Jajes 2 - Bislama Bible Revised 2012

Wan enjel blong Hae God i kamtru long olgeta long Bokim

1Nao ol laen* blong Isrel* oli stap long wan ples we biaen oli putum nem blong hem se Bokim. Nao wan enjel blong Hae God i aot long ples ya Gilgal, i go luk olgeta blong talemaot long olgeta we Hae God i talem se, “Bifo, mi mi tekemaot yufala long Ijip, mo mi tekem yufala i kam long graon ya we mi promes* long ol olfala bubu blong yufala bifo, se bambae mi givim long yufala. Mo mi talem long ol olfala ya blong yufala se, ‘Neva bambae mi brekem promes ya we mi mekem wetem yufala.

2Eks 34.12,13; Dut 7.2-5Be bambae yufala i no mas mekem wan narafala promes wetem ol man we oli stap long kantri ya, yufala i mas brekemdaon ol olta blong olgeta.’ Be naoia, yufala i girap, yufala i no mekem ol samting ya nating we mi mi talem. Mo ol samting ya we mi mi blokem, yufala i girap, yufala i mekem.

3Nao from samting ya, mi mi talem stret long yufala, se i stat naoia, sipos yufala i go blong mekem faet long olgeta ya bakegen, bambae mi mi no moa save ronemaot olgeta. Olgeta ya bambae oli kam enemi blong yufala, mo ol fasin blong mekem wosip blong olgeta bambae i kam olsem wan trap we bambae i kasem yufala.”

4Nao taem enjel ya i talemaot ol tok ya finis long olgeta, olgeta evriwan oli krae.

5Mo from samting ya, oli putum nem blong ples ya se Bokim, we i min se “Oli krae”. Nao olgeta oli kilim ol anamol, oli bonem olgeta blong mekem sakrefaes long Hae God long ples ya.

Josua i ded

6Nao long taem ya, Josua i sanem olgeta man oli gobak long ol ples blong olgeta. Mo olgeta evriwan oli aot, oli gogobak long ol graon blong olgeta, we oli kasem finis.

7-9Jos 19.49,50Josua, we papa blong hem Nun, hem i wan man blong wok blong Hae God. Mo taem hem i ded, hem i olfala we i olfala, yia blong hem i kasem wan handred ten. Mo oli berem hem long graon blong hem, long distrik ya Efrem,* long ples blong hil, long hil ya Gahas saed i go long not, long ples ya Timnatsera. Long taem ya we hem i stap laef, olgeta laen* blong Isrel* oli stap ona gud long Hae God. Mo biaen, long taem ya we hem i ded, olgeta oli stap holem fasin ya oltaem, gogo kasem taem we ol lida ya we oli bin luk ol bigbigfala wok ya we Hae God i mekem long fes blong olgeta, oli ded.

10Nao biaen, olgeta we oli gruap wantaem wetem ol lida ya, olgeta ya tu oli ded evriwan, mo olgeta we oli gruap biaen long olgeta ya oli no moa tingbaot Hae God, mo oli fogetemgud ol bigbigfala samting ya we hem i mekem long ol olfala blong olgeta bifo.

Ol man blong Hae God oli no moa tingbaot blong mekem wosip long hem

11Nao long taem ya, ol laen* blong Isrel* oli stat mekem ol samting nogud long fes blong Hae God, mo oli stat mekem wosip long ol pija blong god ya Bal.*

12Hae God i God blong ol bubu blong olgeta, mo bifo, hem i bin tekemaot olgeta long Ijip, be oli no moa mekem wosip long hem, oli girap, oli go mekem wosip long ol narafala god blong ol man ya we oli stap raonabaot long olgeta. Nao from samting ya, Hae God i kros tumas long olgeta.

13Olgeta oli lego hem, oli go stap mekem wosip long ol pija blong god ya Bal, mo blong woman god ya Astate.

14Mo from samting ya, Hae God i kros we i kros tumas long olgeta, nao hem i putum olgeta long han blong ol enemi blong olgeta we oli stap raonabaot long olgeta. Nao ol enemi ya oli kam strong tumas long olgeta, we oli no moa save blokem olgeta, nao oli stap kam stilim olting blong olgeta, oli stap karem i go.

15Mo evri taem, taem olgeta oli stap go blong mekem faet long ol enemi ya, be Hae God i stap agensem olgeta, stret olsem we hem i talem bifo. Nao from samting ya, olgeta oli stap harem nogud tumas.

16Nao Hae God i jusumaot sam man blong oli kam lida blong ol man ya blong hem, blong oli tekemaot olgeta long han blong ol enemi ya blong olgeta, oli sevem olgeta.

17Be olgeta oli no lesin nating long ol lida ya blong olgeta. Tingting blong olgeta i no stap strong nating long Hae God, olgeta oli stap go mekem wosip long ol narafala god ya. Fastaem, ol olfala blong olgeta oli stap obei gud long ol tok we Hae God i putum, be ol pikinini ya blong olgeta oli no tingbaot nating blong mekem olsem.

18Oltaem, taem we Hae God i jusumaot wan man blong i lida blong olgeta, hem i stap wetem lida ya, i stap givhan long hem. Nao oltaem long taem blong lida ya, Hae God i stap tekemaot olgeta long han blong ol enemi blong olgeta we oli stap spolem olgeta. Hem i stap sevem olgeta, from we hem i gat sore long olgeta.

19Be oltaem, taem lida blong olgeta i ded, olgeta oli stap gobak long ol rabis fasin ya blong olgeta, mo oli stap mekem ol fasin we oli nogud moa, i bitim ol fasin we ol olfala blong olgeta oli bin mekem fastaem. Olgeta oli stap gohed, oli stap biaen long ol narafala god ya, mo oli stap mekem wosip long olgeta. Mo oltaem nomo, oli stap mekem hed, oli no save lego ol fasin nogud ya blong olgeta.

20Nao from ol samting ya, Hae God i kros tumas long olgeta, mo hem i tok long olgeta se, “Promes* ya we mi mi mekem wetem ol olfala bubu ya blong yufala bifo, mo we mi talem long yufala blong yufala i holem, naoia yufala i brekem bakegen. Nao from we yufala i no moa save obei long mi olsem,

21ol narafala man ya we oli stap long kantri ya bifo, long taem ya we Josua i ded, bambae mi mi no moa save ronemaot olgeta.

22Bambae mi mi yusum olgeta blong traem yufala, se yufala i save folem gudfala fasin blong mi we ol olfala blong yufala i stap folem, no nogat.”

23Nao hem i letem ol narafala man ya oli stap nomo wetem ol man blong hem long kantri ya. Fastaem, hem i no putum olgeta long han blong Josua blong i ronemaot olgeta, mo biaen, long taem ya we Josua i ded, hem i no mekem wan samting tu blong ronemaot olgeta. Hem i letem olgeta oli stap nomo long kantri ya.