Job 35 - Bislama Bible Revised 2012

1Nao Elihu i talem se,

2“Job.

Ol tok ya we yu yu stap talem

i no stret.

Yu stap talem

se God i talemaot

we yu yu stap mekem i stret,

3be long semtaem nomo,

yu stap talem long hem se,

‘God.

?Sin blong mi i stap spolem yu olsem wanem?

?Sipos mi no mekem sin,

bambae mi save winim wanem?’

4“Job.

Naoia bambae mi mi givim ansa long yu,

mo long ol fren ya blong yu tu.

5Yu traem lukluk i go long skae.

Yu luk ol klaod ya, oli hae we i hae.

Be God i stap longwe moa long olgeta.

6 Job 22.2,3 Sipos yu yu mekem sin,

samting ya i no save spolem hem.

Mo sipos yu mekem nogud plante taem,

be fasin ya i no save mekem

hem i harem nogud.

7Mo sipos yu stap mekem i stret,

be fasin ya tu i no save halpem hem.

Hem i no save kasem wan samting long yu

we i save givhan long hem.

8Sin blong yu i save spolem

ol narafala man nomo,

mo ol stret fasin blong yu

i save givhan long olgeta ya nomo.

9“Taem man i stap mekem i strong tumas

long ol narafala man,

ol narafala man ya oli harem nogud,

oli stap krae,

mo oli stap singaot

blong man i kam givhan long olgeta.

10Be oli no save luk long God ya

we i mekem olgeta,

mo we i stap leftemap tingting blong olgeta

long taem we oli stap harem nogud.

11Oltaem hem i stap givim waes long yumi,

mo i stap mekem yumi waes moa

i winim ol anamol mo ol pijin,

be oli no save luk long hem.

12Be sipos oli krae i go long hem,

bambae hem i no save ansa long olgeta,

from we oli praod,

mo oli man blong mekem nogud.

13God i gat olgeta paoa,

be hem i no save luk long olgeta,

mo i no save harem olgeta,

mo i nogud ol man olsem

oli stap krae bigwan long hem.

14“Job,

yu yu stap talem se yu no luk God.

Be i gud yu wet,

yu mekem tingting blong yu i longfala.

Hem i stap luk trabol ya blong yu.

15Yu stap ting

se hem i no save givim panis

long ol man nogud

mo i no save lukluk tumas

long ol sin blong man.

16I moa gud yu no tok, yu stap kwaet.

Ol tok blong yu i soemaot

we yu yu no save ol samting ya

we yu stap talem.”