Sam 92 - Bislama Bible Revised 2012

Sing blong presem Hae God(Sing blong singsing long hem long Sabat* dei.)(Tok i go long Hae God.)

1Hae God.

Yu yu God we yu hae we yu hae.

I gud tumas blong talem tangkiu long yu,

mo blong sing blong leftemap nem blong yu.

2I gud tumas blong talemaot evri moning

we oltaem yu yu lavem man tumas,

mo blong talemaot evri naet

we yu stap holem ol promes blong yu.

3I gud tumas blong singsing wetem gita

mo yukalele mo mandolin

blong talemaot ol fasin ya blong yu.

4Hae God,

ol bigbigfala wok blong yu

oli stap mekem mi mi glad tumas.

Oltaem mi mi harem gud,

mi stap sing from ol samting ya

we yu yu mekem.

5Hae God.

!Ol wok blong yu oli bigfala tumas!

!Tingting blong yu i dip we i dip!

6Samting ya,

man we i no gat hed neva bambae hem i save,

man we i krangke bambae i no save luksave samtaem.

7-8Hae God,

ol man nogud oli save gru kwik

olsem rabis gras,

olgeta evriwan we oli stap mekem ol fasin nogud

oli save win long plante samting,

be bambae yu yu spolemgud olgeta,

from we yu yu hae we yu hae,

mo bambae yu stap olsem oltaem nomo,

gogo i no save finis.

9Mifala i save

we ol enemi blong yu bambae oli ded.

Yu bambae yu winim olgeta man nogud.

10Yu yu mekem mi mi strong olsem wael buluk,

mo yu blesem mi,

yu mekem mi mi harem gud tumas.

11Mi mi luk finis

we ol enemi blong mi oli lus.

Olgeta oli man nogud,

mo mi harem finis we oli stap krae.

(Tok i go long ol man.)

12-13Hae God i God blong yumi,

mo ol man we fasin blong olgeta i stret

oli stap oltaem long haos* blong hem.

Bambae oli gru gud olsem pamtri,*

bambae oli gru olsem ol sida* ya long Lebanon.

Oltaem oli stap kam strong moa,

olsem ol tri we man i planem long gudfala graon,

mo oli stap gru gud oltaem.

14Olgeta oli strong olsem olfala tri

we lif blong hem i stap grin oltaem

mo i stap karem plante frut yet.

15Hemia i soemaot we Hae God,

fasin blong hem i stret gud olgeta,

i no gat wan samting nating long hem

we i no stret.

Oltaem hem i stap lukaot gud long mi.