Esikel 31 - Bislama Bible Revised 2012

Ijip i olsem wan sida blong Lebanon

1Long namba leven yia we yumi stap wok slef* long Babilonia, long namba tri manis,* long fas dei blong hem, Hae God i toktok long mi long wan vison bakegen,

2i talem se, “Man blong wol ya. Yu talem long king blong Ijip wetem olgeta man blong hem we mi mi talem se,

‘!Yufala i gat paoa!

I no gat man nating

we i strong olsem yufala.

3Yufala i olsem wan sida* blong Lebanon

we ol han blong hem i gud we i gud,

mo sed blong hem i gud tumas.

Tri ya i longfala we i longfala,

i go antap kasem ol klaod.

4I gat wota blong mekem hem i gru,

mo ol reva we oli stap ron aninit long graon

oli givim kakae long hem.

Ol reva ya oli mekem

ples we tri ya i stap gru long hem

i gat wota,

mo oli mekem ol smosmol reva

oli go long ol tri olbaot long bus.

5From we i gat wota olsem,

tri ya i gru longfala i go antap

i winim ol narafala tri.

Ol han blong hem oli bigbigwan,

mo oli longlongfala tu.

6Ol defdefren pijin

oli stap mekem nes blong olgeta

long ol han blong hem,

mo ol anamol blong bus

oli stap haed aninit long hem

blong oli karem pikinini.

Ol man blong olgeta kantri long wol

oli stap haed long sed blong hem.

7Tri ya i naes we i naes,

mo i longfala, i go antap we antap,

mo ol rus blong hem i godaon

kasem wota aninit long graon.

8 ,

long gudfala ples ya blong mi,

i no gat wan sida nating

we i sem mak olsem hem.

I no gat wan paentri* samtaem

we ol han blong hem i olsem,

mo i no gat wan plentri* tu

we ol han blong hem i olsem.

I no gat wan tri nating

long gudfala ples ya blong mi

we i naes olsem hem.

9Mi mi mekem hem i naes we i naes,

we i pusumaot

ol han blong hem i go longwe.

Olgeta tri long Iden

oli stap jalus long hem,

from we hem i naes tumas.’ ”

10Hae God i Masta* blong yumi, mo hem i talem long mi se, “Ol samting we bambae i kamtru long sida ya we i longfala i go antap i kasem ol klaod i olsem. From we hem i longfala olsem, hem i stap flas we i flas tumas.

11Mo from samting ya, mi tanem baksaed finis long hem, mo bambae mi putum hem long han blong king ya blong olgeta kantri. Nao king ya bambae i panisim hem long mak we i stret blong hem i kasem from ol fasin nogud ya blong hem.

12Mo ol man blong ol narafala kantri we oli no gat sore nating, bambae oli katemdaon tri ya, nao oli livim i stap. Bambae ol bigbigfala han blong hem wetem ol smosmol han oli folfoldaon long olgeta hil blong kantri ya, mo long olgeta bigbigfala krik blong hem, mo ol man blong ol narafala kantri we oli stap haed long sed blong hem, bambae oli ronwe long hem.

13Ol pijin bambae oli kam sidaon long tri ya we i foldaon finis, mo ol anamol blong bus bambae oli stap purumbut antap long ol han blong hem.

14Mo i stat long taem ya, nating we ol tri i gat gudfala wota blong mekem i gru, be bambae i no moa gat wan i save gru longfala bakegen olsem, we top blong hem i kasem ol klaod. Bambae olgeta evriwan i ded olsem man. Bambae oli go joen wetem ol dedman long hom blong olgeta.

15“Long dei ya we tri ya i godaon long Hom* blong ol Dedman, bambae mi blokem ol reva oli no moa ron, mo bambae ol wota we oli stap aninit long graon oli sore long hem, oli kam kavremap hem. Nao from we tri ya i ded finis, bambae mi mekem tudak i kavremap ol hil ya blong Lebanon, mo bambae mi mekem olgeta tri long bus oli drae evriwan.

16Taem mi sanem tri ya i godaon long Hom blong ol Dedman, noes blong hem we i foldaon bambae i mekem olgeta kantri oli seksek. Mo olgeta tri blong ples ya Iden, mo olgeta tri ya blong Lebanon we oli beswan, we bifo oli gat wota blong mekem olgeta oli gru gud, be oli ded, oli godaon finis long Hom blong ol Dedman, bambae oli glad tumas from we hem i foldaon.

17Mo ol man ya blong ol narafala kantri we bifo oli stap haed long sed blong hem, olgeta ya tu bambae oli ded, oli go long Hom blong ol Dedman, blong stap wetem ol man we oli ded long faet.

18“Tri ya, hem i king blong Ijip wetem olgeta man blong hem. Olgeta tri ya blong Iden, be i no gat wan we i longfala i go antap, mo i naes olsem hem. Be naoia, hem tu i olsem ol tri ya, bambae hem i godaon long Hom blong ol Dedman blong stap wetem ol man we oli no save God nating, mo olgeta we oli ded long faet. Mi mi Hae God, mi Masta blong yufala, mo hemia tok blong mi.”