Job 39 - Bislama Bible Revised 2012

1?Taem ol wael nani blong hil oli bonem pikinini,

yu yu save?

?Mo taem wael dia i bonem pikinini blong hem,

yu yu luk?

2?Yu yu savegud fasin blong olgeta,

se oltaem oli gat bel hamas manis?

?Mo yu yu save makem manis

we bambae oli bonem pikinini blong olgeta long hem?

3?Yu yu save wetaem bambae oli sidaon

blong bonem pikinini blong olgeta?

4Long bus, ol pikinini blong olgeta

oli stap kwaet gogo oli kam strong,

nao oli gowe long mama blong olgeta,

we oli no save kambak.

5“?Hu i mekem ol wael dongki

oli stap long bus?

?Hu i letem olgeta oli stap go olbaot?

6Mi nao mi givim draeples long olgeta

se i hom blong olgeta,

mo mi letem olgeta oli stap gud nomo

long bigfala flat ples ya

we i gat fulap sol long hem.

7Oli no save stap klosap long ol taon

we i gat tumas noes,

mo i no gat man i save mekem

olgeta oli kam kwaet blong oli wok.

8Oli save go olbaot long ol bigbigfala hil

blong lukaot kakae blong olgeta,

mo long ol hil ya,

oli save faenem ol lif blong oli kakae.

9“?Yu ting se wael buluk

i wantem mekem wok blong yu?

Nating we wan naet nomo,

be hem i no save stap

long haos blong anamol blong yu.

10Yu no save putum rop long nek blong hem

blong lidim hem,

mo yu no save mekem hem i pulum plao

blong digim garen* blong yu,

no i pulum narafala aean bakegen,

blong klinim graon blong yu.

11Hem i strong we i strong,

be yu save dipen long hem

blong i mekem ol bigfala wok blong yu.

12?Yu ting

se hem i save tekemaot ol kakae

long garen blong yu,

mo i save klinimaot ol makas blong wit*

blong tekem kakae blong hem i kam?

13“Bigfala pijin ya ostrij*

i stap saksakem wing blong hem

i strong tumas,

be hem i no save flae

olsem narafala pijin ya stok.*

14Ostrij ya, fasin blong hem,

oltaem hem i stap putum eg blong hem

long graon nomo,

nao i livim olgeta i stap,

blong graon i stap mekem olgeta i wom.

15Hem i no save tingbaot

we wael anamol i save purumbut long ol eg ya,

i save brekem olgeta,

no wan narafala samting

i save smasem olgeta.

16Hem i stap mekem

olsem we ol eg ya i no blong hem,

mo i no tingbaot

we maet ol hadwok blong hem

i blong nating nomo.

17Hem i stap mekem olsem

from we mi mi no mekem hem i waes,

mi no mekem we hem i gat hed.

18Be taem hem i girap i resis,

hem i save laf long hos

wetem man we i sidaon long hem.

19“Job.

?Ol hos ya we oli strong tumas,

yu yu mekem olgeta?

?Yu yu putum ol longlongfala hea

long nek blong olgeta?

20?Yu yu mekem olgeta

we oli save jam olsem lokis*?

?Mo yu mekem

we oli save mekem noes long nus blong olgeta

we ol man oli fraet long hem?

21Long taem blong faet,

ol hos ya oli stap stanap rere,

oli stap skraskrasem graon.

Olgeta oli strong tumas,

mo oltaem oli glad

blong resis i go long faet.

22Oli no save fraet nating.

I no gat wan naef blong faet

i save mekem olgeta oli tanemraon.

23Ol samting blong faet

we ol man blong ron long hos oli karem,

oltaem oli stap mekem plante noes,

mo taem san i saen long olgeta,

oli saen we i saen.

24Mo taem ol hos ya oli harem pupu,

oli no save stanap kwaet,

oli stap seksek from we oli glad tumas,

oli wantem spid i go.

25Taem pupu i singaot,

olgeta tu oli mekenoes

long nus blong olgeta.

Taem oli no go klosap long faet yet,

be oli save harem smel blong hem,

mo oli save harem ol komanda

oli stap singaot long ol soldia,

nao oli no save stap kwaet,

oli mas go joen.

26“?Olsem wanem?

?Taem hok* i openem wing blong hem

blong flae i go long saot,

yu yu soemaot ples ya long hem

we bambae i go long hem?

27Ol pijin ya igel* oli no save wet long yu

blong yu go talem long olgeta,

blong oli go mekem nes blong olgeta

antap long ol hil we i hae we i hae.

28Oltaem oli stap mekem ples blong olgeta

antap long ol bigbigfala ston

we oli hae moa winim ol narawan.

Nating we i antap we i antap olgeta,

be oli stap mekem ol ples ya

oli kam sefples blong olgeta.

29Oltaem oli stap long ol hae ples ya,

oli stap lukluk i go long olgeta ples,

blong faenem sam samting

we oli save go kilim blong kakae.

30 Mat 24.28; Luk 17.37 Oltaem olgeta oli stap hivap

raon long ol dedbodi,

mo ol pikinini blong olgeta

oli stap dring blad blong ol dedbodi ya.