Levitikas 2 - Bislama Bible Revised 2012

Ol presen long kakae blong garen

1Bakegen, Hae God i talem se, “Moses. Sipos wan long yufala i wantem tekem kakae blong garen* blong hem blong givim i kam long mi, be fastaem hem i mas granem i kam flaoa, mo i mas tekem haf blong hem we i beswan. Bambae i mas kafsaedem olifoel* i go long flaoa ya, i tantanem wetem, mo i mas tekem insens* tu,

2nao i mas go givim ol samting ya long pris. Nao pris we i stap wok long taem ya, bambae i mas tekem smol haf blong flaoa ya long han blong hem, wetem insens ya, nao i mas bonem long Olta, blong soemaot we man ya i givim olgeta flaoa ya i kam long mi. Haf blong flaoa ya i wan presen we i blong bonem blong givim i kam long mi, mo gudfala smel blong hem bambae i mekem mi mi glad tumas long hem.

3Mo haf blong flaoa ya we i stap bambae i blong Hae Pris Eron wetem ol pikinini blong hem, blong oli kakae. Flaoa ya i tabu we i tabu from we i haf blong presen we man i givim finis i kam long mi.

4“Sipos wan long yufala i wantem kukum bred* long flaoa olsem fastaem, bambae i tabu blong hem i putum is long hem. Bambae i save tekem flaoa ya we i beswan, i tantanem wetem olifoel blong wokem bred long hem, no i save wokem bisket* long hem, we biaen, i ravem olifoel long hem.

5No sipos hem i wantem fraenem flaoa olsem blong mekem presen long hem, hem i mas tantanem wetem olifoel fastaem, nao i fraenem, be i tabu blong i putum is long hem.

6Mo taem hem i tekem i kam blong mekem sakrefaes long hem, bambae i mas brebrekem i kam smosmol, mo i mas kafsaedem olifoel i go long hem. Hemia nao fasin blong givim presen olsem i kam long mi.

7“Mo sipos hem i wantem kukum flaoa olsem long olifoel long sospen blong mekem presen long hem, bambae i mas tantanem wetem olifoel fastaem.

8Sipos wan long yufala i wokem wan presen olsem blong givim long mi, bambae hem i mas kam givim long pris, mo pris ya i mas tekem i kam long Olta.

9Nao hem i mas tekem smol haf blong hem, i bonem long Olta blong soemaot we man ya i givim olgeta kakae ya i kam long mi. Haf blong flaoa ya i wan presen we i blong bonem blong givim i kam long mi, mo gudfala smel blong hem bambae i mekem mi mi glad tumas long hem.

10Nao haf blong presen ya we i stap, bambae i blong Hae Pris Eron wetem ol pikinini blong hem, blong oli kakae. Hem i tabu we i tabu, from we i haf blong presen ya we man i givim finis i kam long mi.

11“Ol kakae ya blong garen we yufala i givim i kam long mi bambae i no mas gat is long hem. I tabu blong yufala i putum is no hani* long kakae we bambae yufala i givim i kam long mi.

12Evri yia, taem yufala i stap givim presen long mi long ol fas kakae blong garen blong yufala, bambae yufala i save putum is mo hani i go long hem, be ol presen ya i no blong bonem long Olta.

13“Ol presen long kakae blong garen we yufala i givim i kam long mi, yufala i mas putum sol long hem, from we sol i saen blong promes* ya we mi mi mekem wetem yufala. Yufala i mas putum sol long olgeta presen we yufala i givim i kam long mi.

14Taem yufala i givim presen long mi long fas kakae blong garen, bambae yufala i save givim kakae we yufala i rusum, no we yufala i granem i kam flaoa.

15Bambae yufala i mas kafsaedem olifoel i go long hem, mo yufala i mas givim insens tu i kam wetem presen ya.

16Nao pris bambae i mas tekem smol haf blong kakae ya, wetem insens ya we yufala i givim, i bonem blong soemaot we yufala i givim olgeta kakae ya i kam long mi. Hem i wan presen we i blong bonem blong givim i kam long mi.”