Namba 14 - Bislama Bible Revised 2012

Ol man oli toktok from we oli harem nogud

1Nao long naet ya, olgeta man oli stap krae bigwan, gogo kasem delaet, from we oli harem nogud, oli fraet.

2Nao oli stap tok agens long Moses mo Hae Pris Eron, oli talem se, “!Sipos mifala i ded nomo long Ijip no long draeples ya, bambae i moa gud!

3?Blong wanem Hae God i wantem tekem yumi i go long kantri ya? Sipos yumi go mekem faet long olgeta ya longwe, bambae oli kilim yumi evriwan i ded, mo bambae oli tekem ol woman blong yumi wetem ol pikinini blong yumi tu. I moa gud yumi gobak long Ijip.”

4Nao oli stap taltalem long olgeta se, “!Yumi mas jusum wan narafala lida blong yumi! !Yumi mas gobak long Ijip!”

5Nao long fes blong olgeta, Moses mo hae pris, tufala i nildaon, tufala i bodaon we fes blong tufala i godaon kasem graon, nao tufala i prea, from we tufala i save se Hae God bambae i jajem olgeta.

6Nao Josua wetem Keleb, we olgeta i bin go lukluksave ples ya, tufala i harem nogud tumas, tufala i stap terem* klos blong tufala from.

7Mo tufala i talem long ol man ya se, “!Olgeta! !Kantri ya we mifala i go luk, hem i gud we i gud!

8Sipos Hae God i glad long yumi, bambae hem i tekem yumi i go long ples ya, mo bambae hem i givim graon ya long yumi we kakae blong hem i nambawan.

9Hib 3.16!Yufala i no mas girap agens long hem! !Yufala i no fraet long olgeta ya longwe! !Olgeta oli no naf long yumi ya! !Bambae yumi flatem olgeta ya! Hae God i stap wetem yumi, mo hem i winim finis ol god ya blong olgeta we oli stap givhan long olgeta. !From samting ya, yumi no mas fraet!”

10Be ol man ya oli girap, oli wantem stonem tufala i ded, be wantaem nomo oli luk wan bigfala laet we i soemaot we Hae God i stap, i stap saen i kamaot antap long Haos Tapolen blong hem, i saen i kam.

Moses i prea from olgeta

11Nao Hae God i talem long Moses se, “Moses. ?Olgeta ya bambae oli stap tanem baksaed long mi gogo kasem wetaem? !Yu luk! Mi mi mekem plante merikel finis long fes blong olgeta, be no yet. ?Wetaem bambae oli tanem tingting blong olgeta blong trastem mi?

12!Bambae mi sanem wan rabis sik i kam blong kilim olgeta i ded! Be yu no harem nogud. Bambae mi mekem we yu yu kam stamba blong wan narafala laen,* we ol man blong hem bambae oli plante moa mo oli gat paoa moa i winim olgeta ya.”

13 Eks 32.11-14 Be hem i talem long Hae God se, “?No, be mifala evriwan i man blong yu, mo sipos ol man Ijip oli harem samting ya, bambae i olsem wanem nao? Olgeta oli savegud we yu yu tekemaot mifala long kantri blong olgeta, mo yu tekem mifala i kam long ples ya long paoa blong yu nomo. Mo sipos oli harem we yu spolem olgeta olsem,

14bambae oli mas talemaot samting ya long ol man ya we oli stap long kantri ya Kenan.* Olgeta long Kenan oli harem finis we yu yu stap wetem mifala, mo we yu stap soemaot samting ya i klia long fes blong olgeta man, from we klaod blong yu i stap antap long mifala. Oli harem tu we long dei, yu stap go fastaem long mifala long bigfala klaod ya we i stanap stret, mo long naet, yu stap lidim mifala long bigfala faea ya we i stanap stret.

15-16Be sipos yu kilim olgeta i ded long draeples ya, ol man ya long Kenan we oli harem nius blong ol bigbigfala wok ya blong yu finis, bambae oli talem se yu kilim olgeta from we yu kanduit blong tekem olgeta i go long kantri ya we yu promes* blong givim long mifala.

17-18Eks 20.5,6; 34.6,7; Dut 5.9,10; 7.9,10From samting ya, naoia mi mi prea long yu blong yu soemaot paoa blong yu, yu tekem mifala i go long kantri ya. Bifo, yu yu mekem promes long mifala, yu talem se, ‘Mi mi Hae God, mo fasin blong mi, mi no save kros kwik. Oltaem mi mi stap lavem man, mo oltaem mi stap holem promes blong mi. Mi stap fogivim ol man blong mi, mo mi stap tekemaot ol rabis fasin blong olgeta, mo ol sin blong olgeta. Be olgeta we oli stap mekem nogud, mi mi stap panisim olgeta, wetem ol pikinini blong olgeta, mo ol smol bubu blong olgeta, go kasem ol seken smol bubu blong olgeta, mo ol namba tri smol bubu blong olgeta.’ Hae God, plis yu holem promes ya blong yu.

19Fasin blong yu, oltaem yu stap lavem man, nao from samting ya, mi mi askem long yu blong yu fogivim ol man ya blong yu, yu tekemaot ol sin blong olgeta bakegen, olsem we yu stap fogivim mifala oltaem, yu stap tekemaot ol sin blong mifala, i stat long taem ya we mifala i aot long Ijip, i kam kasem tede.”

20Nao Hae God i talem se, “Bambae mi mi fogivim olgeta, mi tekemaot ol sin blong olgeta, olsem we yu yu askem.

21Hib 3.18Be mi mi Hae God, mi laef, mi stap we mi stap, mo paoa blong mi i fulap long olgeta ples long wol. Mo naoia, mi mi promes long nem blong mi,

22se i no gat wan long olgeta ya we bambae i go insaed long kantri ya Kenan. Oli luk mi finis long bigfala laet ya we i saen we i saen, we i soemaot we mi mi stap, mo oli luk ol merikel ya we mi mi mekem long Ijip mo long draeples. Be olgeta oli stap traem mi plante taem, we man i no save kaontem, mo naoia oli no wantem obei long mi.

23Olgeta ya bambae oli no save go kasem kantri ya samtaem, we mi mi promes long ol bubu blong yufala bifo, se bambae mi givim long yufala. Bambae i no gat wan long olgeta ya we oli tanem baksaed long mi we i save go kasem kantri ya.

24Jos 14.9-12Be man blong wok blong mi Keleb, tingting blong hem i narafala. Oltaem, tingting blong hem i stap strong long mi, mo from samting ya, bambae mi mi tekem hem i go long kantri ya we hem i bin go wokbaot long hem blong lukluksave ples. Mo olgeta we bambae oli kamaot biaen long hem bambae oli holem kantri ya

25we naoia ol laen blong Amalek mo ol laen blong Kenan oli stap olbaot long ol nambawan graon blong hem. Kantri ya bambae i blong olgeta. Be tumora, bambae yufala i tanemraon, yufala i gobak bakegen long draeples ya long saot, long rod ya we i pastru long draeples blong go long Akaba Bei.”

Hae God i panisim olgeta from we oli stap tok agens long hem

26Nao Hae God i talem long Moses mo Hae Pris Eron se,

27“?Ol man nogud ya bambae oli stap tok agens long mi gogo kasem wetaem? Mi mi harem ol toktok ya blong olgeta, we oltaem oli stap tok agens long mi. Naoia i naf.

28Yutufala i go talemaot long olgeta we mi mi Hae God, mi laef, mi stap we mi stap, mo long nem blong mi, mi mekem wan strong promes* long olgeta se bambae mi mekem samting ya we olgeta oli askem.

29Hib 3.17Bambae olgeta oli ded olbaot long draeples ya, mo bodi blong olgeta bambae oli stap olbaot long hem. Olgeta oli girap, oli tok agens long mi, mo from samting ya, olgeta evriwan we i gat twanti yia i go antap bambae oli no save go long kantri ya.

30Mi mi promes finis se bambae olgeta evriwan oli go stap long ples ya, be bambae i no moa olsem. Keleb mo Josua, tufala nomo bambae i go.

31Olgeta oli fraet, mo oli talem se ol man blong kantri ya bambae oli tekemaot ol pikinini blong olgeta, be mi bambae mi tekem ol pikinini ya blong olgeta oli go long kantri ya we olgeta oli no wantem, blong ples ya i kam hom blong olgeta.

32Be olgeta ya bambae oli ded olbaot long draeples ya nomo.

33Wok 7.36Mo from we tingting blong olgeta i no stap strong long mi, ol pikinini ya blong olgeta bambae oli stap wokbaot olbaot long draeples ya foti yia. Olgeta ya we oli girap agens long mi bambae oli stap harem nogud gogo kasem we laswan blong olgeta i ded.

34Bambae oli harem nogud from ol sin blong olgeta foti yia, we wan yia i makem wan dei blong ol foti dei ya we ol man ya blong yufala oli stap longwe blong lukluksave kantri ya. !Long ol foti yia ya, bambae olgeta oli luksave se taem mi mi agens long olgeta, i nogud we i nogud!

35Olgeta we oli kam wanples blong tok agens long mi oli man nogud, mo mi mi mekem wan strong promes long olgeta, se bambae olgeta evriwan oli ded long draeples ya. Mi mi Hae God mo hemia tok blong mi.”

36-37Nao ol man ya we Moses i sanem olgeta i go lukluksave kantri ya, Hae God i panisim olgeta long wan rabis sik we oli ded long hem, from we taem oli kambak, oli talemaot ol giaman toktok we i mekem olgeta man oli harem nogud, oli stap tok agens long Hae God from.

38Long olgeta twelef ya we oli bin go lukluksave kantri ya, Josua mo Keleb, tufala ya nomo, tufala i no ded.

Olgeta oli girap, oli traem go long kantri ya Kenan(Dutronome 1.41-46)

39Nao taem Moses i talemaot tok ya blong Hae God long ol man ya, olgeta oli harem nogud tumas, nao oli krae we oli krae.

40Nao long nekis dei, long eli moning, oli girap, oli wantem go insaed long kantri ya Kenan,* long saed ya we i ples blong hil. Oli talem se, “Mifala i save we mifala i mekem i nogud, be hemia i finis. Naoia mifala i rere blong go long ples ya we Hae God i talemaot se bambae i blong yumi.”

41Be Moses i talem long olgeta se, “!Be naoia yufala i brekem tok blong Hae God bakegen! ?From wanem yufala i no save obei long hem? !Bambae yufala i no save win ya!

42!Yufala i no go! !Hae God bambae i no stap wetem yufala! Bambae ol enemi ya oli winim yufala.

43Sipos yufala i go blong fesem ol laen* blong Amalek mo ol laen blong Kenan, blong mekem faet long olgeta, bambae yufala i ded nomo long faet. Hae God bambae i no save stap wetem yufala, from we yufala i no wantem folem tok blong hem.”

44Be olgeta oli no fraet, oli girap, oli go, nating we Bokis ya we i Saen blong Promes* blong Hae God i no go wetem olgeta mo Moses tu i no go, i stap wetem Bokis ya daon long ples blong olgeta. Olgeta nomo oli go insaed long kantri ya, oli go antap long ples blong hil,

45nao ol laen blong Amalek wetem ol laen blong Kenan we oli stap olbaot long ples ya, olgeta oli kam mekem faet long olgeta, oli winim olgeta, mo oli ronem olgeta kam kasem ples ya Homa.