1 Mat 5.34; 23.22; Mat 5.35 Wok 7.49,50 Bakegen, profet i talemaot long ol man blong hem we Hae God i talem se, “!Ol man blong mi! Heven i olsem bigfala jea blong mi, we mi mi King, mi sidaon long hem blong rul, mo wol i olsem ples blong mi, blong mi putum leg blong mi antap long hem. ?Yufala i ting se yufala i save wokem wanem kaen haos, blong mi mi go stap long hem? ?Yufala i ting se yufala i save wokem wanem kaen ples, blong mi mi go spel long hem?
2Wol ya wetem olgeta samting we i stap long hem, mi nomo mi mekem, mo man we tingting blong hem i stap daon, we i stap tanem tingting blong hem from ol sin blong hem, mo we i stap tinghevi long mi, mo i stap obei long mi, oltaem mi mi stap glad long hem.
3“!Fasin blong yufala i olbaot tumas! !Yufala i stap mekem tingting blong yufala nomo! Long tingting blong yufala, sipos man i kilim bul blong mekem sakrefaes long mi, be i sem mak nomo olsem we hem i kilim wan pikinini blong hem blong mekem sakrefaes long narafala god. Mo sipos man i kilim smol sipsip blong givim i kam long mi, be i sem mak nomo olsem we hem i brekem nek blong dog blong givim i go long narafala god. Mo sipos hem i bonem kakae long olta blong mi, be i sem mak nomo olsem we hem i tekem blad blong pig, i go givim long narafala god. Mo sipos hem i bonem insens* blong i prea long mi, be i sem mak nomo olsem we hem i go prea long ol narafala god ya. Yufala i glad blong go mekem wosip long ol rabis fasin we oli nogud we i nogud.
4Be taem mi mi singaot yufala, yufala i no save harem mi, mo taem mi tok long yufala, yufala i no save lesin long mi. Oltaem yufala i stap brekem tok blong mi, mo yufala i stap mekem ol fasin we i nogud olgeta. Nao from ol samting ya, mi bambae mi mekem we wan bigfala trabol we yufala i stap fraet tumas long hem i kam kasem yufala.”
5Nao profet i gohed, i talem se, “!Yufala we i stap tinghevi long Hae God, mo we yufala i stap ona gud long hem, i gud yufala i harem tok blong hem! Hem i talem se, ‘From we tingting blong yufala i stap strong long mi oltaem, sam man ples blong yufala oli no laekem yufala, oli agens long yufala, nao oli no moa save kam joen wetem yufala. Oli stap laf nogud long yufala, oli talem se, “Sipos Hae God i gat paoa, i moa gud hem i kam sevem yufala, nao bambae mifala i luk we yufala i glad.” Be bambae mi mi mekem olgeta ya oli sem tumas.
6!Yufala i lesin! Noes ya we yufala i harem long taon ya, we i stap kamaot long haos* blong mi, hemia noes blong mi ya, we mi stap panisim ol enemi blong mi.
7 Rev 12.5 “ ‘Taon ya i tabu, i taon blong mi, mo bambae hem i olsem woman we i bonem pikinini kwiktaem nomo, we i no harem nogud nating long bodi blong hem.
8!Yufala i traem tingbaot! ?Samtaem wan ples i kam niufala kantri long wan dei nomo? ?Samtaem yufala i harem nius blong samting olsem? !Nogat! Be ples ya Saeon* bambae i no save harem nogud longtaem, bambae niufala kantri i kamaot long hem wantaem nomo.
9?Yufala i ting se taem mi letem we woman i kasem taem blong bonem pikinini blong hem, be biaen, bambae mi save blokem hem blong hem i no save bonem pikinini ya? !Nogat! ?Yufala i ting se mi mi save lukaot gud long ol man blong mi, kam kasem taem we oli save kam niufala neson bakegen, be biaen, bambae mi blokem olgeta blong oli no kam niufala neson olsem? Mi mi no save mekem fasin ya. Mi mi Hae God, mo hemia tok blong mi.’ ”
10Nao profet i gohed, i talem se,
“Olgeta.
!Yufala evriwan
we i laekem Jerusalem* tumas,
yufala i kam joen long ol man blong taon ya!
!Yufala i glad wetem olgeta!
!Naoia,
taon ya i kasem laef we i gud tumas!
!Yufala i mas glad from!
Yufala ya
we fastaem yufala i stap krae from taon ya,
naoia, yufala i mas kam,
yufala i glad wetem ol man blong hem.
11Ol man blong taon ya,
bambae laef blong olgeta i go gud,
bambae oli save harem gud olsem bebi
we i stap titi long mama blong hem,
mo yufala i mas kam joen long olgeta
long gudfala laef ya blong olgeta.”
12Mo bakegen, profet i talemaot we Hae God i talem se, “Ol man Jerusalem. Bambae mi mi mekem we laef blong yufala i stap ron gud longtaem. Ol gudgudfala samting blong ol kantri raonabaot long yufala, bambae oli stap kam hivap long ples blong yufala, olsem reva we i stap ron, we neva i save kam drae. Bambae yufala i olsem smol bebi we mama blong hem i laekem hem tumas, i stap karem hem, mo i stap givim titi long hem.
13Bambae mi mi leftemap tingting blong yufala, mi mekem yufala i harem gud bakegen, olsem we woman i stap leftemap tingting blong pikinini blong hem, i stap mekem hem i harem gud bakegen.
14Taem yufala i luk ol samting ya i kamtru, bambae yufala i harem gud tumas. Ol samting ya bambae i mekem yufala i strong, bambae i mekem yufala i harem we bodi blong yufala i strong gud. Nao long taem ya, bambae yufala i save we mi mi stap givhan long olgeta we oli stap obei long mi, mo we kros blong mi i stap kasem olgeta we oli enemi blong mi.
15“Bambae mi mi kam wetem faea we i laet, mo bambae mi kamtru kwiktaem, olsem we mi sidaon long klaod blong hariken, mi raed i kam, nao bambae mi panisim olgeta man long wol ya, we mi mi kros tumas long olgeta.
16Mi mi luk we olgeta oli mekem i no stret, mo bambae mi yusum faea mo faet blong panisim olgeta, mo plante man bambae oli ded.
17“Olgeta ya we oli stap mekem olgeta oli klin long fes blong ol narafala god, blong oli go mekem wosip long olgeta, mo we oli stap maj i go long ol gudfala ples ya we oli tabu blong ol god ya, mo we oli stap kakae pig mo rat mo ol narafala kakae ya we oli doti long fes blong mi, taem blong olgeta i klosap. Bambae i no longtaem, olgeta ya oli finis olgeta.
18Mi mi savegud ol tingting blong olgeta, mo ol fasin we oli stap mekem. Naoia, mi mi stap kam blong pulum ol man blong olgeta kantri long wol oli kam wanples. Mo taem olgeta evriwan oli stap, bambae oli luk ol bigbigfala samting we mi mi save mekem long paoa blong mi,
19mo bambae oli save luk saen we mi bambae mi putum long fes blong olgeta.
“Long taem ya, bambae mi save letem sam long olgeta oli laef i stap. Nao bambae mi sanem olgeta oli go long ol kantri mo ol ples we i longwe, we ol man oli no harem nem blong mi, mo oli no luk paoa blong mi yet. Nao long fes blong ol man ya, olgeta ya bambae oli save talemaot hae nem blong mi. Bambae oli save go long Lidia we ol man blong hem oli man blong faet long bonara, mo long Spen, mo long Libia, mo long Tubal, mo long Gris.
20Nao bambae olgeta ya oli tekem olgeta brata blong yufala we oli stap long ol narafala kantri, oli aot, oli kam long tabu hil* ya blong mi long Jerusalem, oli givim olgeta long mi, olsem bigfala presen blong mi. Bambae oli mekem olgeta oli sidaon long ol hos, mo long ol hafkas dongki,* mo long ol kamel,* mo long ol kat we hos i pulum, mo long ol kat we buluk i pulum, nao bambae oli karem olgeta i kam. Oltaem yufala i stap mekem ol basket blong yufala oli klin long fes blong mi, nao yufala i stap fulumap ol kakae blong garen* long olgeta, mo yufala i karem ol kakae ya i kam, yufala i givim long mi olsem bigfala presen blong mi. Mo long sem fasin, bambae olgeta ya oli givim ol brata ya blong yufala oli kam long mi, olsem bigfala presen blong mi.
21Mo mi bambae mi putumap sam long olgeta ya oli kam pris* blong mi, mo sam bambae oli joen long ol Livaet* blong wok wetem olgeta.
22Aes 65.17; 2 Pita 3.13; Rev 21.1“Taem we bambae mi mekem niufala heven mo niufala wol, bambae mi mi holem tufala i stap gud olwe long paoa blong mi. Mo long sem fasin, nem blong yufala wetem ol pikinini we bambae oli stap kamaot biaen long yufala, bambae mi mi holem olgeta oli stap gud olwe.
23Oltaem nomo, long Lafet* blong Niumun, mo long Sabat* dei, bambae i gat ol man blong olgeta kantri long wol oli kam mekem wosip long mi long Jerusalem.
24Mak 9.48Mo taem olgeta ya oli aot, oli stap wokbaot blong gohom, bambae oli save luk ol dedbodi blong ol man ya we bifo, oli girap, oli agens long mi. Ol wom we oli stap kakae ol dedbodi ya, neva bambae oli save ded, mo faea we i stap bonem olgeta, neva bambae oli save kilim i ded. Mo taem olgeta man long wol oli luk olgeta ya, bambae oli luk se oli nogud we i nogud. Mi mi Hae God, mo hemia tok blong mi.”
Who We AreWhat We EelieveWhat We Do
2025 by iamachristian.org,Inc All rights reserved.
