2 King Sotfala stori blong buk ya - Bislama Bible Revised 2012

Sotfala stori blong buk yaBuk ya, SEKEN BUK BLONG OL STORI BLONG OL KING BLONG ISREL, we sotfala nem blong hem SEKEN KING, i stat long ples we buk ya FAS KING i finis long hem mo i gohed long stori blong ol man Isrel* long not mo ol man Juda* long saot we oli seraot finis long tu haf, mo tufala wanwan i gat king. Yumi save seraot buk ya long tu haf.1. Stori blong ol man Isrel long not mo ol man Juda long saot i stat samwe long eit handred fifti yia blong kam kasem taem we Kraes* i bon. Mo stori i gohed i kam kasem taem we ol enemi oli winim Sameria,* kaptel blong ol man Isrel long not, nao olgeta ya oli no moa gat king blong olgeta. Long taem ya i gat seven handred twanti wan yia blong kam kasem taem we Kraes i bon.2. Stori i gohed blong tokbaot rul blong ol king blong Juda, i stat long taem ya we ol enemi oli kam spolemgud Sameria, i go kasem taem we King Nebukadnesa blong Babilonia i kam spolemgud Jerusalem* long faef handred eiti sikis yia blong kam kasem taem we Kraes i bon. Buk ya i finis wetem tu stori. I gat stori blong Gedalia we i gavman blong Juda we i stap aninit long paoa blong ol man Babilonia, mo ripot blong King Jehoeakin we oli tekemaot hem long kalabus long Babilon.Ol man Isrel mo ol man Juda oli kasem ol bigbigfala trabol from we ol king blong olgeta mo ol man tu oli no putum tingting blong olgeta i stap strong long God, mo oli no obei long hem.Taem ol enemi oli kam winim Jerusalem, oli karem plante man Juda oli go wok slef* long Babilonia, nao laef blong ol laen* blong Isrel i jenis, i kam narafala olgeta.Wan nambawan profet we stori blong hem i kamaot bigwan long buk ya, Profet Elisa we hem i tekem ples blong Profet Elaeja.Ol stori we i stap long buk yaStori blong ol man Isrel long not mo ol manJuda long saot 1.1—17.41

Profet Elisa 1.1—8.15

Ol king blong Juda mo ol king blong Isrel 8.16—17.4

Ol enemi oli kam winim Sameria 17.5-41

Stori blong laef blong ol king blong Juda taem i no moa gat king long Isrel long not 18.1—24.20

Laef blong ol king blong Juda go kasem King Josaea 18.1—21.26

Laef blong King Josaea 22.1—23.30

Laef blong ol narafala king blong Juda 23.31—24.20

Ol enemi oli kam winim Jerusalem 25.1-30