Levitikas 9 - Bislama Bible Revised 2012

Hae Pris Eron i mekem ol sakrefaes

1Nao long ol seven dei ya, Hae Pris Eron wetem ol pikinini blong hem oli finisim olgeta fasin ya blong putumap olgeta oli kam pris, nao long namba eit dei blong hem, Moses i singaot olgeta, wetem ol lida blong ol laen* blong Isrel,* oli kam wanples.

2Nao hem i talem long hae pris se, “Yu go tekem wan smol bul mo wan man sipsip we i no gat wan samting i rong long bodi blong tufala, yu kam mekem sakrefaes long tufala blong mekem wosip long Hae God. Smol bul ya i blong mekem spesel sakrefaes blong tekemaot sin blong yu, mo sipsip ya i blong mekem sakrefaes ya we i blong bonem i bon evriwan.

3Mo yu go talem long olgeta man, se oli mas tekem wan man nani mo wan smol bul wetem wan smol man sipsip we tufala i gat wan yia blong tufala, mo we tufala i no gat wan samting i rong long bodi blong tufala, blong kam mekem sakrefaes long trifala. Man nani i blong mekem spesel sakrefaes blong tekemaot ol sin blong olgeta, mo tu narafala i blong mekem sakrefaes ya we i blong bonem i bon evriwan.

4Mo oli mas tekem wan bul wetem wan man sipsip i kam blong mekem sakrefaes ya we i blong yu yu bonem haf olgeta oli kakae haf blong soemaot we oli stap fren gud wetem Hae God. Bambae oli mas mekem sakrefaes long ol anamol ya, mo oli mas joenem long wan presen long kakae blong garen,* we oli granem i kam flaoa mo oli tantanem wetem olifoel.* Olgeta oli mas mekem ol samting ya naoia, from we tede, Hae God bambae i kamtru long yumi.”

5Nao olgeta oli go tekem ol samting ya we Moses i talem, oli karem i kam long fran blong Haos Tapolen ya, mo olgeta man oli kam wanples long ples ya blong mekem wosip long Hae God.

6Nao Moses i talem long olgeta se, “Hae God i talem long yufala blong yufala i mekem olgeta samting ya, blong bigfala laet ya blong hem we i saen we i saen, we i soemaot we hem i stap, bambae i save kamtru long yufala.”

7Hib 7.27Mo hem i talem long Eron se, “Yu go long Olta, yu mekem tufala sakrefaes ya blong yu, we tufala i blong tekemaot sin blong yu wetem sin blong ol pikinini blong yu. Mo biaen, yu mekem ol sakrefaes blong olgeta man blong tekemaot sin blong olgeta, stret olsem we Hae God i talem.”

8Nao Eron i go long Olta, i kilim smol bul ya, i bonem blong mekem spesel sakrefaes blong tekemaot sin blong hem.

9Mo ol pikinini blong hem oli tekem blad blong buluk ya, oli givim long hem, nao hem i pusum fingga blong hem long blad ya, i putum long ol fo hon* blong Olta, mo i kafsaedem haf we i stap i go long stamba blong Olta ya.

10Nao hem i tekem ol gris blong buluk ya wetem tufala kidni blong hem mo gudfala haf blong leva blong hem, i bonem olgeta evriwan long Olta ya, olsem we Hae God i bin talem long Moses.

11Be hem i tekem ol haf blong hem wetem skin blong hem, i karemaot long ples ya, i go bitim ples we ol haos tapolen blong olgeta i stap long hem, i go bonem olgeta afsaed.

12Nao hem i kilim man sipsip ya blong hem blong mekem sakrefaes ya we i blong bonem i bon evriwan, mo ol pikinini blong hem oli tekem blad blong sipsip ya, oli givim long hem, mo hem i kafsaedem i go long ol fo saed blong Olta ya blong givim i go long Hae God.

13Mo oli tekem hed blong sipsip ya wetem ol narafala haf blong hem, oli givim long hem, mo hem i bonem olgeta long Olta.

14Mo hem i wasem gat blong sipsip ya, wetem olgeta samting we i stap long hem, mo tufala leg blong hem, nao i bonem olgeta tu long Olta, antap long ol narafala haf blong sipsip ya.

15Nao biaen, hem i mekem ol sakrefaes blong olgeta man. Hem i tekem nani ya we i blong mekem spesel sakrefaes blong tekemaot sin blong olgeta, i kilim i ded, mo i mekem sakrefaes long hem, olsem we i mekem finis long spesel sakrefaes ya we i blong tekemaot sin blong hem.

16Nao hem i tekem tufala anamol ya we i blong mekem sakrefaes ya we i blong bonem i bon evriwan, nao i mekem sakrefaes long tufala olsem we Loa i talem.

17Mo hem i tekem ol kakae blong garen we oli granem finis i kam flaoa, nao i karem sam flaoa long han blong hem, i bonem long Olta. Hemia i antap long sakrefaes ya we oli stap mekem evri moning, we i blong bonem i bon evriwan.

18Lev 3.1-11Nao hem i kilim tufala anamol ya we i blong mekem sakrefaes blong olgeta man blong soemaot we oli stap fren gud wetem Hae God. Mo ol pikinini blong hem oli tekem blad blong tufala, oli givim long hem, mo hem i kafsaedem i go long ol fo saed blong Olta blong givim i go long Hae God.

19Nao hem i tekem ol mit blong tufala we i gat gris long hem, i putum

20antap long ol mit blong jes blong tufala, nao i karem evriwan i kam long Olta. Hem i bonem ol gris ya long Olta,

21mo i tekem jes blong tufala wetem raet leg blong tufala, i leftemap long fes blong Hae God, blong makemaot se i wan spesel presen blong hem, nao biaen, presen ya i blong ol pris blong oli kakae, olsem we Moses i talem.

22 Nam 6.22-26 Nao taem hem i finisim olgeta wok blong ol sakrefaes ya, hem i leftemap tufala han blong hem, i blesem olgeta man, nao hem i aot long ples blong Olta, i kamdaon bakegen.

23Nao Moses mo Eron, tufala i go insaed long Haos Tapolen ya, mo taem tufala i kam afsaed bakegen, tufala i blesem olgeta man ya, nao bigfala laet ya we i saen we i saen, we i soemaot we Hae God i stap, hem i kamtru long olgeta.

24Nao wantaem nomo, Hae God i sanem faea i kamdaon long Olta ya, i bonem sakrefaes ya we i blong bonem i bon evriwan, nao i finisimgud ol mit ya we i fulap long gris we oli stap bon long Olta ya. Mo taem olgeta man oli luk samting ya, oli glad tumas we oli singaot bigwan from, nao oli nildaon, oli bodaon we fes blong olgeta i godaon i kasem graon.