Amos 7 - Bislama Bible Revised 2012

Profet Amos i luk tri vison

1Nao Profet Amos i talem se, “Hae God we i Masta* blong yumi, hem i soemaot wan vison* long mi. Long taem ya, ol man blong king oli katem gras finis, blong ol anamol blong king oli save kakae long koltaem, mo gras i stat gru bakegen. Long vison ya, mi mi luk we Hae God i mekem ol lokis* i kamaot, oli kakae ol niufala gras ya,

2gogo oli finisimgud olgeta samting we i stap gru long ples ya. Nao mi mi talem se, ‘Hae God. Yu yu Masta blong mifala. Plis yu fogivim ol man Isrel* ya. Olgeta oli man blong yu, oli laen* blong Jekob,* we i stamba blong mifala evriwan. ?Bambae oli save stap gud olsem wanem? Olgeta oli no plante ya.’

3Nao Hae God i jenisim tingting blong hem, i talem se, ‘Oraet. Samting ya we yu yu luk, bambae i no save kamtru olsem.’

4“Mo biaen, hem i soemaot wan narafala vison long mi bakegen. Long vison ya, mi luk wan bigfala faea we Hae God i mekemrere, blong i bonem ol man blong hem blong panisim olgeta. Dip solwota ya we i godaon olgeta, be bigfala faea ya i bonem evriwan finis, mo mi luk we i jes stat bakegen blong kakae ol graon.

5Nao mi mi talem se, ‘Hae God. Yu yu Masta blong mifala. Plis yu kilim faea ya. Olgeta ya oli man blong yu. ?Bambae oli save stap gud olsem wanem? Olgeta oli no plante ya.’

6Nao hem i jenisim tingting blong hem bakegen, i talem se, ‘Oraet. Samting ya tu bambae i no save kamtru olsem.’

7“Bakegen mi luk wan narafala vison, we Hae God i soemaot long mi. Long vison ya, mi luk we hem i stap stanap klosap long wan stonwol, we taem oli wokem stonwol ya fastaem, oli yusum ledlaen blong makem se i stret. Mo mi luk we hem i stap holem wan ledlaen,

8nao hem i askem long mi se, ‘Amos. ?Yu save samting ya we mi stap holem?’ Nao mi talem se, ‘Yes, wan ledlaen ya.’ Nao hem i talem long mi se, ‘Samting ya, mi stap yusum blong soemaot long ol man blong mi, we oli olsem stonwol ya we i no stanap stret. Mi mi no save jenisim tingting blong mi bakegen. Bambae mi mas panisim olgeta.

9Ol man Isrel ya oli laen blong Aesak, be ol tabu ples ya olbaot antap long ol hil we oli stap go blong mekem wosip long hem, mi bambae mi flatemdaon evriwan. Mo olgeta we bambae oli kamaot biaen long King Jeroboam, bambae mi kilim olgeta evriwan i ded.’ ”

Profet Amos mo pris ya Amajia

10Nao pris* ya Amajia we i pris long ples ya blong mekem wosip long Betel, hem i sanem tok i go long King Jeroboam we i king blong ol man Isrel* blong ripotem Profet Amos. Hem i talem se, “Naoia, Profet Amos i stap pulum ol man ples, blong oli mekem plan blong spolem yu. Mo ol tok we hem i stap talem, bambae i spolemgud kantri ya blong yumi.

11Hem i stap talem se, ‘King Jeroboam bambae i ded long taem blong faet, mo yufala ya tu, ol enemi blong yufala bambae oli kam tekemaot yufala i go wok slef* long narafala kantri.’ ”

12Nao pris ya i kam luk profet ya, i talem long hem se, “Profet. I gud yu hareap, yu gobak long Juda,* yu go talemaot tok blong yu long ol man ples blong yu, nao olgeta bambae oli save pem yu from.

13I nogud yu stap long ples ya, from we Betel i ples blong mekem wosip blong king.”

14Be profet i talem se, “Mi mi no wan long ol profet ya, we taem oli talemaot tok blong olgeta, be ol man oli mas pem olgeta from. Mi mi wan man blong lukaot long ol buluk mo sipsip, mo mi gat plantesen blong figtri* blong mi, we mi stap lukaot bifo.

15Be Hae God i tekemaot mi long wok ya, mo hem i talem strong long mi blong mi kam talemaot tok blong hem long yufala long Isrel, from we yufala i man blong hem.

16Amajia. !Yu lesin gud! Bambae mi talemaot long yu tok ya we Hae God i talem long mi. Yu yu wantem blokem mi blong mi no moa talemaot tok blong hem, mo blong mi no moa prij agens long yufala long Isrel.

17Be Hae God i talem se, ‘Woman blong yu bambae i kam woman blong rod, mo ol pikinini blong yutufala bambae oli ded evriwan long taem blong faet. Ol graon blong yu, bambae ol narafala man oli seraot i go long olgeta, mo yu bambae yu ded long kantri blong narafala man. Mo ol man Isrel evriwan, bambae ol enemi blong yufala oli kam tekemaot olgeta oli go wok slef long ples blong olgeta.’ ”