Esikel 34 - Bislama Bible Revised 2012

Ol lida blong ol laen blong Isrel oli olsem rabis man blong lukaot long sipsip

1Hae God i Masta* blong yumi, mo hem i toktok long mi bakegen,

2i talem se, “Man blong wol ya. Yu mas tok agens long ol lida ya blong ol laen* blong Isrel.* Yu talemaot long olgeta we mi mi talem se, ‘!Yufala ol lida! !Yufala i mas kasem panis! !Yufala i olsem rabis man blong lukaot long sipsip! !Yufala i no lukaot gud long ol sipsip blong mi nating! !Yufala i stap lukaot long yufala nomo!

3I olsem we yufala i stap dring melek blong ol sipsip ya, mo yufala i stap werem ol klos we yufala i wokem long wul blong olgeta, mo yufala i stap kilim ol beswan blong yufala i kakae. Be neva yufala i stap lukaot gud long olgeta.

4Olgeta we oli no strong, be yufala i no stap lukaot gud long olgeta, mo olgeta we oli sik, yufala i no stap mekem olgeta oli kam gud bakegen. Mo olgeta we oli karekil, yufala i no stap fasem ol soa blong olgeta nating blong mekem olgeta oli kam gud bakegen. Olgeta we oli mestem rod, mo olgeta we oli lus, be neva yufala i go lukaot olgeta blong tekem olgeta oli kambak. Yufala i stap spolem olgeta nomo.

5Nam 27.17; 1 King 22.17; Mat 9.36; Mak 6.34Nao from we ol sipsip ya oli no gat ol man blong lukaot long olgeta, oli stap go wanwan olbaot, mo ol wael anamol oli stap kilim olgeta, oli stap kakae.

6Ol sipsip blong mi oli lus, oli stap wokbaot wanwan olbaot antap long ol bigbigfala hil we oli hae we i hae. Oli ronronwe, oli go olbaot long olgeta ples long wol, mo i no gat man i go lukaot olgeta blong traem faenem olgeta.

7“ ‘Nao from samting ya, yufala i mas lesin long ol tok we mi bambae mi talem long yufala.

8-10Ol wael anamol oli stap ronem ol sipsip blong mi, oli stap kilim olgeta, oli stap kakae, from we i no gat man blong lukaot long olgeta. Be yufala i no traem nating blong go lukaot olgeta. Yufala i no lukaot gud long olgeta nating, yufala i stap tingbaot yufala nomo. Nao from samting ya, yufala i mas lesin long tok blong mi. Mi mi Hae God, mi Masta blong yufala, mo mi laef, mi stap we mi stap. Mo naoia, mi mi talem stret long yufala, se long nem blong mi, mi mi enemi blong yufala. Ol sipsip blong mi, bambae mi tekemaot olgeta long han blong yufala, mo neva bambae mi letem yufala i lukaot long olgeta bakegen. Bambae mi no moa save letem we yufala i stap harem gud long olgeta bakegen. Bambae mi tekemaot olgeta long han blong yufala, mi sevem olgeta, blong yufala i no moa save kilim olgeta bakegen, blong yufala i kam rijman.’ ”

Hae God i olsem gudfala man blong lukaot long sipsip

11-12Hae God i Masta* blong yumi, mo hem i talem se, “Man blong wol ya. Yu talem long ol laen* blong Isrel* se, ‘Oltaem man blong lukaot long sipsip i stap lukaot ol sipsip blong hem, we oli ronwe, oli stap wanwan olbaot, nao i tekem olgeta oli kam wanples bakegen, mo i stap lukaot gud long olgeta. Nao long sem fasin, mi bambae mi go lukaot ol sipsip blong mi gogo mi faenem olgeta, mo bambae mi stap lukaot gud long olgeta. Olgeta oli bin ronwe long taem blong trabol, oli go stap wanwan olbaot long ol narafala ples, be mi bambae mi tekem olgeta oli kambak bakegen.

13Mi bambae mi tekemaot olgeta long ol narafala kantri, nao bambae mi tekem olgeta oli kambak long kantri ya blong olgeta bakegen. Bambae mi lidim olgeta oli kambak long Isrel, nao bambae oli stap gud long ol hil, mo klosap long ol reva, mo long ol ples we oli bin stap long hem bifo, mo bambae mi stap givim gudfala kakae long olgeta blong oli kakae.

14Bambae mi letem olgeta oli stap gud long kantri ya blong olgeta, nao oli save kakae gudfala gras long ol hil, mo long ol levelples long medel blong ol hil, mo long ol narafala ples we i gat gudfala gras long hem.

15Mi nao bambae mi man blong lukaot long ol sipsip ya blong mi, mo bambae mi putum olgeta long ples we oli save slip gud long hem. Mi mi Hae God, mi Masta blong yufala, mo hemia tok blong mi.

16“ ‘Ol sipsip blong mi we oli lus, mi bambae mi go lukaot olgeta, mo olgeta we oli mestem rod, oli stap wokbaot olbaot, mi bambae mi tekem olgeta i kambak. Mo olgeta we oli karekil, bambae mi fasem ol soa blong olgeta blong mekem olgeta oli kam gud bakegen, mo olgeta we oli no strong, bambae mi lukaot gud long olgeta blong mekem olgeta oli kam strong bakegen. Be olgeta we oli fatfat gud mo oli strong, bambae mi spolem olgeta, from we mi mi man blong lukaot long sipsip, we mi stap mekem i stret gud long olgeta.

17“ ‘Mi mi Hae God, mi Masta blong yufala, mo yufala i olsem ol sipsip blong mi, mo mi talem long yufala, se mi bambae mi jajem yufala evriwan. Bambae mi seraot ol gudwan i gowe long ol rabiswan, olsem we man i seraot ol sipsip i gowe long ol nani.

18Sam long yufala, i olsem we oli stap kakae ol gudfala gras, be oli no glad long hem, nao ol gras we oli no kakae, oli stap purumbut long hem i godaon long graon. Olgeta oli dring wota we i klin, mo wota we oli no dring, oli stap purumbut long hem, oli mekem i doti long sofmad.

19Be ol narafala sipsip ya blong mi oli stap kakae ol gras ya we olgeta ya oli purumbut long hem i godaon, mo oli stap dring wota ya we olgeta ya oli mekem i doti long sofmad.

20“ ‘Nao from samting ya, mi mi talem long yufala, se bambae mi lukluk long ol sipsip we oli fatfat gud wetem olgeta we oli bunbun, nao bambae mi panisim olgeta we oli fatfat gud.

21Olgeta ya oli stap pusumaot ol sipsip ya we oli sik, mo oli stap faet long olgeta long hed blong olgeta, oli gowe.

22Be bambae mi sevem ol sipsip ya blong mi, mo bambae oli no moa save kasem trabol bakegen. Bambae mi jajem ol sipsip blong mi evriwan, blong seraot ol gudwan i gowe long ol rabiswan.

23Rev 7.17Bambae mi givim wan king long olgeta olsem King Deved, we i man blong wok blong mi bifo. Hem bambae i olsem man blong lukaot long sipsip, mo bambae i stap lukaot gud long olgeta evriwan.

24Esik 37.24Nao mi bambae mi God blong olgeta, mo king ya bambae i rulum olgeta olsem King Deved ya bifo. Mi mi Hae God, mo hemia tok blong mi.’ ”

Hae God i mekem promes wetem olgeta blong lukaot gud long olgeta oltaem

25Nao Hae God i talem se, “Man blong wol ya. Mi bambae mi mekem wan strong promes* wetem yufala, se bambae mi lukaot gud long yufala oltaem. Bambae mi ronemaot olgeta wael anamol long kantri ya, nao bambae yufala i save stap gud nomo long ol open ples, mo yufala i save slip gud olbaot long bus.

26Mi bambae mi blesem yufala, mo mi letem yufala i mekem ples blong yufala raon long tabu hil* ya blong mi. Mo long ples ya, bambae mi blesem yufala, mi givim ren long yufala long stret taem blong hem.

27Olgeta tri bambae oli karem plante frut, mo ol garen bambae oli karem plante kakae, mo yufala evriwan bambae i save stap gud long graon blong yufala. Taem mi brebrekem ol jen we ol man oli stap fasem yufala long hem blong mekem yufala i wok slef,* mo mi mekem yufala i go fri, bambae yufala i savegud we mi mi Hae God.

28Ol man blong ol narafala kantri bambae oli no moa save stilim olting blong yufala, mo ol wael anamol bambae oli no moa save kilim yufala blong kakae yufala. Bambae yufala i save stap gud, yufala i sef, we bambae i no moa gat man i save mekem yufala i fraet.

29Bambae mi mekem ol garen blong yufala oli gru gud, oli gat plante kakae, mo long kantri ya blong yufala, bambae mi mekem yufala i no moa save hanggri bakegen. Nao bambae ol man blong ol narafala kantri oli no moa save jikim yufala bakegen.

30Mo bambae oli savegud we mi mi Hae God, mi God blong yufala, mo yufala i man blong mi, we mi stap blokemgud yufala.

31“Yufala ol man blong mi, yufala i olsem ol sipsip blong mi, mo mi mi stap givim kakae long yufala. Mi mi Hae God, mi God blong yufala, mo mi Masta* blong yufala, mo hemia tok blong mi.”