Esikel 36 - Bislama Bible Revised 2012

Hae God bambae i blesem ol laen blong Isrel

1Hae God i Masta* blong yumi, mo hem i toktok long mi long wan vison bakegen, i talem se, “Man blong wol ya. Yu tok long ol hil blong Isrel, yu talem long olgeta blong oli lesin long tok blong mi.

2Mi mi talem se, ‘Ol enemi blong ol laen* blong Isrel* oli harem gud tumas, oli stap talem se, “!Saye! Ol hil ya we oli stap bifo olgeta kam kasem tede, oli blong yumi nao.’ ”

3“Yu tok, yu talemaot long ol hil ya we mi mi talem se, ‘Taem ol man blong ol narafala kantri raonabaot long yufala oli kam insaed long kantri blong yufala, oli stilim olgeta samting we i stap long kantri ya, mo olgeta evriwan oli jikim yufala, oli stap laf nogud long yufala.

4Yufala ol hil, mo yufala ol krik, mo yufala ol levelples long medel blong ol hil, mo yufala ol ples we ol enemi oli spolemgud yufala, yufala i mas lesin long tok blong mi. Yufala ol taon we ol man blong ol narafala kantri raonabaot long yufala oli spolem yufala, mo oli stilim olting blong yufala, oli livim yufala i stap we i no moa gat wan gudfala samting i stap long yufala, nao oli stap jikim yufala from, yufala tu i mas lesin long tok blong mi. Yufala evriwan i mas lesin long ol samting we mi mi stap talem long yufala.

5“ ‘Mi mi kros we mi kros tumas long ol kantri ya we oli stap raonabaot long yufala, be mi kros moa long kantri ya Edom. Nao mi tok long olgeta kantri ya from we oli jikim mi, oli laf nogud long mi, mo oli tekemaot kantri ya blong mi wetem ol gudgudfala graon blong hem we i gat ol gudgudfala gras long hem, oli holem i blong olgeta.’

6“Nao from samting ya, yu mas talemaot tok blong mi long kantri ya blong yufala. I gud yu toktok gud long ol hil blong hem, mo long ol krik, mo long ol levelples long medel blong ol hil, yu talemaot ol samting we mi wantem talem long olgeta. Fasin ya we ol man blong ol narafala kantri oli stap tok nogud blong daonem ol ples ya, blong mekem yufala i sem, mi mi kros tumas from.

7Mo from samting ya, mi mi mekem wan strong promes* long nem blong mi, se ol narafala kantri ya we oli stap raonabaot long yufala, bambae mi mekem olgeta oli sem.’

8“Mo yu mas talem long ol man blong mi we mi mi talem se, ‘Ol laen blong Isrel. Long kantri blong yufala, ol han blong ol tri antap long ol hil bambae oli gru bakegen, mo oli karem frut, blong yufala i save kakae. I no longtaem, bambae yufala i save gobak long hom blong yufala bakegen.

9Mi mi stap long saed blong yufala, mo bambae mi givhan long yufala blong yufala i save brebrekem ol graon blong yufala, nao yufala i save planem ol kakae blong yufala bakegen long hem.

10Mo bambae mi mekem yufala i kam plante we plante. Bambae yufala i stap long ol taon ya, mo bambae yufala i wokemgud olgeta samting ya bakegen we ol enemi oli bin spolem.

11Bambae mi mekem we yufala i kam plante we plante, we yufala i gat plante pikinini blong yufala, nao bambae yufala i kam plante moa, i winim bifo. Mo bambae mi mekem ol anamol blong yufala tu oli kam plante. Bambae mi letem yufala i stap long kantri ya bakegen olsem bifo, mo bambae mi mekem yufala i win gud long olgeta samting, i winim fastaem. Nao bambae yufala i savegud we mi mi Hae God.

12Yufala i man blong mi, mo bambae mi tekem yufala i gobak long kantri ya blong yufala bakegen. Bambae yufala i holem kantri ya bakegen, yufala i stap long hem, mo neva bambae ol pikinini blong yufala oli sot long kakae bakegen samtaem.

13“I tru we ol man oli stap talem se kantri ya i stap kakae ol man blong hem, mo i stap kilim ol pikinini blong ol man blong hem.

14Be i stat naoia i go, bambae ples ya i no moa olsem.

15Kantri ya, bambae i no moa save kilim ol pikinini blong ol man blong hem, mo mi bambae mi no moa save letem ol narafala kantri oli tok nogud long hem, no oli jikim hem. Mi mi Hae God, mi Masta blong yufala, mo hemia tok blong mi.”

Hae God bambae i mekem laef blong ol laen blong Isrel i niuwan bakegen

16Nao Hae God i toktok long mi bakegen,

17i talem se, “Man blong wol ya. Bifo, taem yufala i stap yet long kantri ya blong yufala, plante long yufala oli stap mekem kantri ya i kam doti long fes blong mi long ol fasin we i nogud olgeta. Fasin ya blong olgeta i doti long fes blong mi, stret olsem woman we i kasem sik blong hem, i kam doti long fes blong mi.

18Nao mi letem olgeta oli haremsave paoa blong kros blong mi, from we oli stap kilim man i ded long kantri ya, mo oli stap mekem wosip long ol aedol ya we oli mekem ples ya i doti long fes blong mi.

19Nao from fasin ya blong olgeta, mo ol samting ya we oli mekem, mi talem se mi mas panisim olgeta, nao mi ronemaot olgeta oli go stap olbaot long ol narafala kantri.

20Be long olgeta ples we oli go stap long hem, oli stap mekem sem long tabu nem blong mi. Oli mekem mi mi harem nogud tumas, from we olgeta man oli stap talem se, ‘Ol man ya oli man blong Hae God, be yu luk. Ol enemi oli ronemaot olgeta long kantri ya we hem i givim long olgeta.’

21Samting ya i mekem mi mi tingting tumas, from we ol man ya blong mi oli stap spolem tabu nem blong mi, long olgeta ples we oli go long hem.

22“Nao from samting ya, mi wantem blong yu go talem long olgeta se, ‘Ol samting we mi bambae mi mekem i no from we mi sore long yufala. Bambae mi mekem from tabu nem blong mi we yufala i stap spolem long olgeta ples we yufala i go stap long hem.

23Hae nem blong mi i tabu we i tabu, be yufala i spolem long fes blong olgeta man. Be taem mi soemaot nem ya blong mi long ol man blong ol narafala kantri, bambae olgeta oli savegud we mi mi Hae God. Bambae mi yusum yufala blong soemaot long olgeta we mi mi tabu we mi tabu.

24Bambae mi tekemaot yufala long medel blong olgeta man ya, mo long olgeta kantri ya we yufala i stap long hem, nao bambae mi putum yufala long kantri ya blong yufala bakegen.

25Naoia yufala i doti long fes blong mi, long ol aedol ya, mo long ol narafala samting ya we yufala i mekem. Be bambae mi tekem wota we i klin, mi saksakem i go long yufala blong mekem yufala i klin.

26Esik 11.19,20Bambae mi mekem laef blong yufala i kam niuwan. Bambae mi givim niufala tingting long yufala, blong yufala i stap mekem wosip long mi nomo. Bambae mi tekemaot ol rabis tingting blong yufala we i stap mekem yufala i stronghed, nao bambae mi givim gudfala tingting long yufala blong yufala i save obei long mi.

27Bambae mi putum Spirit blong mi i stap long yufala, mo bambae mi givhan long yufala blong yufala i folem ol loa blong mi, mo yufala i stap holem ol tok we mi mi givim long yufala.

28Nao bambae yufala i save stap gud long graon ya we mi givim long ol bubu blong yufala bifo. Mi bambae mi God blong yufala, mo yufala bambae i kam man blong mi bakegen.

29Mi bambae mi tekemaot yufala long ol fasin ya we oli stap mekem yufala i doti long fes blong mi, mi sevem yufala. Bambae mi mekem ol kakae blong yufala i kam plante we plante, we bambae yufala i no moa save sot long kakae.

30Bambae mi mekem ol tri oli karem frut we plante we plante, mo ol garen blong yufala tu bambae oli gat plante kakae, blong bambae yufala i no moa save hanggri bakegen. Nao long fasin ya, bambae yufala i no moa save sem long fes blong ol man blong ol narafala kantri.

31Mo bambae yufala i tingbaot bakegen ol rabis fasin ya blong yufala, mo ol samting nogud we yufala i bin mekem, nao bambae yufala i tingting nogud long yufala from ol sin ya we yufala i mekem.

32Yufala i mas save se bambae mi mekem ol samting ya, be i no from yufala. I gud yufala i harem nogud, yufala i sem from ol samting ya we yufala i mekem. Mi mi Hae God, mi Masta* blong yufala, mo hemia tok blong mi.

33“ ‘Taem mi tekemaot ol sin blong yufala, mi mekem yufala i klin, bambae mi letem yufala i go stap long ol taon ya blong yufala bakegen, nao yufala i save wokemgud olgeta bakegen.

34Olgeta man we oli pas long graon blong yufala, oli luk we graon ya oli stap nating nomo, bus i stap kavremap evri ples. Be bambae mi letem yufala i wokem ol garen blong yufala bakegen.

35Nao bambae ol man oli stap talem se, “Man. Ples ya bifo, bigfala bus. Be naoia, hem i kam olsem gudfala ples ya long Iden, we i gat ol gudgudfala samting i stap long hem. Mo ol taon ya, ol enemi oli bin brebrekemdaon olgeta bifo, oli bin stilim olting blong olgeta, mo oli bin livim olgeta i stap. Be naoia, ol man ples ya oli kam stap long ol taon ya bakegen, mo oli wokemgud ol stonwol blong olgeta bakegen.

36Nao bambae ol man long olgeta kantri raonabaot long yufala we oli no ded, bambae oli save se mi nao mi wokem ol taon ya bakegen, mo mi planem ol kakae long ol garen ya we bifo ol ples ya oli stap nating nomo. Mi mi Hae God, mo mi promes* finis se bambae mi mekem samting ya, mo bambae mi mas mekem olsem.

37“ ‘Mo bakegen, bambae mi save letem yufala i askem long mi blong mi givhan long yufala, blong yufala i kam plante we plante, olsem wan bigfala kampani blong ol sipsip.

38Bifo, oltaem, long taem blong lafet, Jerusalem* i fulap gud long ol sipsip we ol man oli karem i kam blong mekem sakrefaes long olgeta. Mo long sem fasin, ol taon ya we naoia oli nogud i stap, bambae oli kam fulap we fulap gud long yufala. Nao bambae yufala i savegud we mi mi Hae God.’ ”