut 11.13-17 Nao Moses i talem se, “Olgeta. Hae God i God blong yumi, mo sipos yufala i obei long hem, mo tingting blong yufala i strong blong holem olgeta tok ya blong hem we mi mi stap givim long yufala tede, hem bambae i mekem yufala i kam strong moa, i winim ol man blong ol narafala kantri long wol ya.
2Sipos yufala i obei long hem, ol gudgudfala samting we hem bambae i mekem long yufala i olsem.
3“Hem bambae i blesem ol ples blong yufala, mo ol garen* blong yufala.
4“Hem bambae i mekem we yufala i gat plante pikinini blong yufala, mo we ol garen blong yufala oli gat fulap kakae, mo we ol anamol blong yufala oli gat plante pikinini blong olgeta.
5“Hem bambae i blesem ol garen wit* blong yufala, mo i blesem ol kakae we bambae yufala i mekem long ol wit ya.
6“Hem bambae i blesem yufala long olgeta samting we bambae yufala i stap mekem.
7“Sipos ol enemi blong yufala oli kam blong mekem faet long yufala, hem bambae i winim olgeta. Taem ol enemi ya oli kam blong mekem faet, bambae olgeta oli wokbaot wanples nomo blong kam, be taem yufala i go faet long olgeta, bambae oli resis, oli sut wanwan.
8“Hem bambae i blesem ol wok blong yufala, nao ol kakae blong ol garen blong yufala bambae i plante we plante, i fulap long ol haos blong yufala. Long taem ya we bambae yufala i stap long kantri ya we bambae hem i givim long yufala, oltaem bambae hem i stap blesem yufala.
9“Sipos yufala i obei long hem, mo yufala i stap mekem olgeta samting we hem i talem long yufala, hem bambae i mekem yufala i tabu, yufala i man blong hem, olsem we hem i promes.*
10Nao olgeta man long wol bambae oli luksave we hem i jusumaot yufala finis blong yufala i kam man blong hem, mo bambae oli fraet long yufala.
11Taem yufala i go stap long kantri we hem i promes long ol bubu blong yumi bifo, se bambae i givim long yumi, hem bambae i mekem we yufala i gat plante pikinini blong yufala, mo plante anamol blong yufala, mo plante kakae long ol garen blong yufala.
12Skae i olsem wan haos we hem i putumgud plante gudgudfala samting i stap long hem, mo long stret taem blong hem, hem bambae i openem haos ya, i mekem ren i foldaon, blong mekem ol garen blong yufala i gat kakae. Nao bambae yufala i gat plante kakae blong givim i go long ol man blong narafala kantri we oli trabol. Be bambae yufala i no save trabol samtaem blong go long narafala kantri blong tekem ol samting i kam long ples blong yufala.
13“Hae God i God blong yumi, mo hem bambae i mekem kantri blong yufala i kam hed blong ol narafala kantri raonabaot long yufala, we yufala bambae i no dipen long olgeta, olgeta bambae oli dipen long yufala. Sipos yufala i obei long olgeta loa ya we mi mi stap givim long yufala tede, mo tingting blong yufala i stap strong long olgeta, hem bambae i mekem we neva kantri blong yufala i foldaon, oltaem bambae i stap kam strong moa.
14Be bambae yufala i no mas mekem wosip long ol narafala god, mo yufala i no mas mekem ol samting we olgeta oli wantem. Oltaem yufala i mas obei long olgeta loa ya we mi mi givim long yufala tede.”
Hae God bambae i givim panis long man we i no obei long hem(Levitikas 26.14-46)15Bakegen, Moses i talem se, “Be sipos yufala i no obei long Hae God, mo tingting blong yufala i no strong blong holem olgeta tok blong hem wetem olgeta loa blong hem we mi mi givim long yufala tede, hem bambae i mekem we ol trabol i kam kasem yufala. Ol trabol ya bambae i olsem.
16“Hem bambae i mekem we trabol i kam kasem ol ples blong yufala mo ol garen* blong yufala.
17“Hem bambae i mekem we trabol i kam kasem ol garen wit* blong yufala, mo i kasem ol kakae we yufala i mekem long wit ya.
18“Hem bambae i mekem we bambae yufala i no moa gat plante pikinini blong yufala, mo ol garen blong yufala bambae oli no moa gat plante kakae, mo ol anamol blong yufala bambae oli no moa gat plante pikinini blong olgeta.
19“Hem bambae i mekem we trabol i kam kasem olgeta samting we bambae yufala i stap mekem.
20“Sipos yufala i tanem baksaed long hem, nao yufala i stap mekem ol rabis fasin, bambae hem i mekem we long evri samting we yufala i wokem, be wok blong yufala bambae i brokdaon, no i paspas, no i gat bigfala trabol long hem, gogo kasem we hem i spolemgud yufala, we long smoltaem nomo, bambae yufala i finis olgeta.
21Hem bambae i mekem we oltaem yufala i stap kasem sik, gogo kasem we ol sik ya oli finisim yufala, nao bambae yufala i stap ded from, gogo i no moa gat wan man i stap long kantri ya we yufala i stap go from.
22Hae God bambae i mekem we yufala i kasem ol sik ya olsem tibi, we bambae oli goraon i kasem yufala evriwan, mo yufala i gat ol boela, mo yufala i fiva. Bambae hem i mekem we ples blong yufala i drae, mo i mekem we win ya we i hot we i hot bambae i spolem ol garen blong yufala. Ol trabol olsem bambae i stap long yufala, gogo kasem we yufala evriwan i ded.
23Bambae i no moa gat ren i foldaon long ples blong yufala, nao graon long ples blong yufala bambae i kam strong olsem ston.
24Mo Hae God bambae i mekem we win i blu strong, nao smok blong graon bambae i flae olbaot, mo sanbij bambae i folfoldaon olsem ren blong spolem yufala, gogo kasem we yufala i ded evriwan.
25Hae God bambae i mekem we oltaem ol enemi blong yufala oli stap winim yufala. Sipos yufala i go blong mekem faet long olgeta, bambae yufala i wokbaot wanples nomo blong go, be taem olgeta i kam faet long yufala, bambae yufala i resis, yufala i sut wanwan. Mo taem ol man olbaot long wol oli luk samting ya we i kasem yufala, bambae oli fraet we i fraet.
26Sipos yufala i ded, ol pijin mo ol wael anamol bambae oli kam kakae ol dedbodi blong yufala, mo bambae i no moa gat man blong ronemaot olgeta.
27Hae God bambae i mekem we ol boela i kam kasem yufala, olsem we i bin mekem bifo long ol man Ijip. Bambae hem i mekem we bodi blong yufala i fulap long ol soa, we wota blong hem bambae i stap ron olwe nomo, nao bambae bodi blong yufala i stap skras olbaot, be bambae i no gat meresin blong mekem yufala i kam gud bakegen.
28Hem bambae i mekem we tingting blong yufala i lus, yufala i krangke, mo bambae i mekem we yufala i kam blaen, mo yufala i lusum hed.
29Long medel dei, bambae yufala i pusum han i go olbaot olsem blaenman, mo bambae yufala i no save faenem rod we yufala i wantem go long hem. Long olgeta samting we yufala i stap mekem, bambae yufala i no save win nating. Oltaem nomo, bambae ol enemi blong yufala oli stap mekem i strong tumas long yufala, bambae oli stap ravem yufala, mo bambae i no gat man i save givhan long yufala.
30“Bambae yufala i stap blokem ol gel se bambae oli kam mared long ol pikinini blong yufala, be ol narafala man bambae oli kam tekem olgeta. Bambae ol pikinini ya blong yufala oli wokem ol haos blong olgeta, be bambae oli no save slip long olgeta. Bambae oli planem ol plantesen blong grep,* be bambae oli no save kakae frut blong olgeta.
31Bambae ol narafala man oli kam kilim ol buluk blong yufala we yufala i stap lukluk olgeta nomo, be bambae oli no save givim wan pis mit nating long yufala. Bambae oli kam tekemaot ol dongki blong yufala i go we yufala i stap lukluk olgeta nomo, mo neva bambae oli givimbak. Bambae ol enemi blong yufala oli kam tekemaot ol sipsip blong yufala, mo bambae i no gat man blong givhan long yufala.
32Bambae oli kam tekemaot ol boe mo ol gel blong yufala, blong oli go wok slef* long ol narafala kantri, we yufala i stap lukluk olgeta nomo. Bambae yufala i wantem tumas blong ol pikinini ya blong yufala oli kambak, nao evri dei nomo, bambae yufala i stap lukluk gogo ae blong yufala i soa, be nogat.
33Bambae yufala i hadwok tumas blong planem ol garen blong yufala, be ol man blong ol narafala kantri bambae oli kam tekemaot ol kakae blong hem. Mo oltaem nomo, bambae oli stap mekem yufala i harem nogud tumas, mo oli stap mekem i strong tumas long yufala.
34Ol rabis samting ya we yufala i luk, bambae i mekem tingting blong yufala i lus, yufala i krangke.
35Hae God bambae i mekem we leg blong yufala i fulap long ol rabis boela we oli no save finis, mo ol boela ya bambae oli kavremap yufala, i stat long leg blong yufala daon, i go kasem hed blong yufala antap.
36“Long fiuja, Hae God bambae i tekemaot yufala wetem king blong yufala we bambae yufala i putumap, yufala i go long narafala kantri longwe, we yufala wetem ol bubu blong yufala bifo, neva yufala i stap long hem samtaem. Nao taem we yufala i go stap long ples ya, bambae yufala i stap mekem wosip long ol narafala god ya we ol man oli wokem long wud mo long ston.
37Nao long olgeta ples we Hae God bambae i ronemaot yufala i go long hem, ol man bambae oli sapraes tumas long nius blong ol samting ya we i kasem yufala. Bambae oli luk yufala olsem we yufala i nogud olgeta, nao bambae oli mekem plei long yufala, mo oli laf nogud long yufala.
38“Long kantri ya we Hae God bambae i givim long yufala, bambae yufala i mekem ol bigbigfala garen, be bambae yufala i no save tekem plante kakae long hem, from we ol lokis* bambae oli kakae ol garen blong yufala evriwan.
39Bambae yufala i planem ol plantesen blong grep, mo yufala i stap lukaot gud long olgeta, be bambae ol rop ya oli no save karem kakae, mo bambae yufala i no save dring waen blong olgeta, from we ol waetanis bambae oli kakae ol rop blong olgeta.
40Olbaot long kantri blong yufala, bambae olif i fulap gud long evri ples, be bambae yufala i no gat oel blong kuk, from we taem ol frut blong olgeta oli smosmol yet, bambae oli folfoldaon.
41Bambae yufala i gat plante pikinini boe mo gel blong yufala, be bambae yufala i lusum olgeta, from we ol man bambae oli kam mekem faet long yufala, nao oli tekemaot olgeta oli go wok slef blong olgeta.
42Olgeta tri blong yufala wetem olgeta garen blong yufala, ol lokis bambae oli spolem evriwan.
43“Ol strenja we oli stap long kantri blong yufala, oltaem bambae oli stap kam strong moa, be yufala, bambae paoa blong yufala i stap godaon, gogo yufala i lus olgeta.
44Oltaem bambae olgeta oli gat plante mane, be yufala bambae i no gat, mo oltaem bambae yufala i stap go kaon long olgeta, be olgeta bambae oli no save kam kaon long yufala. Bambae yufala i no moa lida blong olgeta, olgeta bambae oli kam lida blong yufala.
45“Hae God i God blong yumi, be sipos yufala i no obei long hem, mo yufala i no holem olgeta loa ya blong hem we hem i givim long yufala, ol bigbigfala trabol ya bambae oli kam kasem yufala, mo bambae oli stap long yufala, gogo kasem we yufala evriwan i ded.
46Ol samting ya bambae i wan saen blong wekemap yufala wetem ol pikinini we bambae oli kamaot biaen long yufala, gogo i no save finis.
47Hae God i stap blesem yufala long plante samting, be sipos yufala i no glad blong mekem ol wok blong hem,
48bambae yufala i mas stap mekem ol wok blong ol enemi blong yufala we hem bambae i sanem olgeta i kam long yufala. Nao bambae yufala i hanggri, mo yufala i tosta, mo yufala i neked. Bambae yufala i sot long evri samting. Hae God bambae i stap mekem i strong tumas long yufala gogo kasem we yufala evriwan i ded.
49Hem bambae i mekem we ol man blong wan narafala kantri oli kam mekem faet long yufala. Olgeta ya, kantri blong olgeta i stap narasaed wol, mo yufala i no save lanwis blong olgeta, be bambae oli sut i kam long yufala wantaem nomo, olsem we pijin ya igel* i stap flae i kamdaon.
50Fasin blong olgeta ya bambae i strong we i strong. Bambae oli no save gat sore long man, nating we i yangfala no i olfala.
51Bambae oli kilim ol anamol blong yufala, oli kakae, mo oli finisim ol garen blong yufala tu, nao bambae yufala i hanggri gogo yufala i ded from. Bambae oli no save livim wan samting nating i stap, olsem wit, no waen, no oel blong kuk, no buluk no sipsip, nao bambae yufala i stap olsem, gogo kasem we yufala evriwan i ded.
52Ol enemi ya blong yufala bambae oli kam mekem faet long yufala long kantri ya we Hae God bambae i givim long yufala. Bambae oli kam raonem olgeta taon blong yufala, nao ol bigbigfala stonwol blong ol taon ya, we oli hae we i hae, mo we yufala i stap trastem olgeta se i strong, bambae oli folfoldaon evriwan.
53“Long taem ya we bambae ol enemi ya blong yufala oli kam raonem yufala, bambae yufala i harem nogud tumas from we yufala i no gat kakae. Bambae yufala i hanggri gogo, yufala i girap, yufala i tekem ol pikinini ya blong yufala we Hae God i givim long yufala, yufala i kakae olgeta bakegen.
54-55Mo nating sipos i gat wan gudfala haeman we oltaem i stap kaen gud long ol man, be long taem ya, bambae hem i harem nogud tumas from hanggri, nao bambae i stap kilim ol pikinini blong hem, i stap kakae olgeta, from we i no moa gat narafala kakae blong hem, blong i kakae. Mo bambae hem i no save givim haf long brata blong hem no long woman blong hem we hem i lavem hem tumas, no long ol narafala pikinini blong hem we oli stap.
56-572 King 6.28,29; Krae 4.10Mo nating sipos i gat wan gudfala woman we i gat hae nem, mo oltaem i stap kaen gud long ol man, mo we i rij tumas, oltaem i save pem man blong mekem ol wok blong hem, be bambae hem i kasem sem samting. Taem ol enemi ya oli kam raonem taon blong hem, bambae hem i harem nogud tumas from hanggri. Nao bambae hem i tekem smol pikinini blong hem we i jes bon, i kilim hem, mo i kakae we i no gat man i luk, mo bambae i kakae basket ya tu we pikinini i bon wetem. Mo bambae hem i no save givim haf long man blong hem we hem i lavem hem tumas, no long ol narafala pikinini blong hem.
58“Hae God i God blong yumi, mo nem blong hem i soemaot we hem i hae we i hae, mo yumi mas ona gud long hem, yumi mas tinghevi long hem. Mo sipos yufala i no ona gud long hem, mo yufala i no obei gud long olgeta tok blong hem we mi mi raetem finis long buk ya blong Loa,
59bambae hem i sanem ol sik ya we i no save finis i kam kasem yufala wetem ol pikinini we bambae oli kamaot biaen long yufala. Bambae hem i sanem ol narafala sik i kam we oli nogud we i nogud, we bambae oli goraon i kasem yufala evriwan, mo bambae i no gat rod blong blokem olgeta.
60Ol rabis sik ya we yufala i luk bifo long Ijip, mo we yufala i fraet tumas long olgeta, bambae hem i mekem we oli kasem yufala bakegen, mo bambae oli no save finis.
61Mo bambae hem i sanem ol naranarafala sik bakegen i kam we bambae oli goraon i kasem yufala wantaem. Ol sik ya, i no gat tok blong hem long buk ya we ol loa blong Hae God i stap long hem. Mo bambae ol sik ya oli spolem yufala evriwan.
62Nating we bambae yufala i kam plante we plante olsem ol sta long skae, be sipos yufala i no obei long Hae God, smol haf nomo blong yufala bambae i stap laef.
63Kam kasem tede, hem i glad tumas long yumi, mo i stap mekem yumi win, yumi kam plante. Be long sem fasin, sipos yufala i no obei long hem, bambae hem i glad nomo blong spolem yufala, mo blong mekem we yufala i kam nogud olgeta. Bambae ol enemi oli kam pulumaot yufala long kantri ya we bambae yufala i go blong stap long hem, olsem we man i pulumaot rabis gras long garen blong hem.
64“Sipos yufala i no ona gud long Hae God, hem bambae i ronemaot yufala i go stap wanwan olbaot long ol narafala kantri, i stat long wan saed wol, i go kasem narasaed blong hem. Nao bambae yufala i stap mekem wosip long ol narafala god, we ol man oli wokem nomo long wud no long ston. Be ol god ya, yumi wetem ol bubu blong yumi bifo, neva yumi mekem wosip long olgeta samtaem.
65Mo long ol narafala ples ya, neva bambae yufala i save faenem pis. Bambae i no gat wan ples nating we yufala i save talem se i ples blong yufala. Hae God bambae i mekem we oltaem yufala i stap wari, mo tingting blong yufala i no moa stap long wan samting, nao tingting blong yufala bambae i foldaon olgeta.
66Oltaem nomo, bambae yufala i stap trabol, we ded i stap klosap nomo long yufala long dei mo long naet. Oltaem nomo, bambae yufala i fraet se bambae yufala i ded.
67Tingting blong yufala bambae i trabol tumas, from we yufala i fraet tumas long ol samting we yufala i stap luk. Taem yufala i wekap long moning, bambae yufala i wantem tumas blong i kam tudak bakegen, mo taem i tudak, bambae yufala i wantem tumas blong i delaet bakegen.
68Nating we Hae God i talem finis se bambae yufala i no save gobak long kantri ya Ijip bakegen, be bambae hem i putum yufala long ol sip, i sanem yufala i gobak long ples ya. Mo taem yufala i stap long ples ya, bambae yufala i save askem long ol enemi blong yufala, blong oli kam pem yufala, blong yufala i go wok slef blong olgeta, be bambae i no gat man we i glad blong tekem yufala.”
Who We AreWhat We EelieveWhat We Do
2025 by iamachristian.org,Inc All rights reserved.
