Prija 8 - Bislama Bible Revised 2012

1“Man we i waes, hem nomo i save mining blong ol samting. Waes ya i mekem we hem i no moa save mekem fes blong hem i strong long ol narafala man, oltaem hem i glad blong luk olgeta.

Yumi mas obei long king

2“Yu mas mekem ol samting we king i talem, from we yu yu promes* long God blong mekem olsem.

3Be i nogud yu stap klosap long hem oltaem, i moa gud yu gowe long hem, from we taem hem i kros, hem i save mekem wanem samting we hem i wantem.

4King i gat raet blong mekem ol samting we hem i wantem mekem, mo i no gat man i save tok long hem, se from wanem hem i mekem ol samting ya.

5Sipos yu obei long ol tok blong hem, bambae yu save stap gud. Man we i waes, hem bambae i savegud prapa rod blong mekem olsem, mo stret taem blong mekem.

6I gat stret taem mo stret fasin blong wokem evri samting, be yumi save smol nomo.

7I no gat wan long yumi we i save wanem samting bambae i kamtru, mo i no gat wan man we i save talemaot ol samting olsem long yumi.

8I no gat wan man we i save holem hem i stap blong i no ded, mo i no gat man we i save seftem dei blong ded blong hem. Hemia i wan faet we yumi no save ronwe long hem. Yumi no save giaman long ded blong i no kam long yumi.

Man nogud mo stret man

9“Long wol ya, sam man oli gat paoa, mo ol narafala man oli stap aninit long olgeta, oli stap harem nogud, mo taem mi stap tingbaot ol samting we oli stap kamtru long wol ya, mi luk ol fasin ya we mi stap tokbaot.

10Wan fasin we mi mi luk i olsem. Taem man nogud i ded, ol man ples blong hem oli go berem hem long beregraon, mo taem oli stap wokbaot yet long rod blong kambak, nating we ol man ples blong hem nomo we oli savegud fasin blong hem, be oli stap presem hem, se hem i wan gudfala man. Fasin ya i blong nating nomo.

11“Taem ol man we oli stap brekem loa oli no kasem panis kwiktaem, tingting blong olgeta man oli stap kam fulap long ol plan blong mekem ol samting nogud.

12-14Mi save we ol man oli stap talem se, ‘Man we i stap obei long God, olgeta samting long laef blong hem bambae oli stap ron gud, be laef blong man nogud bambae i no olsem,’ be toktok ya i blong giaman nomo. Mo mi save we oli stap talem tu se, ‘Ol man nogud, laef blong olgeta bambae i no olsem sado we i stap kam longfala moa, bambae oli ded taem oli yangfala yet, from we oli no save ona long God, mo oli no save obei long hem,’ be toktok ya tu i no tru, i blong nating nomo. Plante taem, man nogud i save mekem wan handred samting nogud, be i stap laef yet. Yu traem luk fasin ya we i stap kamtru long wol ya. Plante taem, ol stret man oli kasem panis blong ol man nogud, mo ol man nogud oli kasem pei blong ol stret man. Mi mi talem finis, se ol samting ya i blong nating nomo.

15“From ol samting ya, mi mi luk finis se i no gat narafala rod, man i mas stap mekem ol fasin ya we oli save mekem hem i harem gud. I gud hem i kakae, mo i dring, mo i gohed long ol fasin we oli save mekem hem i glad long laef ya. Hemia nomo hem i save mekem long laef ya we God i givim long hem long wol ya, we oltaem hem i stap hadwok tumas long hem.

16“Taem mi traem blong kasem save, blong mi savegud ol samting we i stap gohed long wol ya, mi mi faenemaot se nating sipos man i no slip long naet, i stap lukluk gogo kasem delaet, mo i no slip bakegen long dei go kasem tudak,

17be bambae i no save luksave nating ol samting we God i stap wokem. Nating we yumi stap traehad olsem wanem, be bambae yumi no save faenemaot samtaem. Maet ol waes man oli save talem se oli save, be nogat, oli stap giaman nomo.