Jeremaea 35 - Bislama Bible Revised 2012

Profet Jeremaea i givim waen long ol man we oli laen blong Rekab

1 we i pikinini blong King Josaea i king long Juda,* Hae God i talem long Profet Jeremaea se,

2“Jeremaea. Yu go luk ol laen blong Rekab, yu toktok wetem olgeta, mo yu tekem olgeta i kam long wan rum long haos blong mi, yu i givim sam waen long olgeta.”

3Nao profet i go tekem olgeta ya i kam. Olgeta ya, i gat Jahasania wetem olgeta brata blong hem, mo ol pikinini blong hem. Jahasania ya, papa blong hem narafala Jeremaea, mo bubu blong hem Habasinia.

4Nao profet i tekem olgeta evriwan i go long haos* blong Hae God, long wan rum antap we i blong ol man blong Profet Hanan, we papa blong hem Jigdalia. Rum ya i klosap long rum blong ol haeman blong haos ya, mo i stap stret antap long rum blong Mahasea we i wan nambawan haeman blong haos ya, we papa blong hem Salum.

5Nao hem i fulumap waen long ol bol glas, mo ol pankin, i kam putum long fes blong olgeta, mo i talem long olgeta se, “Yufala i dring smol waen ya.”

6Be oli talem se, “Sore, be mifala i no save dring waen. Olfala bubu ya blong mifala Jonadab we i pikinini blong Rekab, hem i blokem mifala wetem ol pikinini blong mifala, se i tabu blong mifala i dring waen.

7Hem i blokem mifala tu, se i tabu blong mifala i wokem haos blong mifala, mo blong mifala i wokem garen, mo blong mifala i planem ol rop ya grep,* mo i tabu blong mifala i pem ol plantesen blong grep tu. Hem i talem se bambae mifala i stap olsem strenja nomo long kantri ya, mo oltaem, mifala i mas slip long ol haos tapolen nomo. Hem i talem se sipos mifala i mekem olsem, bambae mifala i stap oltaem long kantri ya.

8Olgeta tok ya we olfala ya i givim long mifala, be mifala i obei long hem evriwan. Mifala ya, i tabu blong mifala i dring waen, mo ol woman blong mifala wetem ol pikinini blong mifala tu, i tabu blong oli dring.

9-10I tabu blong mifala i wokem haos, blong mifala i slip long hem, mifala i stap slip long haos tapolen nomo. Mifala i no gat graon blong mifala, mifala i no planem kakae, mo mifala i no gat plantesen blong grep. Mifala i stap obei gud long olgeta samting we olfala ya blong mifala i talem long mifala bifo.

11Be taem King Nebukadnesa wetem ol man blong hem mo ol soldia blong Siria oli kam insaed long kantri ya, mifala i luk se mifala i mas ronwe long olgeta, nao mifala i kam haed long Jerusalem.* From samting ya nao, mifala i stap yet long ples ya.”

12Nao Hae God i toktok long Profet Jeremaea bakegen,

13mo profet ya i talem se, “Olgeta. Yumi ol laen* blong Isrel,* mo Hae God ya we i gat olgeta paoa, hem i God blong yumi, mo hem i talem long mi se, ‘Jeremaea. Yu go talem long ol man Jerusalem mo ol narafala man Juda we mi mi talem se, “Olgeta. Mi mi Hae God, mo mi talem stret long yufala. ?Weswe yufala i no wantem lesin long ol tok blong mi?

14Olgeta ya we oli kamaot biaen long Jonadab ya bifo oli stap obei long tok blong bubu ya blong olgeta. Bifo finis, hem i blokem olgeta, se bambae oli no dring waen, mo kam kasem naoia, i no gat wan long olgeta we i save dring waen. Be yufala, oltaem mi mi stap tok long yufala, be yufala i no save obei long mi nating.

15Ol profet oli man blong wok blong mi, mo oltaem mi stap sanem olgeta i kam long yufala, blong talemaot tok blong mi. Olgeta oli stap talem long yufala, se yufala i mas lego ol fasin nogud blong yufala, yufala i mas mekem ol fasin we i stret, mo oli stap blokem yufala, se yufala i no mas mekem wosip long ol narafala god. Oli stap talem se sipos yufala i stap obei long ol tok ya, bambae yufala i save stap longtaem long kantri ya we mi mi givim long ol bubu blong yufala bifo. Be yufala i no save lesin long tok blong mi nating, mo yufala i no save mekem ol samting ya we mi mi talem.

16Ol laen blong Jonadab ya bifo, oli obei gud long ol tok ya we hem i talem, be yufala, yufala i no obei nating long ol tok ya blong mi.

17Mi mi God blong yufala, mo mi gat olgeta paoa, mo mi promes long yufala finis, se sipos yufala i no lesin long mi, bambae mi letem bigfala trabol i kam spolem ples ya blong yufala. Be taem mi mi toktok long yufala, yufala i no save lesin, mo taem mi singaot long yufala, yufala i no save harem. Nao from samting ya, bambae mi letem olgeta trabol ya i kam kasem yufala.” ’ ”

18-19Nao profet ya i talemaot long ol laen blong Rekab we Hae God i talem se, “Olgeta. Mi mi Hae God, mi God blong ol laen blong Isrel, mo mi mi gat olgeta paoa. Yufala i stap obei gud long tok blong olfala Jonadab ya bifo, mo yufala i stap mekem evri samting we hem i talem long yufala. From samting ya, mi mi promes naoia, se oltaem nomo, bambae i gat wan man long yufala ya we i laen blong hem, we bambae i stap stanap insaed long haos blong mi, blong mekem wok blong mi.”