Sam 21 - Bislama Bible Revised 2012

Tok blong presem Hae God from we king i win(Sing ya, Deved i wokem.)(Tok i go long Hae God.)

1Hae God.

King blong mifala i glad tumas

from we yu yu givim paoa long hem.

Hem i glad we i glad,

from we yu yu winim ol enemi blong hem.

2Olgeta samting we hem i wantem tumas,

yu yu bin givim long hem.

Olgeta samting we hem i askem long yu,

yu yu bin mekem.

3Yu yu kam long hem,

mo yu mekem i gud tumas long hem.

Yu yu wokem wan hat blong king long gol,

nao yu putum long hed blong hem.

4Hem i askem laef long yu,

nao yu yu givim long hem.

Mo laef ya we yu givim,

bambae i no save finis.

5Hem i gat hae nem

from we yu yu givhan long hem.

Yu mekem hem i king,

nao ol man oli ona long hem.

6Ol gudgudfala samting

we yu yu givim long hem

bambae oli stap wetem hem oltaem.

Yu yu stap mekem hem i glad tumas

from we yu stap wetem hem.

7Hae God,

yu yu hae we yu hae.

King blong mifala i stap trastem yu,

mo hem bambae i stap sef oltaem,

from we oltaem yu yu lavem hem.

(Tok i go long king.)

8King.

Bambae yu yu winim olgeta

we oli enemi blong yu.

Bambae yu holem olgeta evriwan

we oli no laekem yu,

oli agens long yu.

9Taem yu kamtru long olgeta,

bambae yu spolem olgeta

olsem we bigfala faea i kakae olgeta samting.

Hae God bambae i kros tumas long olgeta,

i spolem olgeta,

i mekem wan bigfala faea i finisim olgeta.

10Bambae i no moa gat wan man long laen blong olgeta

we bambae i stap laef,

yu bambae yu kilim olgeta evriwan.

11Olgeta oli save mekem ol plan blong olgeta,

mo oli save girap oli agens long yu,

be bambae oli no save win.

12Yu bambae yu sutum olgeta

long ol ara blong yu,

nao bambae yu mekem olgeta

oli tanemraon, oli ronwe.

(Tok i go long Hae God.)

13Hae God.

Yu yu gat bigfala paoa.

Bambae mifala i sing blong leftemap nem blong yu,

bambae mifala i presem yu

from paoa ya blong yu.