Jeremaea 34 - Bislama Bible Revised 2012

Tok we Hae God i talem we i blong King Jedekia

1 2 King 25.1-11; 2 Kron 36.17-21 Nao long taem we King Nebukadnesa blong Babilonia wetem ol soldia blong hem, mo ol man blong ol narafala kantri we hem i stap rul long olgeta, oli stap mekem faet long Jerusalem* wetem ol vilej we oli stap raonabaot long hem, Hae God i givim tok blong hem long Profet Jeremaea.

2Nao profet i talem se, “Olgeta. Yumi ol laen* blong Isrel* mo Hae God i God blong yumi, mo hem i sanem mi blong mi go luk King Jedekia we i king blong Juda,* mi talemaot long hem we hem i talem se, ‘King. Mi bambae mi letem taon ya i go long han blong king blong Babilonia, mo bambae hem i bonem we i bon evriwan.

3Mo long taem ya, bambae yu yu no save ronwe. Ol man blong hem bambae oli holem yu, oli putum yu long han blong hem. Long taem ya, bambae yu save luk hem stret long ae blong yu, mo bambae yu save toktok wetem hem, mo biaen, bambae yu go long Babilonia.

4King, yu mas lesin gud long tok ya we mi mi stap talem long yu. Bambae yu no save ded long faet,

5bambae yu ded olsem nomo. Mo taem ol bubu blong yu bifo we oli king oli ded, ol man we oli berem olgeta, oli stap bonem insens* blong ona long olgeta, mo long sem fasin, taem yu yu ded, ol man we bambae oli berem yu, bambae oli bonem insens tu. Mo bambae oli krae long yu se, ‘!Awoo, king blong yumi i ded! !Awoo, king blong yumi i ded!’ Mi mi Hae God, mo hemia tok blong mi.”

6Nao profet ya i go luk king long Jerusalem, i talemaot ol tok ya long hem.

7Long taem ya, king blong Babilonia wetem ol soldia blong hem oli stap mekem faet long taon ya. Mo oli stap mekem faet tu long tu narafala taon blong Juda, we tufala i gat stonwol i goraon long tufala, we nem blong tufala, Lakis mo Aseka. Long taem ya, trifala taon ya nomo i stap, we olgeta oli no holem yet.

King Jedekia olgeta oli brekem promes blong olgeta

8-9Bifo, King Jedekia wetem ol man Jerusalem* oli bin agri se bambae oli letem ol man ples blong olgeta we oli stap wok slef* blong olgeta, oli go fri. Oli talem se ol Hibru,* ol man mo ol woman, olgeta evriwan bambae oli mas go fri, blong bambae i no moa gat wan long olgeta, we i stap wok slef long ples ya.

10Nao olgeta man wetem ol lida blong olgeta oli agri blong letem olgeta oli go fri, we bambae oli no moa save mekem olgeta oli wok slef bakegen. Nao oli letem olgeta oli go fri,

11be biaen, oli jenisim tingting blong olgeta bakegen, mo oli go holem olgeta, oli stap fosem olgeta blong oli wok slef bakegen.

12Nao Hae God i givim tok blong hem long Profet Jeremaea blong i go talemaot long ol man.

13Nao hem i talemaot we Hae God i talem se, “Ol laen* blong Isrel.* Mi mi Hae God, mi God blong yufala, mo tok blong mi i olsem. Bifo, mi mi tekem ol bubu blong yufala oli aot long Ijip oli kam, mo mi mekem olgeta oli no moa slef, oli fri. Long taem ya, mi mekem wan promes* wetem olgeta, mo mi talem long olgeta se,

14Eks 21.2; Dut 15.12‘Sipos i gat sam long yufala we oli salem olgeta oli kam slef blong yufala bakegen, bambae oli save wok blong yufala sikis yia, be long namba seven yia, yufala i mas letem olgeta oli go fri.’ Be ol bubu blong yufala oli no save lesin nating long mi, mo oli no save mekem ol samting ya we mi mi talem.

15Be i no longtaem, yufala i tanem tingting blong yufala, nao yufala i mekem wan samting we mi mi glad tumas long hem. Yufala evriwan i agri blong letem ol man ples blong yufala we oli slef blong yufala oli go fri, mo yufala i kam long haos* blong mi, yufala i mekem promes long fes blong mi, se bambae yufala i mekem olsem.

16Be naoia, yufala i no moa ona long mi, yufala evriwan i jenisim tingting blong yufala bakegen. Fastaem, yufala i letem ol slef blong yufala oli go fri, olsem we oli wantem, be naoia, yufala i girap, yufala i go fosem olgeta oli kam slef blong yufala bakegen.

17Mi mi Hae God, mo naoia mi talem stret long yufala, se yufala i brekem tok blong mi ya. Olgeta ya oli brata blong yufala, mo oli sista blong yufala, be yufala i no wantem nating blong letem olgeta oli go fri. Ale, naoia bambae mi mi letem yufala evriwan i fri. Long taem blong faet, mo long taem blong sik, mo long hadtaem blong kasem kakae, bambae mi mi no moa save holem yufala, bambae yufala evriwan i fri blong ded. Mo taem ol man blong ol narafala kantri long wol ya oli harem nius blong ol samting ya we bambae mi mekem long yufala, bambae oli fraet we oli seksek from.

18-19“Ol man Juda.* Long taem ya, ol haeman blong taon ya, mo ol haeman blong haos blong king, mo ol haeman blong ol narafala ples long Juda, mo ol pris,* mo ol narafala man blong yufala oli folem wan kastom blong bifo, blong mekem promes blong olgeta i strong. Olgeta oli kilim wan smol bul, nao oli splitim long tu haf, mo oli wokbaot i pas long medel blong tufala haf ya, nao oli talem se sipos oli brekem promes ya, i gud mi mi mekem long olgeta olsem we oli mekem long smol bul ya. Be biaen, oli brekem promes ya bakegen, mo oli no stap mekem ol samting we oli talem se bambae oli mekem. Ale, bambae mi mi mekem long olgeta, stret olsem we oli mekem long bul ya.

20Bambae mi letem olgeta i go long han blong ol man Babilonia ya we oli wantem kilim yufala, nao ol dedbodi blong olgeta, bambae ol pijin mo ol wael anamol oli kakae.

21Mo bambae mi letem king blong yufala tu, wetem ol haeman blong hem oli go long han blong ol enemi ya we oli wantem kilim yufala. Naoia oli no moa kam mekem faet long yufala, oli stap spel lelebet,

22be bambae mi givim tok long olgeta, nao bambae oli kambak long taon ya bakegen. Bambae oli kam mekem faet long yufala, oli winim yufala, mo oli bonem olgeta samting long taon ya. Bambae mi mi mekem we olgeta taon long Juda oli kam nogud olgeta, we bambae i no gat man i save stap long hem. Mi mi Hae God, mo hemia tok blong mi.”