Sefanaea 2 - Bislama Bible Revised 2012

Ol man oli mas tanem tingting blong olgeta

1-2Nao Profet Sefanaea i gohed i talem se, “Olgeta. !Yufala i no gat sem nating! Dei ya blong kros blong Hae God bambae i kamtru. Yufala i mas tingting gud fastaem. Sipos no, kros blong hem bambae i kasem yufala olsem we hem i talem, nao bambae yufala i lus, olsem doti we win i karem i go.

3Yufala long ples ya, we tingting blong yufala i stap daon, mo oltaem yufala i stap obei long ol tok blong Hae God, i gud yufala i stap prea long hem. Yufala i mas mekem ol samting we i stret, mo yufala i mas mekem tingting blong yufala i stap daon long fes blong hem. Sipos yufala i mekem olsem, taem dei blong kros blong hem i kamtru, maet hem i no save givim panis long yufala.”

Ol narafala kantri we oli stap raonabaot long Juda bambae oli kasem panis

4

5Ol man Filistia. Yufala i stap klosap long solwota, be sore tumas long yufala. Hae God i jajem yufala finis, se bambae yufala i mas kasem panis. Hem bambae i kilim yufala evriwan i ded, mo bambae i no moa gat wan long yufala i stap.

6Ol graon blong yufala klosap long solwota, bambae i kam ples blong sipsip, mo i ples blong man blong lukaot long sipsip, mo i ples blong ol yad blong ol sipsip.

7Be haf blong ol man Juda* we oli no ded, olgeta ya nao bambae oli holem ol graon blong yufala, mo bambae oli stap lukaot long ol sipsip blong olgeta long hem, mo oli stap slip long ol haos long Askelon. Hae God i God blong olgeta, mo bambae hem i stap wetem olgeta, mo i mekem olgeta oli kam gud bakegen.”

8 Aes 15.1—16.14; 25.10-12; Jer 48.1-47; Esik 25.8-11; Amos 1.13-15; Jer 49.1-6; Esik 21.28-32; 25.1-7; Amos 1.13-15 Mo profet i talem se, “Hae God i gat olgeta paoa, mo hem i talem se, ‘Ol laen* blong Isrel.* Yufala i man blong mi, mo mi harem finis we ol man Moab mo ol man Amon oli stap tok nogud long yufala, mo oli stap jikim yufala. Oli stap tok flas se bambae oli tekemaot graon blong yufala.

9Jen 19.24Mi mi God blong yufala, mo mi laef, mi stap we mi stap. Mo naoia mi promes* long nem blong mi, se mi bambae mi spolem tufala kantri ya Moab mo Amon long sem fasin we mi mi bin spolem Sodom mo Gomora bifo. Tufala kantri ya bambae i kam ples blong sol nomo we bambae i no gat wan gudfala samting i save gru long hem. Ol rabis gras nomo bambae i kavremap tufala, mo bambae tufala i stap nogud olwe gogo i no save kam gud bakegen samtaem. Be yufala we bambae yufala i no ded long ol trabol ya, bambae yufala i go tektekemaot olting blong olgeta ya i blong yufala, mo bambae yufala i holem graon blong olgeta tu.’ ”

10Nao profet i talem se, “Ol man Moab mo ol man Amon bambae oli kasem panis olsemia nao. Bambae oli kasem panis ya from we oli praod, mo oli stap mekem hed tumas. Hae God i gat olgeta paoa, be oltaem olgeta ya oli stap tok nogud agens long yumi ol man blong hem.

11Hem bambae i mekem olgeta oli fraet we i fraet. Olgeta god blong wol ya, bambae hem i mekem olgeta i kam olsem nating nomo. Nao ol man blong olgeta kantri bambae oli stap mekem wosip long hem nomo, long weples we oli stap long hem.

12 Aes 18.1-7 “Ol man blong kantri ya Itiopia tu, Hae God bambae i kilim olgeta evriwan i ded.

13 Aes 10.5-34; 14.24-27; Neham 1.1—3.19 “Hae God bambae i yusum paoa blong hem blong spolem kantri ya Asiria, mo bambae hem i mekem Nineve, bigfala taon ya blong olgeta, i kam nogud olgeta, we bambae i no moa gat man i stap long hem, mo bambae i kam wan draeples we i no gat wota long hem.

14Ples ya, bambae i kam ples we ol sipsip, mo ol buluk, mo ol narafala wael anamol bambae oli go stap spel long hem. Ol hoknaet bambae oli stap slip olbaot long ol ololfala haos long ples ya we oli brobrok finis. Mo bambae oli stap sidaon long ol windo, nao oli stap singaot. Ol pijin ya reven,* bambae oli stap sidaon long ol step blong ol haos ya, oli stap krae. Ol pos blong ol haos ya we oli katem long ol gudgudfala tri ya sida,* bambae ol man oli tekemaot olgeta evriwan.

15Ol samting ya nao bambae i kasem taon ya, we ol man blong hem oli stap praod tumas long paoa blong olgeta, mo oli stap ting se oli stap gud nomo, oli sef. Ol man blong hem oli stap tok flas se taon blong olgeta i nambawan, i winim ol narafala taon long wol ya. Be naoia, taon ya bambae i kam nogud olgeta, bambae i kam ples blong spel blong ol wael anamol nomo. Ol man we oli stap pas long ples ya, bambae oli sek, oli fraet tumas long hem.”