Josua 7 - Bislama Bible Revised 2012

Sin blong Akan i kamaot

1Fastaem, Hae God i bin putum wan tok long olgeta, se olgeta samting long taon ya Jeriko bambae i blong hem, mo bambae oli mas bonem olgeta blong givim i go long hem. Be i gat wan long olgeta we i stilim sam long ol samting ya, mo from samting ya, Hae God i kros tumas long olgeta. (Man ya, nem blong hem Akan mo papa blong hem Kami, mo bubu blong hem Sabdi. Sabdi i laen* blong Seraha, we papa blong hem Juda* ya bifo.)

2Nao taem olgeta oli stap long Jeriko, Josua i sanem sam man i go long taon ya Eae, blong lukluksave ples ya. Taon ya i stap long hil long wes klosap long taon ya Betel saed i kam, klosap long taon ya Betaven. Nao taem oli go lukluk ples ya finis,

3oli kambak long Josua, oli givim ripot long hem se, “I no nid blong yumi evriwan i go mekem faet long ol man ya. Olgeta ya oli no plante. Sipos yu sanem samwe long tu tri taosen man nomo i go, hemia bambae i naf ya.”

4Nao i gat samwe long tri taosen soldia nomo oli go blong mekem faet long ol man ya. Be taem oli faet, ol man blong taon ya oli winim olgeta, oli ronem olgeta i kambak,

5i stat long doa* blong bigfala stonwol blong taon ya, i kam kasem wan ples long rod we oli digim ston long hem. Mo taem oli stap ronem olgeta i kamdaon long hil long ples ya, oli kilim toti sikis man long olgeta oli ded. Nao olgeta oli fraet we i fraet gud long ol man ya, we tingting blong olgeta i foldaon olgeta.

6Nao taem Josua wetem ol lida blong olgeta oli harem nius ya, oli harem nogud tumas, oli terem* klos blong olgeta, mo oli putum asis blong graon long hed blong olgeta blong soemaot we oli harem nogud tumas. Nao oli go bodaon long fran blong Bokis ya we i Saen blong Promes* blong Hae God, we fes blong olgeta i godaon long graon, mo oli stap long ples ya gogo kasem sapa.

7Mo Josua i prea, i talem se, “?Hae God, Masta* blong mifala, yu yu tekem mifala i kamkros long Jodan Reva blong wanem? Ating yu tekem mifala i kam blong putum mifala long han blong ol laen blong Amoro* ya, blong oli kilim mifala. Sipos mifala i stap oltaem nomo long narasaed long Jodan Reva, bambae i moa gud.

8?Masta, bambae mi talem wanem long yu nao? Ol man blong mifala oli lus finis, oli ronwe long ol enemi blong mifala, oli kambak.

9Sipos olgeta man blong kantri ya oli harem nius ya, bambae oli kam raonem mifala, nao bambae oli kilim mifala evriwan i ded. ?Mo sipos oli mekem olsem, bambae yu yu mekem olsem wanem, blong mekem ol man oli ona long hae nem blong yu bakegen?”

10Nao Hae God i talem long hem se, “!Josua, yu girap! ?From wanem yu stap slip long graon olsem?

11!Yufala i mekem sin ya! Promes* ya we mi mekem wetem yufala, we mi talem se yufala i mas holem, yufala i brekem. Ol samting ya we mi mi talem finis se oli tabu, oli blong mi, be yufala i stilim sam long olgeta. Nao yufala i giaman, yufala i go putum ol samting ya i stap wetem olting blong yufala.

12Samting ya nao i mekem we yufala i no save winim ol enemi blong yufala. Yufala i ronwe long olgeta from we yufala i pulum panis ya i kam long yufala, se yufala i mas ded. Sipos yufala i no bonem ol samting ya we yufala i stilim, bambae mi mi no save givhan long yufala bakegen.

13!Yu girap! Yu talem long ol man ya se oli mas mekem olgeta oli klin long fes blong mi. Yu talemaot long olgeta we mi mi talem se, ‘Olgeta. Mi mi Hae God, mi God blong yufala ol laen blong Isrel.* Tumora yufala i mas rere blong pas long fes blong mi, from we i gat samfala samting we yufala i stap holem, we mi mi talem finis, se bambae yufala i mas bonem olgeta blong givim i kam long mi. Sipos yufala i no tekemaot ol samting ya bambae yufala i no save winim ol enemi blong yufala.

14Tumora yufala evriwan i mas pas long fes blong mi. Olgeta twelef laen ya blong yufala oli mas pas wanwan long fes blong mi, blong yufala i save faenemaot man we i mekem samting ya. Laen we nem blong hem i kamaot, bambae olgeta haf blong laen ya oli mas kam pas long mi. Mo haf ya blong laen we nem blong hem i kamaot, olgeta famle blong hem oli mas kam pas long mi. Mo famle we nem blong hem i kamaot, olgeta man blong hem wanwan oli mas kam pas long mi.

15Nao man we nem blong hem i kamaot, we ol samting ya blong mi i stap long hem, man ya wetem ol famle blong hem, yufala i mas bonem olgeta evriwan wetem ol samting ya. Yufala i mas mekem olsem from we hem i brekem promes* ya we mi mi mekem wetem yufala, mo i mekem bigfala sem long yufala evriwan.’ ”

16Nao long nekis dei, long eli moning, Josua i tekem olgeta laen ya oli kam pas wanwan long fes blong Bokis ya we i Saen blong Promes blong Hae God, blong faenemaot man we i mekem samting ya. Mo nem we i kamaot, nem blong Juda ya bifo.

17Mo taem hem i tekem olgeta haf blong laen blong Juda oli kam pas wanwan, nem blong Seraha i kamaot. Mo taem i tekem olgeta famle we oli laen blong Seraha ya oli kam pas wanwan, nem blong Sabdi i kamaot.

18Mo taem i tekem olgeta man long famle blong Sabdi oli kam pas wanwan, nem blong Akan i kamaot. Akan ya, papa blong hem Kami, mo bubu blong hem Sabdi, we i laen blong Seraha, we papa blong hem Juda ya bifo.

19Nao Josua i talem long hem se, “Pikinini blong mi. Hae God i God blong yumi ol laen blong Isrel, mo yu mas tok tru naoia long fes blong hem. ?Wanem samting ya we yu yu mekem? Yu no traem haedem samting ya, yu talemaot long mi naoia.”

20-21Nao Akan i talem se, “Yes i tru. Hae God i God blong yumi, be mi mi mekem i no stret long fes blong hem. Taem yumi go faet long Jeriko, mi mi faenem wan flas klos we oli wokem long Babilonia, mo sam silva we hevi blong hem i kasem tu kilo, mo wan pis gol we hevi blong hem i moa long haf kilo. Mi mi laekem tumas ol samting ya, nao mi karem olgeta. Sipos yufala i wantem luk, mi berem olgeta i stap long haos tapolen blong mi. Mi putum ol silva i stap daon, mo ol narafala samting antap long hem. Hemia nao samting we mi mi mekem.”

22Nao Josua i sanem sam man oli resis i go long haos tapolen blong man ya, mo oli faenem ol samting ya we hem i bin berem i stap, we ol silva i stap daon mo ol narafala samting i stap antap.

23Nao oli tekemaot ol samting ya, oli karem i kam long Josua olgeta, nao oli putum ol samting ya long fes blong Hae God.

24Nao Josua olgeta oli holem man ya wetem olgeta pikinini blong hem, mo ol buluk mo ol dongki mo ol sipsip blong hem, mo haos tapolen blong hem, mo ol narafala samting blong hem, mo oli karem tu ol silva ya wetem klos mo gol we hem i stilim. Nao oli tekem olgeta i go long wan bigfala levelples long medel blong ol hil we nem blong hem Akoro, we i min se “Trabol”.

25Nao Josua i talem long hem se, “From we yu yu mekem trabol i kam long yumi, naoia Hae God bambae i mekem trabol i kam long yu.” Nao olgeta evriwan oli stonem man ya wetem ol famle blong hem, gogo oli ded. Mo oli bonem olgeta, wetem olgeta samting ya blong hem,

26mo oli hivimap ol ston antap long bodi blong hem. Mo ol ston ya oli stap yet kam kasem tede. Mo from samting ya, oli putum nem blong ples ya se Akoro, we i min se “Ples blong trabol blong Akan”, mo nem ya i stap yet kam kasem tede. Mo biaen, Hae God i no moa kros long olgeta bakegen.