Jajes 14 - Bislama Bible Revised 2012

Samson i mared long wan gel Filistia

1Nao wan dei, Samson i godaon long taon ya Timnaha, mo i luk wan gel Filistia long ples ya.

2Nao hem i kambak, i talem long papa mo mama blong hem se, “I gat wan gel Filistia i stap long Timnaha we mi mi laekem hem tumas. Mi wantem blong yutufala i go mekem rod blong hem, blong mi save tekem hem.”

3Be tufala i talem long hem se, “I gat plante gel blong yumi we yu save tekem wan long olgeta. !Ol man Filistia ya oli hiten man ya! ?From wanem yu wantem go lukaot woman long ples blong olgeta blong yu mared long hem?”

Be Samson i talem long papa blong hem se, “Gel ya, mi mi laekem hem tumas. Mi wantem blong yutufala i go mekem rod blong hem, blong mi save tekem hem.”

4Be papa mo mama blong hem, tufala i no save we Hae God i stap lidim hem blong i mekem samting ya. Long taem ya, ol laen* blong Isrel* oli stap long han blong ol man Filistia, mo Hae God i stap mekem rod blong spolem olgeta.

5Nao from bisnes ya, Samson wetem papa mo mama blong hem oli godaon long taon ya Timnaha. Mo taem oli stap wokbaot i go, oli pastru long wan plantesen blong grep,* nao Samson i harem wan yang laeon i stap singaot.

6Nao wantaem nomo, Spirit blong Hae God i kam long hem, i mekem hem i strong, nao hem i go holem laeon ya, i terem long tu haf. Hem i mekem olsem we laeon ya i wan smol nani nomo. Be hem i no kam talemaot samting ya long papa mo mama blong hem.

7Nao taem oli gotru long taon ya, hem i go toktok wetem gel ya, mo i laekem hem tumas.

8-9Nao i no longtaem, Samson wetem papa mo mama blong hem oli godaon bakegen long Timnaha, blong Samson i mared long gel ya. Mo taem oli stap wokbaot i go, hem i go blong luk laeon ya we hem i bin kilim. Mo hem i sapraes tumas blong luk we i gat fulap sugabag i stap insaed long dedbodi blong hem, mo oli putum eg finis. Nao hem i go tekemaot sam eg blong sugabag ya, mo taem hem i stap wokbaot i go, hem i stap kakae. Mo taem hem i kam kasem tufala bakegen long rod, hem i givim sam eg* blong sugabag ya long tufala, be i no talem long tufala we hem i tekemaot long dedbodi blong laeon ya.

10Nao taem oli gotru long Timnaha, papa blong hem i go long haos blong gel ya, nao long haos ya, Samson i mekem wan lafet, from we hemia i kastom blong ol yang boe blong mared long taem ya.

11Mo taem ol man Filistia oli luk Samson, oli sanem toti man blong olgeta, blong oli kam stap wetem hem long lafet ya.

12-13Nao Samson i talem se, “!Olgeta! Bambae mi mi talem wan ridel long yufala, mo bambae yumi bet long hem. Sipos yufala i talemaot mining blong tok ya long mi, ale mi bambae mi givim toti gudgudfala kaliko, mo toti gudgudfala klos long yufala. Be sipos yufala i no talemaot mining blong hem long mi gogo kasem we seven dei blong lafet ya i finis, bambae yufala i givim ol samting ya long mi.”

Nao oli talem long hem se, “Ale, yu talem ridel ya blong yumi harem.”

14Nao hem i talem long olgeta se,

“I gat wan samting

we i save kakae,

be gudfala kakae

i kamaot long hem.

Samting ya i strong we i strong,

be kakae we i kamaot long hem,

i swit we i swit.”

Nao tri dei i pas, be oli no save talemaot mining blong ridel ya long hem.

15Nao long namba fo dei blong hem, oli kam talem long woman blong hem se, “E, yu go trikim man ya, blong i talemaot mining blong ridel ya long mifala. Sipos no, bambae mifala i bonem haos ya blong papa blong yu. Mo bambae mifala i bonem yu tu, wetem ol famle blong yu. !Ating yutufala i singaot mifala i kam long lafet ya blong yutufala i stil long mifala!”

16Nao hem i kam luk Samson, mo i stap krae long hem, i talem se, “!Yu yu giaman nomo! !Yu no laekem mi nating! !Yu stap agens long mi nomo! !Yu yu talem ridel ya long ol man ples blong mi, be yu no talemaot mining blong hem long mi!”

Be Samson i talem long hem se, “Be mi mi no talemaot mining blong hem long papa mo mama blong mi tu. ?Olsem wanem yu ting se bambae mi talem long yu?”

17Nao woman ya i stap krae long hem gogo kasem namba seven dei blong lafet ya. Mo from we hem i stap krae tumas, mo i stap askem plante taem olsem, long namba seven dei ya, Samson i talemaot mining blong ridel ya long hem. Mo hem i go talemaot long ol man ya.

18Nao long dei ya, taem tufala i no go stap wanples yet, be ol man Filistia ya oli kam talem long hem se,

?Wanem samting we i swit moa

i winim eg blong sugabag?

?Mo wanem samting we i strong moa

i winim laeon?”

Nao Samson i talem long olgeta se,

“Sipos yufala i no bin yusum

kao ya blong mi

blong pulum plao blong yufala,

bambae yufala i no save brekem

graon nating

blong kasem mining blong ridel

ya.”

19Nao wantaem nomo, Spirit blong Hae God i kam long hem, i mekem hem i strong, nao hem i godaon long taon ya Askelon, we i wan narafala taon long Filistia. Mo long ples ya, hem i kilim toti man, i tekemaot ol gudfala klos blong olgeta, nao i kam givim long ol man ya we oli talemaot ansa blong ridel ya long hem. Nao hem i gohom we i kros we i kros tumas from samting ya.

20Be papa blong woman ya i girap, i givim woman ya i go long man ya we i witnes blong Samson long mared blong hem.