1“Hae God. ?From wanem yu no terem skae i open blong kamdaon long ples ya? Ol bigbigfala hil ya, be sipos oli luk we yu yu kamtru olsem, bambae oli fraet we oli seksek from.
2Bambae oli save seksek gud, olsem wota we i stap boel long faea we i hot gud. Plis yu kam, yu soemaot paoa blong yu, blong ol enemi blong yu oli save luk. Plis yu mekem ol man blong ol narafala kantri oli seksek long fes blong yu.
3Bifo, oltaem yu stap kam, yu stap mekem ol samting we mifala i no tingbaot, mo we mifala evriwan i fraet tumas from. Long taem ya, ol bigbigfala hil ya oli luk yu, mo oli fraet we oli seksek tumas from.
41 Kor 2.9I no gat man i luk narafala god samtaem we i olsem yu, we i stap mekem ol bigbigfala wok blong givhan long ol man, we tingting blong olgeta i stap long hem. I no gat man i tokbaot narafala god samtaem we i olsem yu.
5Oltaem, yu yu rere blong givhan long olgeta we oli glad blong folem stret fasin, mo oli no save fogetem ol fasin we yu yu wantem blong oli folem. Bifo, yu yu kros long mifala, be mifala i stap gohed blong mekem sin. Mo nating we yu yu kros bigwan olsem long mifala, be i stat bifo olgeta, oltaem mifala i stap mekem sin agens long yu.
6Mifala evriwan i mekem sin. Olgeta samting we mifala i mekem we mifala i talem se oli gud, be olgeta oli doti we i doti, we i nogud olgeta. Mo from ol sin ya we mifala i mekem, mifala i olsem lif blong tri nomo we i stap kam drae, nao win i karem i go.
7I no gat wan long mifala we i glad blong prea long yu. I no gat wan long mifala we i glad blong luk long yu, blong yu givhan long hem. From ol sin ya blong mifala, yu yu lego mifala, mo yu haedem fes blong yu, blong mifala i no save luk.
8“Be Hae God, yu yu Papa blong mifala. Mifala i olsem graon, mo yu yu man blong wokem graonpot. Yu yu mekem mifala evriwan long han blong yu nomo.
9!Plis yu no kros tumas long mifala! !Plis yu no holem ol sin blong mifala oli stap olwe long fes blong yu! !Mifala i man blong yu! !Plis yu sore long mifala!
10Ol taon ya we oli tabu, oli blong yu nomo, be naoia oli kam olsem draeples finis, we man i no save stap long hem. Taon ya Jerusalem,* hem i brokdaon olgeta, mo i no moa gat man i stap long hem.
11Mo haos* ya blong yu we mifala i stanemap, we i tabu we i tabu, mo i gudfala tumas, we ol olfala blong mifala bifo oli stap kam long hem blong mekem wosip long yu, naoia faea i bonem finis, i mekem i kam nogud olgeta. Olgeta ples ya we mifala i laekem tumas, naoia oli brobrok, oli kam nogud olgeta.
12?Hae God, olsem wanem? Taem yu luk ol samting ya, mifala i save se yu yu harem nogud. ?Be bambae yu yu stap nating nomo? !Sipos yu yu no sore long mifala, bambae panis ya blong mifala i strong tumas, i winim we mifala i save karem!”
Who We AreWhat We EelieveWhat We Do
2025 by iamachristian.org,Inc All rights reserved.
