Esikel 14 - Bislama Bible Revised 2012

God i tok agens long fasin blong mekem wosip long aedol

1Nao i gat sam lida blong ol laen* blong Isrel* oli kam sidaon long fes blong mi blong faenemaot tingting blong Hae God we i Masta* blong yumi.

2Be hem i talem long mi se,

3“Man blong wol ya. Ol man ya oli givim laef blong olgeta finis long ol aedol, mo ol aedol ya oli lidim olgeta oli foldaon long sin. Olgeta oli no gat raet nating blong kam blong traem faenemaot sam samting long mi.

4“Nao from samting ya, yu mas talemaot long olgeta we mi mi talem se, ‘Ol laen blong Isrel. Yufala i stap givim laef blong yufala long ol aedol, mo yufala i letem ol aedol ya oli lidim yufala i foldaon long sin. Be sipos yufala i kam luk wan profet blong mi blong faenemaot wan samting, mi bambae mi givim ansa long yufala. Ansa ya bambae i stret blong yufala i kasem, from we yufala i stap mekem wosip long plante aedol.

5Be long ansa ya blong mi, mi wantem tanem tingting blong yufala blong yufala i kambak long mi, yufala i putum tingting blong yufala i stap strong long mi bakegen.’

6“Nao from samting ya, yu mas talemaot long olgeta ya we mi mi talem se, ‘Yufala i mas tanem tingting blong yufala, yufala i mas lego olgeta aedol ya blong yufala, mo yufala i mas tanem baksaed long olgeta. Ol aedol ya oli nogud we i nogud long fes blong mi.

7“ ‘Sipos wan long yufala, no wan man blong narafala kantri we i stap wetem yufala, i tanem baksaed long mi, nao i mekem wosip long ol aedol, nao biaen i kam luk wan profet blong faenemaot wan samting long mi, mi bambae mi givim ansa long hem

8blong meksave hem. Long fasin ya, bambae mi mekem hem i kam wan saen blong wonem yufala evriwan. Bambae mi tekemaot hem i gowe long yufala, blong bambae yufala i savegud we mi mi Hae God.

9“ ‘Sipos ol man oli trikim wan profet, nao hem i giaman, i givim ansa long olgeta, be hemia from we mi nao mi mekem i kamtru olsem. Mo bambae mi tekemaot hem long yufala, mi kilim hem i ded.

10Bambae profet ya wetem man ya we i go luk hem blong faenemaot wan samting long hem, tufala tugeta bambae i kasem sem panis.

11Bambae mi mekem olsem blong yufala i no lego mi, mo blong yufala i no moa mekem ol samting nogud bakegen blong mekem yufala i doti long fes blong mi. Mi wantem we yufala i man blong mi nomo, mo mi nomo mi God blong yufala. Mi mi Hae God, mi Masta blong yufala, mo hemia tok blong mi.’ ”

Hae God bambae i panisim olgeta man nogud

12Nao Hae God i talem long mi se,

13“Man blong wol ya. Sipos ol man blong wan kantri oli mekem sin agens long mi we tingting blong olgeta i no moa stap strong long mi, mi bambae mi leftemap han blong mi, mi spolem ol kakae blong olgeta. Bambae mi mekem olgeta oli kasem wan hadtaem we oli sot long kakae, mo bambae oli hanggri gogo oli ded, mo ol anamol blong olgeta tu bambae oli ded.

14Nating we sipos trifala man ya, Noa mo Daniel mo Job, trifala i stap long taem ya, be gudfala fasin blong trifala bambae i sevem laef blong trifala nomo. Mi mi Hae God, mi Masta* blong yufala, mo hemia tok blong mi.

15-16“Sipos mi sanem ol wael anamol oli kam blong kilim olgeta, mo olbaot long kantri ya, ol man oli no save pas long hem, from we oli fraet long ol wael anamol ya, bambae kantri ya i stap nating nomo. Mi mi Hae God, mi Masta blong yufala, mo mi laef, mi stap we mi stap. Mo naoia, mi mi promes long nem blong mi, se nating we sipos trifala man ya i stap long ples ya, be bambae trifala i no save sevem wan man nating, trifala i save sevem laef blong trifala nomo. Mo sipos ol pikinini blong trifala i stap, be bambae trifala i no save sevem olgeta tu.

17“Mo sipos mi tekem faet i kam long kantri ya, mo ol enemi oli kilim olgeta man mo olgeta anamol evriwan i ded, bambae kantri ya i stap nating nomo.

18Mo mi mi promes long nem blong mi, se nating we sipos trifala ya i stap long ples ya, be bambae trifala i no save sevem wan man nating, trifala i save sevem laef blong trifala nomo. Mo sipos ol pikinini blong trifala i stap, be bambae trifala i no save sevem olgeta tu.

19“Mo sipos mi sanem wan rabis sik i kam kavremap kantri ya, nao sik ya i kilim olgeta man mo olgeta anamol oli ded from we mi mi kros tumas, bambae kantri ya i stap nating nomo.

20Mo mi mi promes long nem blong mi, se nating we sipos trifala ya i stap long ples ya, be bambae trifala i no save sevem wan man nating, stret fasin blong trifala i save sevem laef blong trifala nomo. Mo sipos ol pikinini blong trifala i stap, be bambae trifala i no save sevem olgeta tu.”

21 Rev 6.8 Hae God i Masta blong yumi, mo hem i talem se, “Ol laen* blong Isrel.* I gat fo panis we oli nogud we i nogud we mi bambae mi sanem i kam long Jerusalem.* Ol panis ya, i gat faet, mo hadtaem we ol man bambae oli sot long kakae, mo ol wael anamol we bambae oli kilim ol man, mo rabis sik we bambae ol man oli ded from. Bambae mi sanem ol fo samting ya blong kilim olgeta man mo olgeta anamol oli ded.

22Sipos sam man oli stap laef, mo oli sevem ol pikinini blong olgeta, nao oli kam luk yufala long ples ya we yufala i stap wok slef* long hem, i gud yufala i luklukgud fasin blong olgeta. Bambae yufala i save luk we olgeta oli man nogud tru, nao bambae yufala i bilif se panis we mi stap givim long Jerusalem i stret nomo blong hem i kasem.

23Nao bambae yufala i save luksave se olgeta samting we mi mi mekem, mi mekem from ol rabis fasin ya blong olgeta, mo i stret nomo blong mi mekem olsem. Mi mi Hae God, mi Masta blong yufala, mo hemia tok blong mi.”