Aesea 21 - Bislama Bible Revised 2012

Kantri ya Babilonia bambae i kam nogud olgeta

1Nao Profet Aesea i talem long ol man blong hem se, “Olgeta. Mi mi luk wan vison,* mo long vison ya, mi luk ol samting we i hapen long “Draeples klosap long Solwota” Mi luk we wan bigfala trabol i kamaot long wan narafala kantri we ol man Babilonia ya oli fraet tumas long hem, i kam kasem olgeta, olsem we waelwin i kamaot long draeples, i brumum olgeta samting i go.

2Long vison ya, mi mi luk we ol man oli mekem i strong tumas long olgeta, oli giaman long olgeta, oli trikim olgeta, mo oli spolemgud olgeta.

“Nao mi harem we Hae God i talem se, ‘!Ol soldia blong Elam! !Yufala i go mekem faet long ol man Babilonia! !Ol soldia blong Media! !Yufala i go raonem ol taon blong olgeta, yufala i blokemgud olgeta blong oli no save kam afsaed! Mi bambae mi finisim fasin ya we olgeta oli stap mekem ol narafala man oli harem nogud.’ ”

3Nao profet i talem se, “Ol samting we mi mi luk, mo we mi harem long vison ya, oli mekem mi mi fraet tumas, mo mi stap harem nogud tumas from, olsem we woman i stap harem nogud, long taem ya we hem i stap bonem pikinini.

4Hed blong mi i raon, mo bodi blong mi i stap seksek, from we mi fraet tumas. Oltaem, mi wantem tumas blong naet i kam, be taem tudak i kamtru, i mekem mi mi fraet moa.

5“Long vison ya, mi luk wan bigfala kakae i rere. Olgeta oli putumgud ol mat i rere finis, mo ol man oli kam sidaon, oli stap kakae, mo oli stap dring. Nao wantaem nomo, wan komanda i singaot bigwan se, ‘!Ol kapten! !Yufala i girap! !Yufala i go mekemrere ol sil* blong yufala!’

6“Nao Hae God ya we i Masta* blong yumi, hem i talem long mi se, ‘Aesea. Yu go putum wan wajman, mo yu talem long hem, se hem i mas ripotem olgeta samting we hem i luk.

7Sipos hem i luk ol man oli stap sidaon long hos, oli stap wokbaot i kam tutu, no oli stap sidaon long dongki, no oli stap sidaon long kamel, oli stap wokbaot i kam, bambae hem i mas luklukgud long olgeta.’

8“Nao mi harem we wajman i singaot, i talem se, ‘!Masta! Oltaem mi mi stap waj long ples ya. Long dei mo long naet, mi mi no spel nating.’

9 Mi harem we wan man long Edom i singaot i kam long mi se, ‘Wajman. ?Naet ya klosap i finis, no no yet? ?klosap delaet i kamtru, no no yet?’

12“Nao mi mi talem se, ‘Bambae moning i kamtru i no longtaem, be naet tu bambae i kamtru bakegen. Sipos yu wantem askem long mi bakegen, bambae yu save kambak.’ ”

Tok we i blong ol man Arebia

13Nao Profet Aesea i talem long ol man blong hem se, “Olgeta. Mi mi luk wan vison,* mo long vison ya, mi luk ol samting we i hapen long Arebia. Mi harem we Hae God i givim tok blong hem long mi, mo mi talemaot tok ya long ol man Dedan se, ‘Taem yufala i stap wokbaot blong salem ol kago blong yufala, yufala i stap putumap ol haos tapolen blong yufala olbaot long draeples ya long Arebia.

14Sipos man we i tosta i kam long yufala, bambae yufala i mas givim wota long hem.’ Mo mi talemaot tok blong hem long ol man Tema se, ‘Olgeta. Sipos man we i ronwe long faet, i kam long yufala, bambae yufala i mas givim kakae long hem.

15Ol man ya oli stap ronwe long ol man we oli holem naef blong faet, we oli rere blong stikim olgeta oli ded. Olgeta oli stap resis olbaot, blong ronwe long ol man we oli taetem bonara finis blong sutum olgeta, mo oli stap ronwe long taem blong faet, we oli save ded isi nomo.’

16“Nao Hae God we i Masta* blong yumi, hem i talem long mi se, ‘Aesea. Naoia ol man Kedara oli karem hae nem, be long wan yia stret, hae nem ya blong olgeta bambae i finis olgeta.

17Long taem blong faet, ol man Kedara oli strong moa, from we oli man blong sut long bonara, be fiu nomo long olgeta bambae oli stap laef. Mi mi Hae God, mi God blong yufala, mo hemia tok blong mi.’ ”