Ol Proveb 8 - Bislama Bible Revised 2012

Sing blong presem waestok

1 Prov 1.20,21 Olgeta.

!Yufala i lesin!

!Waestok ya we i stamba blong gudfala tingting,

hem i olsem woman we i stap singaot

blong yumi evriwan i harem hem.

2-3I olsem we hem i stap stanap antap long hil,

mo long saed blong rod,

mo long ples we rod i karem fok,

mo long doa* blong bigfala stonwol blong taon ya,

i stap singaot bigwan i kam long yumi.

4Hem i talem se,

“!Olgeta!

Mi mi stap tok long yufala evriwan.

Mi stap singaot i go long olgeta man long wol.

5Yufala we tingting blong yufala i olsem pikinini,

yufala i mas kam

blong mi mekem tingting blong yufala

i kam olsem tingting blong bigman.

Yufala we i no gat hed,

yufala i kam long mi

blong mi mekem we yufala i gat hed.

6Yufala i lesin gud,

from we tok blong mi i gud tumas.

Olgeta samting we mi wantem talem long yufala

oli stret gud.

7Olgeta tok blong mi oli trutok nomo,

mi mi no wantem nating ol giaman toktok.

8Evri tok we mi wantem talem oli tru nomo,

mi mi no save giaman,

mo mi no save lidim man

i go long rong rod.

9Man we i save luksave mining blong ol had samting,

olgeta tok ya blong mi

bambae oli klia nomo long hem.

Man we i waes gud,

mo i save plante samting,

wantaem nomo,

bambae hem i haremsave ol tok ya.

10Ol samting ya we mi wantem tijim yufala long hem,

yufala i mas holemtaet,

from we hem i gud moa i winim silva.

Mo save ya we mi wantem givim long yufala,

yufala i mas holemstrong,

from we hem i gud moa i winim gol.

11“Mi mi waestok,

mo mi gud moa winim ol flas ston

we praes blong olgeta i hae we i hae.

I no gat wan samting nating

we yufala i save makem,

we i gud olsem mi.

12Mi mi save luksave mining blong ol had samting,

mo mi save makem ol samting we i gud,

mo ol samting we i nogud.

13Man we i stap ona long Hae God,

hem i no laekem ol fasin nogud,

i agens long olgeta.

Mi mi no laekem nating

fasin blong praod,

mo fasin blong luklukdaon long narafala man,

mo fasin nogud, mo fasin blong giaman,

mi mi agens long olgeta.

14Oltaem mi stap mekem plan

blong wokem ol samting,

mo biaen, mi stap mekem

ol samting ya oli kamtru.

Mi mi gat paoa,

mo mi save luksave mining blong ol had samting.

15Oltaem mi stap givhan long ol king

blong oli rulum ol man blong olgeta,

mo mi stap givhan long ol gavman

blong oli mekem ol gudfala loa.

16Olgeta king blong wol ya,

wetem olgeta jif mo haeman,

mi nao mi stap givhan long olgeta

blong oli save rul.

17Man we i laekem mi tumas,

mi mi laekem hem tumas,

mo man we i stap lukaot mi,

hem i save faenem mi.

18Mi mi gat paoa blong mekem yufala i kam rijman,

mo blong mekem ol man oli ona long yufala.

Mi save mekem we yufala i no sot long wan samting,

mo we yufala i win long evri samting.

19Ol samting we yufala i save kasem long mi,

oli gud moa i winim silva we i klin gud,

mo gol we i beswan.

20Oltaem mi stap folem ol rod we i stret nomo,

mo mi stap mekem i stret gud long olgeta man.

21Olgeta we oli laekem mi tumas,

mi stap mekem olgeta oli kam rijman,

mo mi stap fulumap ol nambawan samting

long ol haos blong olgeta.

22-23 Rev 3.14 “Bifo we bifo olgeta,

taem we Hae God i no mekem wol ya yet,

long taem we hem i statem wok blong hem,

fas wok we hem i mekem, hem i mekem mi.

24Taem we i no gat solwota yet,

mo i no gat springwota i stap,

be mi mi bon finis.

25-26Taem we hem i no mekem wol ya yet,

mo i no putum ol hil

oli stap long ples blong olgeta yet,

mo i no gat ples blong garen,

mo i no gat graon nating yet,

be mi mi bon finis.

27-29Taem we hem i putum skae

i stap long ples blong hem,

mo i makem ples

we skae i kam pas long solwota,

mo i putum ol klaod

oli stap olbaot long skae,

mo i openem ol springwota aninit long solwota,

i mekem solwota i kam stap long ples blong hem,

mo i putum ol mak long ples

we bambae solwota ya i stap long hem,

nao i givim tok long hem, se bambae i no kam antap bitim ol mak ya,

be mi mi stap finis.

Taem we hem i stat putum ol stamba blong wol ya,

be mi mi stap finis.

30Mi stap stanap long saed blong hem,

mi olsem man we i mekem ol plan

we hem i stap folem.

Evri dei,

mi stap mekem hem i glad,

mo oltaem nomo,

mi harem gud blong stap wetem hem.

31Mi glad tumas blong luk wol ya,

mo mi hapi tumas blong luk ol man.

32“!Ol yang man!

Yufala i lesin gud long mi.

Sipos yufala i stap mekem olsem we mi mi talem,

bambae yufala i save harem gud.

33Yufala i mas lesin gud

long ol samting ya

we mi stap tijim yufala long hem.

Yufala i mas waes,

yufala i no mas tanem baksaed

long ol samting ya.

34Man we evri dei,

i stap kam long haos blong mi,

i stap wet long mi long doa blong mi,

i stap lesin gud long ol tok blong mi,

hem bambae i harem gud.

35Man we i faenem mi, hem i faenem laef,

mo oltaem, Hae God i stap glad long hem,

36be man we i no faenem mi,

oltaem hem i stap spolem hem nomo,

mo man we i no laekem mi nating, i stap agens long mi,

man olsem i wantem ded nomo.”