Job 16 - Bislama Bible Revised 2012

Job i givim ansa long Elifas bakegen

1Nao Job i talem se,

2“Trifala.

Mi mi harem ol tok olsem bifo finis.

Ol tok ya we yufala i stap talem

blong givhan long mi,

oli stap mekem mi

mi harem nogud nomo.

3?Bambae yufala i finis wetaem?

Oltaem nomo,

yufala i stap gohed,

yufala i stap toktok.

Oltaem nomo, yufala i wantem

we tok blong yufala

i satem toktok ya blong yumi.

4Sipos yufala i stap harem nogud

olsem mi,

mo mi mi stap harem gud

olsem yufala,

mi tu mi save talem ol samting ya

we yufala i stap talem.

Sipos i olsem

mi tu mi save mekem fasin blong waesman,

mi save saksakem hed blong mi

long yufala,

mo mi save daonem yufala nomo long ol tok blong mi.

5Bambae mi save toktok long yufala,

blong leftemap tingting blong yufala,

mo mi save gohed blong tok blong mekem

tingting blong yufala i kam strong.”

Job i prea long God

6-7Nao Job i prea, i talem se,

“God.

Ol tok ya blong mi

i no givhan long mi nating,

be taem mi stap kwaet,

fasin ya tu i no save tekemaot

sobodi blong mi.

Yu yu letem ol enemi oli kam,

oli kilim ol famle blong mi oli ded,

mo yu mekem mi

mi slak we mi slak.

8Yu yu holemtaet mi finis.

Yu yu enemi blong mi ya.

Naoia mi kam bunbun olgeta,

mo ol man oli luk

se samting ya i soemaot

we mi mi bin mekem samting nogud.”

Job i tok long ol fren blong hem bakegen

9Nao Job i talem se,

“Trifala.

God i kros tumas long mi,

nao i stap spolemgud mi,

olsem we i stap pulumaot

han mo leg blong mi.

Hem i stap lukluk strong long mi

we i no laekem mi nating,

i stap agens long mi.

10Ol man oli stap jikim mi,

mo oli stap laf nogud long mi.

Oli kam hivap raon long mi,

mo oli stap slavem fes blong mi.

11God i putum mi finis

long han blong ol man nogud.

12Fastaem mi mi stap gud,

be God i kam holem mi long nek blong mi,

nao i stap kilim mi we i smasemgud mi.

Hem i stap yusum mi olsem mak

blong i praktis long bonara blong hem

i stap sutum mi.

13Hem i stap goraon long evri saed,

i stap sut i kam long mi.

Ol ara blong hem oli stap stikim mi,

oli stap mekem mi mi karekil,

be hem i no save sore long mi.

14Hem i stap sutum mi plante taem,

i mekem mi mi karekil tumas.

Hem i stap kam mekem faet long mi

olsem soldia we i stap kilim enemi blong hem

we i no gat sore nating.

15“Mi mi kam sidaon long asis,

mi stap krae,

mo mi putum ol rabis klos

blong soemaot we hem i mekem

we tingting blong mi i foldaon olgeta.

16Mi stap krae gogo

ae blong mi i red we i red,

mo i solap from.

17Be laef blong mi i klin,

mi no mekem faet nating,

mo prea blong mi long hem

i no blong giaman.”

18Nao hem i talem se,

“!Graon!

Fasin ya we laef blong mi bambae i lus,

hem i no stret nating.

!Plis yu no kavremap samting ya!

Plis yu no letem

we ol man oli berem mi,

nao tok blong mi i blong nating nomo.

19 Job 19.25 I gat wan witnes blong mi

i stap long heven,

mo hem bambae i stanap

i tok long saed blong mi.

20Ol fren blong mi

oli stap lukluk nogud long mi,

gogo oli tanem baksaed long mi.

Mi stap krae i go long God,

we wota blong ae blong mi

i stap ron bigwan.

21Mi mi wantem blong wan man

i toktok

long fes blong God

blong givhan long mi,

olsem we man i save toktok blong givhan long fren blong hem.”

Job i prea long God

22Nao Job i prea, i talem se,

“God.

Naoia laef blong mi i stap pas i go,

mi stap wokbaot i go long wan rod

we bambae mi no save kambak bakegen.