Sam 31 - Bislama Bible Revised 2012

Tok blong man we i trastem Hae God(Sing ya, Deved i wokem.)(Tok i go long Hae God.)

1Hae God.

Mi mi kam long yu

blong yu lukaot long mi.

Plis yu no letem ol enemi blong mi

oli winim mi.

Yu yu God we fasin blong yu i stret.

Mi mi prea long yu,

plis yu sevem mi.

2Naoia plis yu harem mi,

yu sevem mi.

Plis yu blokemgud mi,

yu kam olsem wan strong ples blong haed blong mi,

we mi mi save sef long hem.

3Yu nao yu sefples blong mi,

yu nomo yu strong ples blong mi blong haed.

Plis yu go fastaem, yu lidim mi,

from we yu nao yu sefples blong mi.

4Plis yu no letem mi mi foldaon long trap ya

we oli putumrere finis blong kasem mi.

Yu yu ples blong haed blong mi

we trabol i no save spolem mi.

5 Luk 23.46 Hae God,

mi mi putum laef blong mi

long han blong yu.

Mi save we yu bambae yu sevem mi,

from we yu yu God,

we oltaem, tingting blong yu

i stap strong long ol man blong yu.

6Olgeta ya

we oli stap mekem wosip long ol giaman god,

yu yu no laekem olgeta nating,

yu stap agens long olgeta,

be mi mi stap trastem yu oltaem.

7Bambae mi mi hapi,

mi glad tumas,

from fasin ya blong yu

we oltaem yu lavem man tumas.

Taem mi mi harem nogud,

be yu yu luk,

mo taem mi mi stap long trabol,

be yu yu save.

8Yu yu no letem ol enemi blong mi

oli holem mi,

yu mekem mi mi fri

blong go long weples

we mi wantem go long hem.

9Hae God,

plis yu sore long mi,

from we naoia,

mi mi stap long trabol.

Ae blong mi i solap

from we mi stap krae tumas,

bodi blong mi i slak we i slak,

mo tingting blong mi i kam nogud olgeta.

10Paoa blong mi i finis,

from we mi stap krae tumas.

Laef blong mi i kam sotfala,

from we oltaem mi stap harem nogud.

Mi mi kam slak olgeta from ol trabol blong mi,

mo paoa blong mi i finis olgeta.

11Ol enemi blong mi,

mo olgeta we oli stap klosap long mi,

oli no laekem mi,

oli stap lukluk nogud long mi.

Olgeta we oli savegud mi

be oli fraet long mi.

Taem oli luk mi long rod,

oli ronwe long mi.

12Olgeta evriwan oli fogetem mi

olsem we mi mi ded finis.

Mi mi kam olsem wan samting

we ol man oli sakem finis.

13Mi harem we ol enemi blong mi

oli stap tok smosmol agens long mi.

Nao long evri ples we mi pas long hem,

oli stap mekem mi mi fraet we mi fraet.

Oli stap mekem plan agens long mi,

blong kilim mi mi ded.

14Be Hae God, mi mi trastem yu.

Mi talem se, “Yu yu God blong mi.”

15Oltaem mi mi stap long han blong yu.

Plis yu tekemaot mi

long han blong ol enemi ya blong mi,

we oli stap spolem mi.

16Mi mi man blong wok blong yu.

Plis yu lukluk i kam long mi,

yu kaen long mi.

Fasin blong yu,

oltaem yu yu lavem man tumas,

plis yu sevem mi.

17Hae God,

mi mi singaot long yu.

Plis yu no letem ol enemi blong mi

oli mekem mi mi sem.

Olgeta ya oli man nogud,

i gud yu mekem olgeta oli sem.

I gud yu satem maot blong olgeta,

yu letem olgeta oli godaon

long Hom* blong ol Dedman.

18Olgeta ya oli praod tumas,

mo oli stap tok flas,

be oli man blong giaman nomo,

oli stap tok nogud long ol stret man.

Plis yu blokem maot blong olgeta

blong oli stap kwaet.

19!Hae God, yu yu gud tumas!

Long fes blong olgeta man long wol,

yu yu stap givim ol gudgudfala samting

long ol man we oli ona long yu

mo we oli luk long yu

blong yu sevem olgeta.

20Yu stap haedem ol man ya

oli stap gud long saed blong yu,

nao ol plan blong ol man nogud

oli no save spolem olgeta.

Yu stap haedem olgeta long sefples blong haed,

nao ol rabis tok blong ol enemi blong olgeta

i no save spolem olgeta.

21!Hae God, mi mi presem yu!

Taem ol enemi blong mi oli raonem mi,

oli faet long mi,

yu yu soemaot

we oltaem yu lavem mi tumas,

nao yu givhan long mi.

22Mi mi fraet,

mi ting se yu yu ronemaot mi finis

long fes blong yu.

Be taem mi krae i kam long yu

blong yu givhan long mi,

yu yu harem mi.

(Tok i go long ol man.)

23Yufala we tingting blong yufala

i stap strong long Hae God,

yufala i mas lavem hem.

Hae God i stap lukaot gud

long ol man

we tingting blong olgeta

i stap strong long hem,

hem i stap sevem olgeta.

Be ol praod man,

hem i stap panisimgud olgeta

long mak we i stret blong oli kasem.

24Yufala evriwan

we yufala i putum tingting blong yufala

i stap long Hae God,

yufala i mas strong.

Tingting blong yufala i mas stap strong oltaem.