Sam 56 - Bislama Bible Revised 2012

Prea blong man we i trastem God(Sing ya, Deved i wokem, biaen long taem ya we ol man Filistia oli holem hem long taon ya Gat.)(Tok i go long God.)

1-2God, yu yu hae we yu hae. Plis yu sore long mi,

from we ol man we oli stap kam mekem faet long mi

oli plante we plante.

Evri dei nomo oli stap ronem mi,

mo oli stap faet long mi,

i stat long moning

gogo kasem long sapa.

Hae God, yu yu gat olgeta paoa.

3Taem mi mi fraet,

mi putum tingting blong mi i stap long yu.

(Tok i go long ol man.)

4Mi mi trastem Hae God

nao mi no moa fraet.

Mi mi presem hem

from ol promes blong hem.

I no gat man i save mekem wan samting long mi.

(Tok i go long Hae God.)

5I stat long moning

gogo kasem long sapa,

ol enemi blong mi

oli stap mekem trabol long mi.

Oltaem oli stap lukaot rod

blong spolem mi.

6Oli stap hivap long ol ples blong haed,

oli stap wajem mi long olgeta ples

we mi stap go long hem,

mo oli stap wet blong kilim mi.

7God,

plis yu kros long olgeta,

yu daonem olgeta.

Plis yu panisim olgeta

from ol rabis fasin ya blong olgeta.

8Yu yu savegud ol trabol blong mi,

mo olgeta taem ya we mi stap krae,

yu yu makemdaon olgeta finis

long buk blong yu.

9-10Hae God,

long dei we bambae mi singaot long yu,

yu bambae yu mekem

ol enemi blong mi oli tanemraon,

oli gobak.

Mi mi save samting ya finis,

from we yu yu stap long saed blong mi.

Mi mi stap presem yu

from ol promes blong yu.

(Tok i go long ol man.)

11Mi mi trastem Hae God,

nao bambae mi no save fraet.

I no gat man i save mekem wan samting long mi.

(Tok i go long God.)

12God,

bambae mi givim olgeta samting ya long yu

we mi bin promes blong givim.

Bambae mi givim presen blong mi long yu

blong talem tangkiu long yu

13from we yu yu sevem mi

nao mi no ded,

mo yu no letem mi mi lus.

Nao bambae mi mi stap wokbaot wetem yu,

long laet ya we i stap saen long olgeta

we oli gat laef.