Sam 37 - Bislama Bible Revised 2012

Laef blong man nogud mo laef blong gudfala man(Sing ya, Deved i wokem.)(Tok i go long ol man.)

1Bambae yu no jalus long ol man

we oli stap mekem samting nogud.

Nating we ol man nogud oli stap win,

be bambae yu no harem nogud from.

2Olgeta ya bambae oli lus

olsem gras we i drae long draetaem.

3Yu mas trastem Hae God,

mo yu mas mekem ol fasin we i gud,

blong yu save stap long graon ya,

nao yu harem gud from we yu yu sef.

4Yu mas luk long Hae God

blong i mekem yu yu glad,

nao bambae hem i givim long yu

ol samting we yu yu wantem tumas.

5Yu mas givim laef blong yu

long Hae God,

yu mas trastem hem,

nao bambae hem i halpem yu.

6Bambae hem i mekem ol stret fasin blong yu

i klia olsem delaet,

mo i mekem ol trutok we yu yu stap talem

i saen olsem san long medel dei.

7Yu mas mekem tingting blong yu

i longfala,

mo yu mas wet long Hae God

blong hem i givhan long yu.

I nogud blong yu harem nogud

taem ol narafala man oli stap win

long ol rabis plan blong olgeta,

nao oli stap kam rijman.

8I nogud yu kros,

i nogud yu faerap,

i nogud yu wari.

Ol samting ya i rod blong kasem trabol nomo.

9Olgeta we oli trastem Hae God

bambae oli tekem graon ya i blong olgeta,

be ol man nogud,

Hae God bambae i ronemaot olgeta.

10Bambae i no longtaem,

ol man nogud oli lus.

Bambae yu save lukaot olgeta,

be bambae yu no save faenem olgeta.

11 blong yumi i stap laf

long ol man nogud,

from we hem i save

we i no longtaem,

bambae hem i spolem olgeta.

14Ol man nogud

oli stap pulumaot

ol naef blong faet blong olgeta,

mo oli stap taetem

ol bonara blong olgeta,

blong kilim ol puaman mo ol trabolman,

mo blong spolem ol man

we oli stap mekem stret fasin.

15Be naef blong faet ya blong olgeta

bambae i kilim olgeta bakegen,

mo ol bonara ya blong olgeta

bambae oli brobrok.

16Smol samting nomo

we wan gudfala man i gat,

i moa gud,

i winim olgeta samting

we ol man nogud oli gat,

17from we Hae God bambae i tekemaot

paoa blong ol man nogud,

be bambae i blokem olgeta we oli gud,

i sevem olgeta.

18Hae God i stap lukaot gud long olgeta

we oli stap obei long hem,

mo graon ya bambae i blong olgeta

gogo i no save finis.

19Bambae oli no save harem nogud

long ol hadtaem.

Sipos kakae is sot,

be bambae oli gat plante kakae.

20Be ol man nogud bambae oli ded,

ol enemi ya blong Hae God

bambae oli lus olsem ol flaoa,

bambae oli lus olsem smok nomo.

21Ol man nogud oli stap karem

ol samting blong ol narafala man

blong oli yusum fastaem,

mo neva oli kam givimbak.

Be ol gudfala man,

fasin blong olgeta i gud tumas,

oli stap givim ol samting i go long man

long gladhat blong olgeta.

22Olgeta we Hae God i blesem olgeta

bambae oli tekem graon ya i blong olgeta,

be olgeta we hem i promes

se panis bambae i kasem olgeta,

hem bambae i ronemaot olgeta.

23Hae God i stap lidim ol man

long rod we i stret blong olgeta i folem,

mo i stap lukaot gud long ol man

we hem i glad long fasin blong olgeta.

24Sipos oli foldaon

be bambae oli no save stap daon longtaem,

from we Hae God bambae i holem olgeta,

i leftemap olgeta bakegen.

25Naoia mi mi olfala,

mi stap longtaem,

be neva mi luk wan gudfala man

we Hae God i lego hem,

no ol pikinini blong man olsem

we oli stap asaskem kakae olbaot.

26Oltaem ol man olsem oli glad nomo

blong oli stap givim olting blong olgeta

i go long ol man,

mo oli save letem ol man

oli kam karem olting blong olgeta

blong yusum fastaem.

Mo ol pikinini blong olgeta

oli olsem rod we God i stap yusum

blong mekem i gud long olgeta

mo long ol man raonabaot long olgeta.

27Yu mas tanem baksaed blong yu

long ol rabis fasin,

mo yu mas mekem ol samting we i gud,

nao olgeta we bambae oli stap kamaot biaen long yu

bambae oli stap oltaem long graon ya,

28from we Hae God i laekem

ol fasin we i stret,

mo i no save lego ol stret man ya

we tingting blong olgeta

i stap strong long hem.

Hem bambae i stap lukaot gud long olgeta

gogo i no save finis,

be olgeta we bambae oli stap kamaot

biaen long ol man nogud,

bambae hem i ronemaot olgeta.

29Ol stret man ya bambae oli tekem graon ya

i blong olgeta,

mo bambae oli stap long hem

gogo i no save finis.

30Ol tok blong gudfala man oli waes,

mo ol samting we hem i talem

oli stret nomo.

31Hem i stap holem ol loa blong God blong hem

long tingting blong hem,

mo neva hem i lego ol loa ya.

32Oltaem man nogud i stap wajem gudfala man

blong traem faenem rod blong kilim hem i ded.

33Be Hae God i no save letem gudfala man

i go long han blong enemi blong hem.

Sipos man nogud i tekem gudfala man

i go long kot,

bambae Hae God i no save letem man nogud ya

i winim gudfala man ya.

34Yu mas putum tingting blong yu

i stap strong long Hae God,

mo yu mas obei long ol tok blong hem,

nao bambae hem i ona long yu,

i givim graon ya long yu.

Bambae yu luk

we hem i ronemaot ol man nogud.

35Bifo mi mi luk wan man nogud i stap

we hem i haeman long ples blong hem,

mo i stap spolem ol man.

Hem i hae we i hae long olgeta man

olsem wan bigfala sida* long Lebanon

we i hae tumas.

36Nao biaen mi kam pas long ples blong hem bakegen

be hem i no moa stap.

Mi traem lukaot hem

be mi no save faenem hem.

37Yu lukluk gud long gudfala man,

we laef blong hem i stret,

mo we hem i wantem pis,

yu traem makem fasin blong hem.

Olgeta we oli kamaot biaen long hem

oli plante we plante.

38Be ol man nogud,

Hae God i stap kilim olgeta oli ded.

Mo olgeta we oli kamaot biaen long olgeta,

hem i stap flatemgud olgeta.

39Oltaem Hae God i stap sevem ol stret man,

i stap lukaot gud long olgeta

long taem blong trabol.

40Hem i stap halpem olgeta,

i stap sevem olgeta.

Hem i stap tekemaot olgeta

long han blong ol man nogud,

from we oli stap luk long hem

blong hem i blokemgud olgeta

oli stap gud.