Prija Sotfala stori blong buk ya - Bislama Bible Revised 2012

Sotfala stori blong buk yaBuk ya, TOK BLONG WAN MAN WE I STAP TINGBAOT LAEF, sotfala nem blong hem PRIJA, mo narafala nem blong hem bifo, Eklesiastis. Buk ya i karem ol tingting blong wan man bifo we i stap tingting plante long ol problem we yumi save faenem long laef blong yumi. Hem i luk we laef blong yumi i sot, mo oltaem ol naranarafala tingting oli stap pulum yumi long plante rod. Samtaem yumi save harem se ol samting blong wol ya oli stap mekem yumi harem nogud tumas, mo samtaem yumi save harem se yumi no kasem stret fasin. Nao man ya i luk se laef ya we yumi stap long hem i blong nating nomo. Hem i save we yumi stap long han blong God, be i no save wokemaot fasin we God i stap mekem long yumi. Stamba blong tingting blong hem, oltaem yumi mas wok strong, mo yumi mas glad long ol samting we God i stap givim long yumi, gogo laef blong yumi i finis.Samtaem tingting blong man ya i hevi tumas, from we i no luk rod we i save gotru, mo samtaem, sam man oli harem se tok blong hem i save spolem tingting blong yumi. Be yumi man blong wol ya, mo yumi stap faenem ol problem tu stret olsem we man ya i stap faenem. Mo taem tingting blong man ya i trabol, God i no lego hem, mo sipos yumi faenem laef i had, bambae hem i no save lego yumi tu. Oltaem hem i stap holem laef blong yumi, mo hem i wantem blong yumi trastem hem long hadtaem, olsem we yumi stap trastem hem long gudtaem. Hem i wantem we bambae yumi harem gud long ol samting we hem i stap givim long yumi, mo yumi folem ol tok blong hem oltaem long laef blong yumi.Ol haf blong buk yaTok blong openem buk ya 1.1-11

?Laef ya blong yumi, mining blong hem i olsem wanem? 1.12—2.26

Nating we laef blong yumi i gat ol problem,be God i givim laef long yumi,mo yumi mas glad long hem3.1—11.8

Laef blong yumi i sotfala,mo yumi mas harem gudlong ol gudgudfala samting blong hem 11.9—12.8

Yumi mas trastem God, mo yumi mas obei long hem 12.9-14