1Nao taem King Rehoboam i kam kasem Jerusalem,* hem i singaot wan handred eiti taosen nambawan soldia blong hem, blong go mekem faet long olgeta long not, blong mekem olgeta oli kam man blong hem bakegen. Ol soldia ya, haf oli laen* blong Benjamin,* mo haf oli laen blong Juda.*
2Be Hae God i givim tok blong hem long Profet Semaea,
3blong i go talemaot long king wetem ol man ya blong hem.
4Nao profet ya i kam talemaot se, “!Olgeta! Hae God i talem se olgeta ya blong not oli brata blong yumi nomo. Yumi no save go mekem faet long olgeta. Yumi evriwan i mas gohom, from we hem nomo i mekem samting ya i kamtru olsem.” Nao olgeta oli no go mekem faet long King Jeroboam, oli obei long tok ya blong Hae God, oli gohom bakegen.
King Rehoboam i wokem ol stonwol i goraon long ol taon5Nao King Rehoboam i stap long Jerusalem,* i stap wokem ol bigfala stonwol i goraon long ol taon long distrik ya Juda* mo long distrik ya Benjamin.*
6Nem blong ol taon ya, i gat Betlehem, mo Etam, mo Tekoa,
7mo Betsuru, mo Soko, mo Adulam,
8mo Gat, mo Maresa, mo Sif,
9mo Adoraem, mo Lakis, mo Aseka,
10mo Jora, mo Aealon mo Hebron.
11Hem i wokem ol bigfala stonwol i goraon long ol taon ya, mo i putumap ol komanda blong hem wanwan long olgeta blong oli lukaot long olgeta. Mo long ol taon ya evriwan, hem i putum ol kakae, mo ol olifoel,* mo ol waen,
12mo ol sil* mo ol spia. Nao long fasin ya, hem i holem tufala distrik ya Juda mo Benjamin we hem i stap rul long tufala, tufala i stap gud.
Ol pris mo ol Livaet oli kam long Juda13Nao ol pris mo ol Livaet* we oli stap olbaot long kantri ya Isrel* long not, oli aot, oli kam long kantri Juda* long saot.
14Olgeta oli livim ol graon blong olgeta we oli gat ples blong mekem garen mo ples blong putum ol anamol blong olgeta, nao oli kam stap long Jerusalem,* mo long ol narafala ples long Juda, from we King Jeroboam blong Isrel mo olgeta we oli tekem ples blong hem oli no letem olgeta oli mekem wok blong Hae God.
151 King 12.31King Jeroboam ya i putumap ol pris blong hem blong oli wok long ol ples blong mekem wosip long ol narafala god, nao olgeta ya oli stap mekem wosip long ol devel we oli olsem man nani, mo long ol aedol ya we hem i wokem, we oli pija blong bul.
16Be Hae God i God blong ol laen* blong Isrel, mo olgeta long not we oli laen blong Isrel we oli wantem mekem wosip long Hae God oli folem ol laen ya blong Livae,* oli kam long Jerusalem, blong bambae oli save mekem sakrefaes long hem.
17Samting ya i mekem kantri ya Juda i stap kam strong moa. Olgeta oli stap givhan gud long King Rehoboam go kasem tri yia, mo oli stap mekem ol samting long hem, stret olsem we oli stap mekem bifo long papa blong hem King Solomon mo long bubu blong hem King Deved.
Famle blong King Rehoboam18King Rehoboam, i tekem Mahalat i kam woman blong hem. Papa blong woman ya Jerimot, we i pikinini blong King Deved, mo mama blong hem Abihael, we papa blong hem Eliab mo bubu blong hem Jese.
19Tufala i gat tri pikinini boe blong tufala, we nem blong trifala, Jehus, mo Semaria mo Saham.
20Biaen, king i tekem Mahaka, we bubu blong hem Absalom, i kam namba tu woman blong hem, mo tufala i gat fo pikinini boe blong tufala, we nem blong olgeta Abia, mo Atae, mo Sisaha, mo Selomit.
21King ya i gat eitin woman blong hem, mo i gat sikisti narafala woman blong hem tu. Ol pikinini blong hem evriwan, i gat twanti eit boe mo sikisti gel. Be hem i lavem Mahaka moa, i winim ol narafala woman blong hem.
22Mo hem i lavem Abia moa, we woman ya i bonem, i winim ol narafala pikinini blong hem, mo i jusumaot hem blong bambae hem nao i tekem ples blong hem i kam king.
23King ya i waes, nao hem i stap putumap ol pikinini boe ya blong hem oli holem ol wok olbaot long tufala distrik ya blong hem, Juda* mo Benjamin,* long ol taon ya we oli gat ol bigfala stonwol i goraon long olgeta. Oltaem hem i stap givim plante samting long olgeta long gladhat blong hem, mo i stap tekem plante woman tu i kam, i givim long olgeta blong oli mared long olgeta.
Who We AreWhat We EelieveWhat We Do
2025 by iamachristian.org,Inc All rights reserved.
