Eksodas 8 - Bislama Bible Revised 2012

1Nao hem i talem long Moses bakegen se, “Moses. Yu go luk king, yu talem long hem we mi mi talem se, ‘Yu mas letem ol man blong mi oli kam mekem wosip long mi.

2Sipos yu no harem tok blong mi, bambae mi panisim yufala evriwan long ples ya. Bambae mi mekem kantri ya i kam fulap long ol frog.

3Reva ya bambae i kam fulap long olgeta, nao bambae oli kamaot long reva ya, oli go insaed long haos blong yu, nao bambae oli go long bedrum blong yu, mo oli go antap long bed blong yu. Bambae oli kam fulap long ol haos blong ol haeman blong yu, mo long ol haos blong ol narafala man blong yu. Bambae oli go insaed long ol oven bred blong yu, mo long ol sospen blong yu tu.

4Nating we yu wetem ol haeman blong yu mo ol narafala man blong yu, be bambae oli jam i go antap long yufala evriwan.’ ”

5Mo hem i talem se, “Yu talem long Eron blong i leftemap wokingstik blong hem antap long olgeta reva wetem ol raonwota mo ol narafala wota long ples ya, blong mekem ol frog oli kamkamaot long olgeta, oli kam kavremap olgeta ples long kantri ya.”

6Nao Eron i leftemap wokingstik blong hem antap long ol wota ya, nao wantaem nomo ol frog oli stat kamkamaot, oli kam kavremap olgeta ples long kantri ya.

7Be ol kleva blong king oli wokem majik blong olgeta, mo olgeta ya tu oli mekem ol frog oli kamkamaot long reva, oli kavremap olgeta ples.

8Nao king i singaot Moses mo Eron, tufala i kam, mo i talem long tufala se, “Sipos yutufala i go prea long Hae God blong i tekemaot ol frog ya oli gowe, mi bambae mi letem yufala i go mekem sakrefaes long hem.”

9Nao Moses i talem long hem se, “King. Mi mi glad tumas blong prea long Hae God from yufala. I stap long yu nomo. Sipos yu yu talem se wetaem yu wantem blong mi prea from yufala, oraet, long taem ya, bambae mi prea, nao ol frog ya bambae oli finis olbaot long ol ples blong yufala, bambae oli stap long Nael Reva nomo.”

10Mo king i talem se, “Ale, tumora.”

Nao Moses i talem se, “I gud. Bambae mi mekem olsem we yu talem. Mo bambae yu save nao we i no gat narafala god we i olsem Hae God ya we i God blong mifala.

11Ol frog ya bambae oli finis olgeta long yu mo long ol haeman blong yu, mo long ol narafala man blong yu tu, long Nael Reva ya nomo bambae oli no save finis.”

12Nao taem tufala i aot long king, Moses i prea long Hae God, i talem se, “Hae God. Plis yu tekemaot ol frog ya we yu sanem olgeta i kam blong spolem king ya.”

13Nao Hae God i mekem olsem we Moses i askem. Olgeta frog we oli stap long ol haos mo long ol yad, mo long ol garen olbaot long kantri ya oli ded evriwan.

14Nao ol man oli hivimap ol frog ya long ol bigbigfala hif, mo olgeta ples i sting gud long olgeta.

15Be taem king i luk we ol frog ya oli ded evriwan finis, hem i mekemhed bakegen. Hem i no save lesin nating long Moses mo Eron, mo samting ya i stret nomo olsem we Hae God i talem fastaem.

Namba tri panis, mostik i kam fulap long ol ples

16Nao Hae God i talem bakegen long Moses se, “Yu talem long Eron blong i kilim graon long wokingstik blong hem, nao long olgeta ples long kantri ya, asis blong graon bambae i kam mostik.”

17Nao Eron i kilim graon long wokingstik blong hem, mo long olgeta ples, asis blong graon i kam mostik, mo ol mostik ya oli kam kavremap olgeta man long ples ya, wetem ol anamol tu.

18Nao ol kleva blong king oli mekem majik blong olgeta blong traem mekem mostik i kamaot, be oli kanduit.

19 Be bambae yu go fastaem, yu stap wet long hem, nao taem hem i kamtru, bambae yu talemaot long hem we mi mi talem se, ‘Yu mas letem ol man blong mi oli aot long ples ya blong kam mekem wosip long mi.

21Mi mi talem strong long yu, se sipos yu no lesin long tok blong mi, bambae mi mekem we ol flae oli kam kavremap yu wetem ol haeman blong yu, mo ol narafala man blong yu tu. Bambae oli kam fulap long ol haos blong yufala, mo olbaot long evri ples, graon bambae i blak gud long olgeta.

22Be long dei ya, ol man blong mi we oli stap long ol ples ya long Gosen, bambae mi mekem we ol flae ya oli no go long ples blong olgeta. Bambae mi mekem olsem blong mekem yu yu save we mi nao mi stap mekem ol samting ya long kantri ya blong yu.

23Bambae mi mekem i narafala long ol man blong mi, mo i narafala long ol man blong yu, blong mekem saen long yu. Samting ya bambae i kamtru tumora.’ ”

24Nao Hae God i mekem we ol flae oli kam kavremap ol ples insaed long haos blong king, mo long ol haos blong ol haeman blong hem. Ol flae ya oli mekem ol ples long kantri ya i kam nogud we i nogud.

25Nao king i singaot tufala i kam, i talem long tufala se, “Yufala i save go mekem sakrefaes long God blong yufala, be samples long kantri ya nomo, i no longwe.”

26Be Moses i talem long hem se, “No King, be bambae i no stret blong mekem olsem. Sipos ol man blong yu oli harem we mifala i wantem kilim ol anamol long ples ya blong mekem sakrefaes long Hae God ya we i God blong mifala, bambae oli harem nogud tumas from. Mo sipos mifala i mekem ol sakrefaes olsem long ples ya we olgeta ya oli save luk mifala, bambae oli kros tumas long mifala, nao bambae oli stonem mifala gogo mifala i ded.

27Mifala i mas wokbaot tri dei blong go long draeples blong mekem sakrefaes long Hae God ya, stret olsem we hem i talem long mifala.”

28Nao king i talem se, “Oraet. Sipos yufala i no go longwe tumas long draeples, mi save letem yufala i go. Be fastaem yufala i mas prea from mi.”

29Nao Moses i talem se, “King. Taem mi aot long fes blong yu blong gobak, bambae mi prea long Hae God, nao tumora bambae ol flae ya oli finis long yufala. Be i nogud yu giaman long mifala bakegen, nao bambae yu blokem mifala, blong mifala i no go mekem sakrefaes long Hae God.”

30Nao hem i aot long king i go, mo i prea long Hae God,

31mo Hae God i mekem olsem we hem i askem. Wantaem nomo, ol flae ya oli lus olgeta long king, mo long ol haeman blong hem, mo long ol narafala man blong hem, we i no moa gat wan i stap.

32Be long taem ya tu, king i mekemhed bakegen, nao i no letem olgeta oli go.