1Nao long taem ya, pris* ya Pasuru we papa blong hem Ime, hem i lida blong ol gad long haos* blong Hae God, mo hem i stap lesin long ol tok we Profet Jeremaea i talemaot.
2Nao hem i givim tok long ol man blong hem blong oli wipim profet ya, nao olgeta oli wipim hem, mo oli fasemtaet hem long yad blong haos ya, klosap long doa ya blong yad antap, we nem blong hem, Doa blong Benjamin.*
3Nao long nekis dei, taem Pasuru i letem profet i go fri, profet i talem long hem se, “Pasuru. Hae God i no putum nem blong yu, se ‘Pasuru,’ hem i putum nem blong yu, se ‘Mama blong fraet.’
4Hae God i talem se, ‘Mi bambae mi mekem we yu yu fraet we yu fraet, mo bambae yu mekem ol fren blong yu tu oli fraet we i fraet, nao bambae yu yu luk we ol enemi oli kam kilim olgeta evriwan oli ded long faet. Bambae mi putum yufala ol man Juda* evriwan long han blong king blong Babilonia, nao bambae hem i kilim sam long yufala oli ded, mo yufala we i stap laef, bambae hem i tekemaot yufala i go wok slef* long kantri blong hem.
5Mo bambae mi mekem ol enemi blong yufala oli kam tekemaot olgeta samting we yufala i gat, wetem ol gudgudfala samting long ples ya, mo olgeta samting we i mekem yufala i rijman, mo ol gudgudfala samting blong ol king blong Juda, nao bambae oli karemaot olgeta samting ya evriwan i go long Babilonia.
6Mo yu Pasuru, ol enemi bambae oli holem yu wetem ol famle blong yu, oli tekem yufala i go long Babilonia. Mo yufala, wetem ol fren blong yu we oltaem yu stap giaman long olgeta, bambae yufala evriwan i ded, mo bambae oli berem yufala longwe.’ ”
Profet Jeremaea i harem nogud nao i prea long Hae God7Nao Profet Jeremaea i prea, i talem se,
“Hae God.
Mi mi mekem olsem we yu yu talem,
be mi luk we yu yu trikim mi nomo.
Yu yu strong moa winim mi,
mo paoa blong yu i winim mi finis.
Olgeta man oli stap jikim mi,
oltaem nomo oli stap laf nogud long mi.
8“Oltaem,
taem mi talemaot tok blong yu,
be mi mi mas singaot bigwan se,
‘!Faet i stap kam!
!Bambae oli spolemgud yumi ya!’
Hae God,
oltaem nomo oli stap mekfani long mi,
mo oli stap tok nogud long mi,
from we mi mi stap talemaot ol tok blong yu.
9Sipos mi talem se,
‘Naoia bambae mi fogetem Hae God
mi no moa talemaot nem blong hem,’
be taem mi talem olsem,
ol tok blong yu i stap bon olsem faea
insaed long tingting blong mi.
Mi mi traem holem blong mi no talemaot,
be mi no save mekem.
10“Mi mi harem ol man oli stap tok smosmol se,
‘Naoia profet ya i mekem
olgeta man long evri ples oli stap fraet tumas.
Yumi mas go ripotem hem long ol haeman.’
Ol besfren blong mi nomo,
be oli stap wet blong luk
we mi mi kasem trabol, mi foldaon.
Oli stap talem se,
‘Sipos yumi save trikim hem,
bambae hem i foldaon,
nao rabis fasin ya blong hem,
bambae yumi save givimbak long hem.’
11Be Hae God,
oltaem yu stap givhan long mi,
olsem wan strong man blong faet.
Olgeta we oli stap ronem mi,
bambae oli no save winim mi.
Oltaem nomo, bambae oli sem
gogo i no save finis,
from we oli no save win nating,
mo sem ya blong olgeta,
bambae ol man oli no save fogetem samtaem.
12Be yu yu gat olgeta paoa,
mo yu stap traem ol man
long fasin we i stret,
from we yu yu savegud
tingting blong olgeta.
Naoia mi mi wantem luk
we yu yu givim panis long olgeta
we oli stap mekem i nogud tumas long mi,
from we mi mi putum
olgeta trabol ya blong mi
long han blong yu nomo.
13Hae God.
Oltaem mifala i stap presem yu,
mifala i stap singsing
blong leftemap nem blong yu.
Oltaem yu stap tekemaot mifala
long han blong ol man nogud,
yu stap sevem mifala.
14 Job 3.1-19 “Hae God.
Sipos yu bin singaot* trabol i kam
long dei ya we mi mi bon long hem,
mo yu no moa tingbaot taem ya
we mama blong mi i bonem mi long hem,
bambae i moa gud.
15Mo man we i karem nius i kam long papa blong mi se,
‘!Pikinini blong yu i bon finis!
!Hem i wan boe!’,
hem i mekem papa blong mi i glad tumas.
Be long taem ya,
sipos yu bin singaot trabol i kam long man ya,
bambae i moa gud.
16Hae God.
Sipos yu bin spolem man ya,
olsem we yu spolemgud ol taon ya,
we yu no gat sore nating long olgeta,
bambae i moa gud.
Man olsem,
sipos yu bin mekem
we evri moning,
hem i stap harem krae blong ol man
we oli stap harem nogud,
mo long medel dei,
hem i stap harem noes
blong bigfala faet we i stap kam,
bambae i moa gud.
17Sipos hem i bin kilim mi mi ded,
long taem ya we mi mi no bon yet,
nao bel blong mama blong mi
i kam beregraon blong mi,
bambae i moa gud.
18?From wanem mama blong mi i bonem mi?
Ating hem i bonem mi nomo
blong mi stap kasem ol trabol ya,
mo blong mi stap harem nogud,
gogo laef blong mi i finis,
we mi mi sem gud.”
Who We AreWhat We EelieveWhat We Do
2025 by iamachristian.org,Inc All rights reserved.
