Hosea 4 - Bislama Bible Revised 2012

Hae God i tok agens long ol man Isrel

1Bakegen Profet Hosea i talem long ol man Isrel* se, “Olgeta. Hae God i gat poen finis blong talemaot agens long yufala. Yufala i mas lesin long tok blong hem. Hem i tok long yufala, i talem se, ‘Yufala blong kantri ya, tingting blong yufala i olbaot. Fasin blong holem promes mo fasin blong lavem man i no gat nating long yufala, mo yufala i no save nating we mi mi God.

2Oltaem yufala i stap mekem promes, be yufala nomo i stap brekem ol promes ya bakegen. Yufala i man blong giaman, yufala i man blong kilim man i ded, yufala i man blong stil, mo yufala i man blong stilim woman blong narafala man. Fasin ya blong brekem loa i stap kam bigwan tumas long ples ya, mo fasin ya blong kilim man i ded i no finis nating long yufala.

3Nao from samting ya, bambae mi mekem evri samting long ples ya i kam drae, mo olgeta samting we i stap long hem bambae oli ded. Olgeta anamol wetem ol pijin mo ol fis we oli stap long ples ya bambae oli ded evriwan.’ ”

Hae God i tok long ol pris

4Mo Profet Hosea i gohed i talemaot we Hae God i talem se, “Yufala ol pris.* I nogud yufala i stap tok nogud long ol man ya, mo i nogud yufala i stap jajem olgeta. Mi mi gat poen agens long yufala we i bigwan moa.

5Oltaem, long dei mo long naet, yufala i stap wokbaot olsem we yufala i stap long tudak, mo ol profet tu oli sem mak nomo long yufala. Naoia bambae mi flatemgud kantri ya Isrel,* we i olsem mama blong yufala.

6Ol man ya blong mi, bambae oli go lus, from we oli no save mi. Be yufala ol pris, yufala i mowas olgeta. Yufala i no wantem save mi nating. Yufala i tanem baksaed long mi, mo yufala i no save harem ol tok blong mi we mi stap tijim yufala long hem. Nao from samting ya, mi mi tanem baksaed long yufala, yufala i no moa pris blong mi, mo bambae mi no moa save makem ol pikinini blong yufala se oli pris blong mi.

7“Ol pris. Taem yufala i stap kam plante moa, be fasin blong yufala blong mekem sin agens long mi i stap kam mowas olgeta. Yufala i gat hae nem, be bambae mi mekem yufala i sem bigwan.

8Taem ol man blong mi oli mekem sin, yufala i stap winim mane from, mo taem yufala i luk we oli mekem olsem, be yufala i glad nomo.

9Panis blong yufala, bambae i sem mak nomo long panis blong olgeta. Bambae mi mas panisim yufala from ol rabis fasin ya we yufala i stap mekem.

10Nating we yufala i stap kakae haf blong ol mit ya we yufala i stap bonem blong mekem sakrefaes, be neva bambae yufala i save fulap long hem, oltaem nomo bambae yufala i stap hanggri. Mo bambae yufala i stap mekem wosip long ol narafala god ya we ol man oli talem se oli stap mekem woman i bonem pikinini, be neva bambae yufala i gat plante pikinini, from we yufala i tanem baksaed finis long mi blong go biaen long ol narafala god ya.”

Hae God i no laekem nating fasin blong mekem wosip long ol narafala god

11Mo Profet Hosea i talemaot bakegen we Hae God i talem se, “!Ol man blong mi! Ol waen ya we yufala i stap dring, nating we i olfala, no i niuwan yet, be i stap mekem hed blong yufala i krangke nomo.

12Yufala i stap askem long wan wud nomo we yufala i stanemap, blong i soemaot mining blong ol drim blong yufala, nao yufala i stap talem se wud ya i stap soemaot ol samting long yufala we yufala i wantem save. Yufala i lego mi finis, olsem woman we i lego man blong hem, i stap salem hem olbaot. Yufala i mekem ol narafala god ya oli kam bos blong yufala.

13Yufala i stap go long ol tabu ples antap long ol bigfala hil, yufala i mekem sakrefaes long ol god ya. Mo antap long ol smosmol hil, yufala i stap bonem insens* long olgeta aninit long ol bigbigfala tri olbaot, we sed blong olgeta i gud tumas.

“Nao from we yufala i stap mekem olsem, taswe ol gel blong yufala oli stap salem olgeta olbaot, mo ol woman blong ol pikinini blong yufala oli ronwe, oli go biaen long ol narafala man.

14Be mi mi no save givim panis long olgeta, from we yufala nao i stamba blong samting ya. Yufala i stap go long ol haos blong ol narafala god ya, yufala i stap slip wetem ol woman pris blong olgeta, mo yufala i stap joen wetem ol pris ya blong mekem sakrefaes long ol god ya. I olsem wan tok we i talem se, ‘Ol man blong wan kantri we oli no gat tingting, bambae oli lus.’

15“Ol man Juda.* Nating we ol man Isrel* ya oli ronwe long mi blong go lukaot ol narafala god, be yufala i no mas folem fasin blong olgeta. Bambae yufala i no mas go long Gilgal, mo long Betaven, blong mekem wosip long ol narafala god, mo blong mekem promes long olgeta se, ‘Hae God i laef, i stap we i stap, mo mifala i mekem promes ya long nem blong hem.’

16Ol man Isrel ya, hed blong olgeta i strong tumas, olsem ston. ?Bambae mi lukaot gud long olgeta olsem wanem? Mi wantem givhan gud long olgeta, olsem we man i stap givim gudfala kakae long ol pikinini blong sipsip, be oli no wantem.

17Oli stap finis long han blong ol narafala god ya. I moa gud oli gohed blong folem olgeta olsem we oli wantem.

18Taem oli stap dring waen, oli wantem tumas blong lukaot ol woman blong rod. Oli wantem mekem ol fasin blong sem nomo, i winim we oli wantem mekem stret fasin we man i save ona long olgeta from.

19Olgeta ya bambae oli go lus, olsem doti we win i blu long hem, mo bambae oli sem long ol sakrefaes ya we oli stap mekem long ol narafala god ya.