Eksodas 31 - Bislama Bible Revised 2012

Ol man blong wokem Haos Tapolen blong Hae God wetem ol samting we i stap insaed(Eksodas 35.30—36.1)

1Nao Hae God i talem long Moses se,

2-3“Moses. Mi mi jusumaot man ya Bejalehel finis, mo mi mekem we paoa blong mi i kam fulap long hem. Man ya, papa blong hem Uri, mo bubu blong hem Huru we i laen* blong Juda,* mo mi mi givim save long hem, mo mi mekem we hem i gat gudhan blong mekem plante gudgudfala wok.

4Hem i save mekem plan blong ol gudgudfala samting, mo i save wokem ol samting ya long gol mo long silva mo long bras.

5Hem i save katem ol gudgudfala ston we i blong flasem ol samting, mo i save wokem ol gol blong holemgud olgeta, mo i save katem ol samting tu long wud. Mo hem i gat gudhan blong mekem evri naranarafala wok olsem.

6Mo mi jusumaot tu Ahisamak ya we papa blong hem Oholiab we i laen blong Dan,* blong i givhan long hem. Mo mi givim bigfala save tu long olgeta narafala man we oli gat gudhan blong mekem wok olsem, blong bambae oli save wokem olgeta samting ya we mi mi talem long yu.

7Olgeta samting ya we bambae oli mas wokem i olsem. I gat Haos Tapolen blong mi, we bambae mi stap mit wetem yufala long hem, mo Bokis ya we i Saen blong Promes* blong mi, mo Lid blong hem we i Ples we mi stap Tekemaot Sin blong yufala, mo ol narafala samting blong Haos Tapolen ya,

8we hemia Tebol blong Bred wetem ol samting blong hem, mo Ples blong Putum Laet wetem ol samting blong hem, we oli mas wokem olgeta long gol we i beswan, mo Olta* blong Bonem Insens,

9mo Olta ya blong Bonem Sakrefaes wetem olgeta samting blong hem,

10mo ol gudgudfala klos ya blong Eron mo blong ol pikinini blong hem, we bambae oli putum blong mekem wok blong mi taem oli kam pris,*

11mo tabu oel ya we i blong makemaot ol samting, se oli tabu, oli blong mi, mo insens* we i gat gudfala smel, we ol pris bambae oli stap yusum long Rum we i Tabu, insaed long Haos Tapolen blong mi. Taem oli wokem ol samting ya, bambae oli mas wokem stret olsem we mi mi stap talem long yu naoia.”

Sabat dei i dei blong spel

12Nao Hae God i sanem Moses

13blong i go talemaot long ol laen* blong Isrel,* we hem i talem se, “Mi mi Hae God, mo mi mi makem Sabat* dei, se hem i dei we bambae yufala i spel long hem. Dei ya bambae i wan saen we i blong stap olwe, we i blong yufala, mo i blong mi tu, blong soemaot we mi nao mi God blong yufala, mo mi mi mekem yufala i tabu, yufala i man blong mi.

14Bambae yufala i mas holem dei ya i dei blong spel, from we hem i tabu, i blong mi. Mo man we i no holem dei ya, i stap mekem wok blong hem long hem, man ya bambae yufala i mas kilim hem i ded.

15Eks 20.8-11; 23.12; 34.21; 35.2; Lev 23.3; Dut 5.12-14Yufala i gat sikis dei blong yufala blong mekem ol wok blong yufala long hem, be namba seven dei, hem i dei blong spel, we i tabu, i blong mi, mo yufala i mas tinghevi long hem. Man we i mekem wok long dei ya, yufala i mas kilim hem i ded.

16Yufala i laen blong Isrel, mo dei ya i saen blong promes* ya we mi mi mekem wetem yufala, we bambae i stap olwe, mo yufala wetem ol pikinini blong yufala, mo olgeta we bambae oli kamaot biaen long yufala, bambae yufala i mas holem dei ya olwe blong soemaot promes ya.

17Eks 20.11Dei ya bambae i wan saen we i blong stap olwe, we i soemaot we mi mi Hae God mo yufala i man blong mi, from we mi mi mekem heven mo wol long sikis dei, nao long namba seven dei, mi no moa wok, mi spel.”

18Nao taem Hae God i talem ol tok ya finis long Moses antap long hil ya Sinae, hem i tekem tufala flat ston ya we i raetem Tenkomanmen blong hem finis long tufala, i givim long hem.