1Nao pris* ya Esra i gohed bakegen long stori blong hem, i talem se, “Nao biaen, taem mifala i mekem ol samting ya finis, ol lida blong yumi oli kam luk mi, mo oli talemaot long mi se, ‘Esra. Ol pris, mo ol Livaet,* mo ol narafala laen* ya blong Isrel* oli stap miks wetem ol man blong ol kantri ya raonabaot long yumi. Hemia ol man Amon, mo ol man Moab, mo ol man Ijip, mo long saed blong ol man Kenan,* hemia ol laen blong Het, mo ol laen blong Perij, mo ol laen blong Jebus, mo ol laen blong Amoro.* Ol man ya blong yumi oli stap joen wetem olgeta ya, mo oli stap mekem ol fasin we i nogud we i nogud we olgeta ya oli stap mekem.
2Ol man blong yumi oli stap tekem ol dota blong ol narafala man ya i kam, blong oli mared long ol pikinini blong olgeta. Yumi ol man blong God, be sin ya i mekem we yumi no moa tabu, yumi kam doti long fes blong hem. Mo ol lida blong yumi wetem ol narafala haeman ya, olgeta ya nao oli stamba blong fasin nogud ya.’
3“Nao taem mi harem samting ya, tingting blong mi i foldaon olgeta, nao mi terem* klos blong mi, mi pulpulumaot hea blong mi, mo mustas blong mi, mo mi go sidaon we mi harem nogud tumas.
4Mi sidaon, mi stap harem nogud gogo kasem taem blong mekem sakrefaes long sapa, mo ol man blong yumi we oli fraet from ol strong tok ya we God blong yumi i talem finis from ol sin ya we ol man ya oli mekem, oli kam hivap raon long mi.
5Nao long taem ya, mi mi stap harem nogud yet, mo mi stap werem klos ya we mi terem, be mi girap long ples ya we mi stap sidaon long hem, mi nildaon, mi leftemap han blong mi blong mi prea long God,
6nao mi talem se, ‘Hae God. Yu yu God blong mi. Mi mi sem tumas, mi no save kam leftemap hed blong mi long fes blong yu. Ol sin blong mifala oli plante we plante, nao mifala i harem nogud tumas from. I olsem we oli hivimap i go antap we i bitim hed blong mifala, i go kasem skae.
7Mifala i man blong yu, be oltaem, i stat long taem blong ol bubu blong mifala bifo, kam kasem tede, mifala i stap mekem sin tumas. Mo from ol sin blong ol bubu blong mifala bifo, yu bin letem ol bubu blong mifala wetem ol king blong olgeta, mo ol pris blong olgeta i go long han blong ol king blong ol narafala kantri. Nao olgeta ya oli kam kilim sam long olgeta oli ded, oli stilim olting blong olgeta, mo oli tekemaot olgeta i go stap wok slef* long ples blong olgeta. Yu yu mekem we ol man oli no moa ona long olgeta, oltaem oli stap lukluk nogud tumas long olgeta, mo oli stap mekem sem fasin yet long mifala, kam kasem tede.
8“ ‘Hae God. Yu yu God blong mifala, mo naoia long smol taem ya, yu yu glad long mifala, yu letem sam long mifala i aot long laef ya we mifala i stap wok slef long hem, mifala i kam stap gud bakegen long ples ya we i tabu, i blong yu. Nating we mifala i stap wok slef yet, be yu yu givim niu laef long mifala.
9Mifala i stap wok slef, be yu yu no lego mifala. Mo from we yu yu lavem mifala, yu mekem we ol king blong Pesia oli givhan long mifala, oli letem mifala i stap laef, blong mifala i save wokem haos* blong yu bakegen, we ol enemi blong mifala oli bin spolem. Mo yu letem mifala i stap gud long ples blong mifala long Jerusalem,* mo long ol narafala ples long Juda.*
10-11“ ‘God blong mi. Yu yu mekem i gud tumas long mifala. ?Be naoia, bambae mifala i save talem wanem? Ol profet blong yu bifo, oli man blong wok blong yu, be ol tok blong yu we yu givim long olgeta blong oli talemaot long ol bubu blong mifala, mifala i no obei long hem, mifala i brekem finis. Olgeta oli talem long ol bubu blong mifala bifo se, “Kantri ya we bambae yufala i go stap long hem, hem i no klin long fes blong God. I stat long wan en blong kantri ya, i go kasem narafala en blong hem, ol man blong hem oli mekem i fulap gud long ol rabis fasin blong olgeta we oli nogud we i nogud tumas.”
12Eks 34.11-16; Dut 7.1-5Mo ol profet ya oli talem se, “From samting ya, bambae yufala i no mas letem ol dota blong yufala oli go mared long ol pikinini blong olgeta, mo yufala i no mas tekem ol dota blong olgeta oli kam mared long ol pikinini blong yufala. Mo bambae yufala i no mas traem givhan long olgeta blong oli kam strong, we laef blong olgeta i gohed gud. Nao sipos yufala i obei long ol tok ya, bambae yufala i save kam strong, mo yufala i save harem gud long ol gudgudfala kakae blong kantri ya, mo yufala i save givim kantri ya long olgeta we bambae oli kamaot biaen long yufala, blong oli holem i blong olgeta olwe.”
13“ ‘God blong mifala, yu yu panisim ol bubu blong mifala from ol sin blong olgeta, mo from ol fasin nogud blong olgeta, mo mifala i luksave se panis ya i smol nomo, i no kasem mak blong ol sin blong olgeta, mo yu letem olgeta oli stap laef.
14From samting ya, bambae mifala i no save tanem baksaed long ol tok blong yu bakegen, blong go mared long ol man ya we oli stap mekem ol fasin we i nogud we i nogud. Sipos mifala i mekem olsem, bambae yu kros tumas long mifala, nao bambae yu kilim mifala evriwan i ded we bambae i no gat wan i stap laef.
15Hae God, yu yu God blong mifala ol laen blong Isrel, mo mifala i man blong yu. Mifala i talemaot ol sin blong mifala long yu, mo from ol sin ya, i no stret nating blong mifala i kam stanap long fes blong yu, from we fasin blong yu i stret olgeta, be plis yu letem mifala i stap laef.’ ”
Who We AreWhat We EelieveWhat We Do
2025 by iamachristian.org,Inc All rights reserved.
