Esikel 9 - Bislama Bible Revised 2012

Hae God i panisim ol man Jerusalem

1Nao long vison ya blong mi, mi harem we Hae God i singaot bigwan, i talem se, “Yufala we bambae i panisim ol man blong taon ya, yufala i karem ol samting blong faet blong yufala, yufala i kam.”

2Nao wantaem nomo sikis man i kamtru long doa blong stonwol long bigfala yad ya blong haos* blong Hae God long saed i go long not. Olgeta oli karem ol samting blong faet blong olgeta. Mo i gat wan man blong raetemdaon ol samting, we hem i werem gudfala klos we oli wokem long linen,* i kam wetem olgeta, mo hem i gat wan paos we i gat ol samting blong raet i stap long hem, i hang long strap blong hem. Olgeta ya evriwan oli kam stanap long saed blong olta ya we oli wokem long bras.

3Nao bigfala laet ya we i saen we i saen, we i soemaot we God blong yumi i stap, hem i aot long ol jerubim ya we i bin stap long hem, nao i muv i go long doa blong haos ya. Nao hem i talem long man ya blong raet se,

4Rev 7.3; 9.4; 14.1“Yu go long evri ples long taon ya, yu putum mak long fored blong olgeta man we oli trabol, oli stap harem nogud from ol samting nogud ya we ol narafala man ya oli stap mekem insaed long taon ya.”

5Nao mi harem we Hae God i talem long ol sikis man ya se, “Yufala i folem man ya i go long taon ya, yufala i mas kilim olgeta man i ded. Yufala i no sore long olgeta, yufala i no livim wan i stap.

6Ol olfala, mo ol yang man, mo ol yang woman, mo ol mama wetem ol pikinini blong olgeta, bambae yufala i kilim olgeta evriwan i ded. Be olgeta ya we oli gat mak long fored blong olgeta, bambae yufala i no kilim olgeta. Bambae yufala i stat blong kilim ol man long tabu haos ya blong mi.” Nao oli stat long ples ya, oli kilim ol lida we oli stap stanap klosap long doa blong Rum ya we i Tabu.

7Nao Hae God i talem long olgeta se, “!Yufala i gohed! Yufala i mas mekem haos ya blong mi i no moa tabu long fes blong mi. Yufala i fulumap ol yad blong hem long ol dedbodi blong ol man ya, mo yufala i goaot blong kilim olgeta.” Nao olgeta oli gohed oli kilim olgeta man long taon ya.

8Nao taem oli gohed oli stap kilim ol man ya, mi mi stap stanap mi wan long ples ya. Nao mi harem nogud, mi foldaon we fes blong mi i godaon long graon, mi singaot bigwan se, “?Hae God, Masta* blong mi, olsem wanem? Yu yu kros tumas long ol man Jerusalem,* mo bambae yu kilim olgeta man oli ded. ?Be bambae yu kilim ol laen* blong Isrel* evriwan oli ded?”

9Nao hem i talem long mi se, “Ol laen blong Isrel oli mekem plante samting we i nogud we i nogud, we oli mas kasem panis from. Oli kilim man long evri ples long kantri ya, mo oli mekem Jerusalem i fulap long ol fasin nogud. Oli stap mekem olsem from we oli talem se mi mi lego kantri blong yufala finis, mo mi no save luk olgeta.

10Be mi no save gat sore long olgeta, mi no save sevem olgeta, mo ol samting we oli bin mekem long ol narafala man, mi bambae mi givimbak sem samting long olgeta.”

11Nao man ya blong raet i kambak long Hae God i talem se, “Olgeta samting ya we yu yu talem, mi mi mekem finis.”