Esikel 48 - Bislama Bible Revised 2012

Ol graon blong ol laen blong Isrel

1-7Nao Hae God i talem se, “Mak blong graon ya long saed i go long not i stat long Mediterenian Si, i ron i go long is kasem taon ya Hetlon, mo i go kasem ples ya we rod i gotru long ol hil long Hamat, nao i ron i go long taon ya Enon long saed i go long is, mo i folem mak blong graon blong taon ya Damaskes, mo mak blong graon blong taon ya Hamat. Olgeta laen* ya wanwan bambae oli gat graon blong olgeta, i stat long mak blong graon ya saed i go long is i go kasem Mediterenian Si long saed i go long wes. Bambae ol graon blong olgeta, i stat long not i go long saot i olsem.

“Faswan, i gat graon blong ol laen blong Dan.*

“Mo nekiswan, i gat graon blong ol laen blong Asere.*

“Mo nekiswan, i gat graon blong ol laen blong Naftali.*

“Mo nekiswan, i gat graon blong ol laen blong Manase.*

“Mo nekiswan, i gat graon blong ol laen blong Efrem.*

“Mo nekiswan, i gat graon blong ol laen blong Ruben.*

“Mo nekiswan, i gat graon blong ol laen blong Juda.*

Graon ya long medel we i speselwan

8“Nao nekis graon ya hem i speselwan. Bambae bigfala blong hem, i stat long not i go long saot, i kasem twelef kilometa haf. Mo longfala blong hem, i stat long is i go long wes, i sem mak nomo long ol graon ya we ol narafala laen* ya oli gat. Mo haos* blong mi bambae i stap long graon ya.

9“Nao long medel blong graon ya, bambae i gat spesel ples, we longfala blong hem i kasem twelef kilometa haf, mo bigfala blong hem i kasem ten kilometa. Ples ya, bambae yufala i givim long mi blong i tabu, i blong mi.

10Long ples ya, bambae ol pris* oli gat graon blong olgeta blong stap long hem. Graon ya, i stat long is i go long wes, i kasem twelef kilometa haf, mo i stat long not i go long saot, i kasem faef kilometa, mo haos blong mi bambae i stap long medel blong hem.

11Nao graon ya bambae i blong ol pris ya we oli kamaot biaen long Jadok. Olgeta ya oli bin wok blong mi long olgeta tingting blong olgeta, mo oli no joen wetem ol narafala laen blong yufala ya, blong mekem ol samting nogud, olsem we ol Livaet* ya oli mekem.

12-13Nao from samting ya, bambae olgeta oli gat wan spesel graon, mo bambae graon ya i tabu we i tabu, i winim ol narafala graon ya. Mo ol Livaet tu bambae oli gat wan spesel graon klosap long graon ya blong ol pris. Mo graon ya, bambae oli makem long is i go kasem long wes, i kasem twelef kilometa haf, mo long not i go kasem long saot, i kasem faef kilometa.

14Graon we bambae yufala i givim long mi, hem i nambawan graon, i winim ol narafala graon ya. Mo bambae i no gat wan pis blong hem, we yufala i save salem, no we yufala i save givim olsem jenis blong narafala graon, no we yufala i save givim long wan narafala man. Graon ya bambae i tabu, i blong mi nomo.

15-18“Nao haf blong spesel graon ya we i stap long saed blong tabu graon ya long saed i go long saot, longfala blong hem i kasem twelef kilometa haf mo bigfala blong hem i kasem tu kilometa haf. Haf ya i no tabu, i blong olgeta man, blong oli save yusum. Oli save stap long ples ya blong yusum graon ya, mo taon bambae i stap long medel blong hem. Graon blong taon ya bambae i skwea, we evri saed blong hem i kasem tu taosen tu handred fifti meta. Mo raon long taon ya long evri saed blong hem, bambae i gat wan open ples, we bigfala blong hem i kasem wan handred twanti faef meta. Taem yufala i wokem taon ya finis, bambae i gat tu haf blong graon ya i stap yet, we wan i stap long saed blong taon ya, long saed i go long is, mo narawan i stap long saed i go long wes. Saes blong tufala graon ya i sem mak nomo, we longfala blong tufala i kasem faef kilometa, mo bigfala blong tufala i kasem tu kilometa haf. Hemia i ples blong ol man we oli stap long taon ya, oli save wokem ol garen blong olgeta long hem.

19Ol man we oli stap long taon ya, i nomata wanem laen oli kamaot long hem, be oli save wokem garen blong olgeta long graon ya.

20“Hemia i min se graon ya long medel we i speselwan, bambae i skwea, we evri saed blong hem i kasem twelef kilometa haf. Mo ples ya we taon bambae i stap long hem, hem tu i stap insaed long spesel graon ya.

21-22“Long spesel graon ya i gat haf we haos blong mi bambae i stap long hem, mo haf we ol pris bambae oli stap long hem, mo haf we ol Livaet bambae oli stap long hem, mo haf we taon bambae i stap long hem. Nao afsaed long spesel graon ya, long saed i go long is mo long saed i go long wes, i gat graon i stap we bambae i blong king. Mak blong graon ya blong hem long saed i go long is, i go kasem mak blong kantri ya long is, mo long saed i go long wes, i go kasem Mediterenian Si. Mo mak blong hem long saed i go long not, i go kasem graon blong Juda.* Mo mak blong hem long saed i go long saot bambae i go kasem graon blong Benjamin.*

Graon blong ol narafala laen blong Isrel

23-27“Nao i stat long spesel graon ya, i go long saot, ol narafala laen* ya wanwan bambae oli gat graon blong olgeta, i stat long mak blong graon ya saed i go long is i go kasem Mediterenian Si long saed i go long wes. Bambae ol graon blong ol laen ya, i stat long not i go long saot i olsem.

“Faswan, i gat graon blong ol laen blong Benjamin.*

“Mo nekiswan, i gat graon blong ol laen blong Simeon.*

“Mo nekiswan, i gat graon blong ol laen blong Isakara.*

“Mo nekiswan, i gat graon blong ol laen blong Sebulun.*

“Mo laswan, i gat graon blong ol laen blong Gad.*

28“Nao mak blong kantri blong yufala long saed i go long saot, hem i mak blong graon blong ol laen blong Gad. Mak ya bambae i stat long Tama, i ron i go long saotwes, i pas long draeples go kasem Kadesmeriba, we i gat wota long hem blong mekem ol samting i gru, nao i ron i go long notwes, i folem mak blong graon blong ol man Ijip, gogo kasem Mediterenian Si.

29“Hemia nao fasin we yufala i mas folem blong seraot ol graon ya, blong tekem i blong yufala. Mi mi Hae God, mi Masta blong yufala, mo hemia tok blong mi.”

Ol doa blong wol blong Jerusalem

30-34 Rev 21.12,13 Nao Hae God i talem se, “Taon ya Jerusalem* bambae i gat bigfala stonwol i goraon long hem, we i gat fo saed blong hem, we longfala blong olgeta wanwan bambae i kasem tu taosen tu handred fifti meta. Mo bambae i gat twelef bigfala doa blong go insaed long taon ya. Bambae i gat tri doa long evri saed, mo ol doa ya bambae oli karem nem blong ol twelef laen* ya blong yufala. Trifala doa long saed i go long not, wan bambae i karem nem blong Ruben,* mo wan bambae i karem nem blong Juda,* mo wan bambae i karem nem blong Livae.* Mo trifala doa long saed i go long is, wan bambae i karem nem blong Josef, mo wan bambae i karem nem blong Benjamin,* mo wan bambae i karem nem blong Dan.* Mo trifala doa long saed i go long saot, wan bambae i karem nem blong Simeon,* mo wan bambae i karem nem blong Isakara,* mo wan bambae i karem nem blong Sebulun.* Mo trifala doa long saed i go long wes, wan bambae i karem nem blong Gad,* mo wan bambae i karem nem blong Asere,* mo wan bambae i karem nem blong Naftali.*

35“Nao longfala blong bigfala stonwol ya we i goraon long taon ya bambae i kasem naen taosen meta. Mo i stat long taem ya i go, bambae yufala i talem nem blong taon ya, se ‘Hae God i stap long ples ya’.”