1Nao Hae God i givim tok blong hem long Moses
2blong i go talemaot long ol laen* blong Isrel.* Hem i talem se, “Sipos wan long yufala i mekem wan promes long mi, se bambae i putum hem no wan pikinini blong hem long han blong mi blong mekem wok blong mi, nao biaen i wantem we hem no pikinini ya i go fri bakegen, i gat rod blong hem i stap. Sipos man i wantem mekem rod blong wan man i go fri long promes olsem, hem i save pemaot hem long sem mane we oli stap yusum oltaem blong pem ol samting long ples blong mekem wosip, mo praes we i mas pem i olsem.
3Sipos man we i wantem go fri i gat twanti yia blong hem, no ova long twanti yia go kasem sikisti yia, bambae hem i mas pem twanti faef taosen vatu.*
4Mo sipos wan woman olsem i wantem go fri, bambae hem i mas pem fiftin taosen vatu.
5Mo sipos boe we i wantem go fri i gat faef yia blong hem no ova long faef yia go kasem twanti yia, bambae hem i mas pem ten taosen vatu. Mo sipos wan gel olsem i wantem go fri, bambae hem i mas pem faef taosen vatu.
6Mo sipos wan man i wantem pemaot smol pikinini boe we i gat wan manis go kasem faef yia blong hem, bambae hem i mas pem tu taosen faef handred vatu. Mo sipos i wantem pemaot smol pikinini gel olsem, bambae i mas pem wan taosen faef handred vatu.
7Mo sipos man we i wantem go fri i gat ova long sikisti yia blong hem, bambae hem i mas pem seven taosen faef handred vatu. Mo sipos woman olsem i wantem go fri, bambae hem i mas pem faef taosen vatu.
8Sipos man we i mekem promes olsem i pua tumas, i no save pem ful praes ya, bambae hem i mas tekem man ya we promes i tokbaot i kam long pris, nao pris bambae i save putum wan praes we i daon, stret long mak we man ya i save pem.
9“Sipos wan man i mekem wan promes olsem long mi, se bambae i givim wan anamol long mi we i stret blong yusum blong mekem sakrefaes long mi, anamol ya bambae i tabu, i blong mi, nao man ya i no save pemaot bakegen.
10Mo man we i mekem promes olsem i no save jenisim anamol ya biaen blong givim narawan. Hem i no save givim gudfala anamol blong jenisim rabis wan, mo i no save givim rabis anamol blong jenisim gudwan. Sipos hem i traem blong mekem olsem, bambae tufala anamol ya evriwan i blong mi.
11Be sipos man i mekem wan promes olsem, se bambae i givim wan anamol long mi we i no stret blong yusum blong mekem sakrefaes long mi, be biaen i wantem pemaot anamol ya bakegen, bambae hem i mas tekem anamol ya i kam long pris blong i putum praes blong hem.
12Nao pris bambae i mas lukluk gud long anamol ya blong makem se i gud no i nogud, mo hem i mas putum praes blong hem, mo biaen, bambae i no moa gat tok.
13Mo sipos man ya i wantem pemaot anamol ya bakegen, hem i mas pem long ful praes ya blong hem, wetem smol faen antap. Mo fasin blong makem faen ya i olsem. Sipos praes blong anamol ya i faef taosen vatu, bambae hem i mas pem wan taosen vatu antap bakegen.
14“Mo sipos wan man i mekem wan promes olsem blong givim haos blong hem long mi, mo biaen i wantem pemaot bakegen, pris bambae i mas putum praes blong haos ya. Bambae hem i mas lukluk gud long haos ya blong makem se i gud no i nogud, nao hem i mas putum praes blong hem, mo biaen, bambae i no moa gat tok.
15Mo sipos man ya i wantem pemaot haos ya bakegen, hem i mas pem long ful praes blong hem wetem smol faen antap. Mo fasin blong makem faen ya, bambae i folem rul blong faen blong anamol ya.
16“Mo sipos wan man i mekem wan promes olsem blong givim wan pis graon we i karem long papa blong hem i kam long mi, mo biaen i wantem pemaot bakegen, bambae hem i mas wokemaot praes blong hem long ol kakae blong bale* we oli save planem long hem. Fasin blong makem praes ya, graon we i naf blong oli planem twanti kilo bale long hem, praes blong hem faef taosen vatu.
17Sipos man i mekem promes blong givim graon olsem i kam long mi stret biaen long Yia blong Givimbak ol Samting, praes blong graon ya bambae i mas stap long ful praes blong hem.
18Be sipos hem i mekem promes olsem biaen olgeta, bambae pris i mas makem hamas yia i stap yet blong go kasem long Yia blong Givimbak ol Samting, nao bambae i mas katem praes ya i godaon.
19Mo sipos man we i mekem promes olsem i wantem pemaot graon ya bakegen, bambae hem i mas pem long stret praes blong hem, wetem smol faen antap bakegen. Mo fasin blong makem faen ya, bambae i folem rul blong faen blong ol narafala samting ya.
20Be sipos hem i no pemaot graon ya yet long mi, nao i girap, i go salem long wan narafala man, bambae hem i lusum raet blong hem blong pemaot.
21Nao long Yia blong Givimbak ol Samting, graon ya bambae i kam tabu, i blong mi olwe gogo i no save finis, mo ol pris nomo bambae oli save yusum.
22“Mo sipos wan man i pem wan pis graon blong narafala man, mo biaen i mekem promes olsem blong givim pis graon ya i kam long mi, nao biaen bakegen i wantem pemaot pis graon ya long mi,
23bambae pris i mas wokemaot praes blong hem stret long hamas yia i stap blong go kasem long Yia blong Givimbak ol Samting, nao man ya i mas pemaot long praes ya long sem dei ya nomo. Mo mane blong hem bambae i blong mi nomo.
24Nao long Yia blong Givimbak ol Samting, graon ya bambae i save gobak long man we i blong hem fastaem, no long ol pikinini blong hem, no long olgeta we bambae oli stap kamaot biaen long hem.
25“Man we i wantem pemaot wan man no wan samting i go fri long promes olsem, hem i mas pemaot long sem mane we oli stap yusum oltaem long ples blong mekem wosip, mo praes we i pem i mas praes we pris i putum.
26“Oltaem, ol fasbon pikinini blong ol anamol blong yufala oli blong mi, mo bambae i no gat man i save mekem promes olsem blong givim wan long olgeta i kam long mi. Ol fasbon buluk wetem ol fasbon sipsip mo ol fasbon nani, olgeta evriwan i blong mi finis.
27Be ol fasbon blong ol anamol we i no stret blong yusum blong mekem sakrefaes long mi, bambae man i save pemaot bakegen long ful praes blong hem wetem smol faen antap bakegen. Mo fasin blong makem faen ya, bambae i folem rul blong faen blong ol narafala samting ya. Be sipos man ya i no wantem pemaot long mi, ol pris bambae oli mas salemaot long narafala man long ful praes blong hem.
28 Nam 18.14 “Be sipos wan man i makemaot wan pikinini blong hem, no wan anamol blong hem, no wan pis graon we i karem long papa blong hem blong givim i kam long mi se i blong mi olgeta, bambae hem i no save go salem long narafala man blong i yusum, mo i no save kam pemaot long mi bakegen blong i karem bakegen se i blong hem. Samting we man i givim i kam long mi olsem, hem i tabu, i blong mi olwe.
29Nating sipos hem i makemaot wan man blong givim i kam long mi se i blong mi olgeta, be bambae i no gat rod blong pemaot hem i go fri. Bambae man ya i mas kilim hem i ded.
30 Nam 18.21; Dut 14.22-29 “Mo ol kakae blong garen* blong yufala, nating we yufala i tekem long graon, no long rop, no long tri, be oltaem, bambae yufala i mas givim taet* blong hem i kam long mi. Mo taet ya i tabu, i blong mi.
31Mo sipos wan man i wantem pemaot wan samting long taet ya, bambae hem i mas pem long stret praes blong hem, wetem smol faen antap bakegen. Mo fasin blong makem faen ya, bambae i folem rul blong faen blong ol narafala samting ya.
32Mo evri yia, taem man i kaontem ol anamol blong hem, bambae evri namba ten anamol blong hem i blong mi. Bambae yufala i mas mekem olsem long evrikaen anamol we yufala i gat.
33Mo taem yufala i stap kaontem olgeta, blong givim taet blong yufala i kam long mi, evri namba ten anamol i blong mi, nating we i gud no i nogud. Mo bambae yufala i no mas jenisim ol anamol ya biaen blong givim ol narawan i kam long mi. Mo sipos wan man i tekem wan anamol i kam blong traem jenisim narawan, bambae tufala evriwan i blong mi, mo man ya i no moa save pemaot bakegen.”
34Hemia nao ol loa we Hae God i givim long Moses antap long hil ya Sinae blong i givim long ol laen blong Isrel, blong oli folem.
Who We AreWhat We EelieveWhat We Do
2025 by iamachristian.org,Inc All rights reserved.
