Jajes 10 - Bislama Bible Revised 2012

Tola i kam lida blong olgeta

1Nao King Abimelek i ded, mo biaen, Tola we papa blong hem Pua mo bubu blong hem Dodo, hem i kam lida blong ol laen* blong Isrel.* Hem i wan laen blong Isakara,* mo ples blong hem long taon ya Samiri, long distrik ya Efrem,* long ples blong hil.

2Hem i lidim olgeta twanti tri yia, nao hem i ded, mo oli berem hem long Samiri.

Jaere i kam lida blong olgeta

3Nao biaen, Jaere we i man Gilead, hem i kam lida blong olgeta, mo hem i holem wok ya twanti tu yia.

4Man ya i gat toti pikinini boe blong hem, mo olgeta evriwan oli gat dongki blong olgeta. Long distrik ya Gilead, i gat toti vilej oli stap long han blong olgeta, mo ol vilej ya oli karem nem ya yet se “Ol vilej blong Jaere”.

5Nao taem Jaere i ded, oli berem hem long taon ya Kamon.

Olgeta oli gowe long Hae God nao ol enemi oli spolem olgeta

6Mo biaen, ol laen* blong Isrel* oli stap mekem ol samting bakegen we i nogud long fes blong Hae God. Olgeta oli lego hem, oli no moa stap mekem wosip long hem, oli stap mekem wosip long ol pija blong god ya Bal,* mo blong woman god ya Astate. Mo oli stap mekem wosip tu long ol god blong ol man Siria, mo long ol god blong ol man Saedon, mo long ol god blong ol man Moab, mo long ol god blong ol man Amon, mo long ol god blong ol man Filistia.

7Nao from samting ya, Hae God i kros tumas long olgeta, mo hem i letem ol man Filistia mo ol man Amon oli kam mekem faet long olgeta, oli winim olgeta.

8Nao olgeta ya oli stap mekem i strong tumas long ol laen blong Isrel we oli stap long distrik ya Gilead, long ples ya we ol man Amoro* oli stap long hem bifo, long narasaed Jodan Reva long is. Mo oltaem, long eitin yia, oli stap ronem olgeta ya.

9Mo ol man Amon oli gokros long Jodan Reva tu, nao oli mekem faet long ol laen blong Juda,* mo long ol laen blong Benjamin,* mo long ol laen blong Efrem.* Oltaem oli stap mekem ol laen ya blong Isrel oli stap harem nogud tumas.

10Nao ol laen ya blong Isrel oli krae i go long Hae God, oli talem se, “Hae God, yu yu God blong mifala. Mifala i mekem ol samting we i nogud long fes blong yu, long fasin ya we mifala i stap mekem wosip long ol pija blong god ya Bal.”

11-12Nao Hae God i givim ansa long olgeta se, “Bifo, ol man Ijip, mo ol man Amoro, mo ol man Amon, mo ol man Filistia, mo ol man Saedon, mo ol man Amalek, mo ol man Maon oli mekem i strong tumas long yufala, mo yufala i krae i kam long mi blong mi givhan long yufala. Mo oltaem, mi nao mi stap tekemaot yufala long han blong olgeta ya.

13Be yufala i no tingbaot samting ya nating, yufala i lego mi, nao yufala i stap mekem wosip long ol narafala god ya blong olgeta. Naoia bambae mi mi no moa save tekemaot yufala bakegen.

14Yufala i go krae long ol narafala god ya we yufala i stap mekem wosip long olgeta. I gud yufala i askem long olgeta blong oli tekemaot yufala long ol trabol ya blong yufala.”

15Be olgeta oli talem long hem se, “Mifala i bin mekem i nogud long yu. I gud yu mekem long mifala olsem we yu yu wantem. Be plis, mifala i wantem se yu mas sevem mifala tede.”

16Nao oli sakemaot ol narafala god ya we oli stap mekem wosip long olgeta, mo oli mekem wosip long Hae God nomo. Nao hem i gat sore long olgeta from ol trabol ya we oli kasem.

17Nao ol man Amon oli mekemrere blong faet, mo oli kam putumap ol haos tapolen blong olgeta long distrik ya Gilead. Mo ol laen blong Isrel oli kam putumap ol haos tapolen blong olgeta long distrik ya tu, long Mispa.

18Be olgeta ya wetem ol lida blong olgeta oli stap asaskem long olgeta se, “?Hu bambae i lidim yumi blong go mekem faet long ol man Amon ya? Man we i lidim yumi, hem bambae i kam lida blong yumi evriwan ya we i stap long Gilead.”