Esikel 5 - Bislama Bible Revised 2012

Profet Esikel i katem hea blong hem

1Nao Hae God i talem se, “Man blong wol ya. Yu tekem wan naef blong faet we i sap gud, yu katemaot hea blong yu wetem mustas blong yu, nao yu skelem olgeta long skel, mo yu seraot olgeta long tri haf.

2Taem we yu soemaot we ol enemi oli no moa blokem taon ya, oli winim finis, bambae yu tekem fas haf blong hea ya, yu bonem antap long pija blong taon ya. Mo namba tu haf blong hem, bambae yu tekem, yu katkatem long naef blong faet raonabaot long taon ya. Mo namba tri haf blong hem, bambae yu sakem, blong win i karem i go, nao mi bambae mi ronem olgeta long naef blong faet blong mi.

3Nao bambae yu pikimap smol nomo long olgeta ya we win i stap karem i go, yu fasem long en blong klos blong yu.

4Nao bambae yu tekemaot sam long klos ya bakegen, yu sakem i go long faea blong i bon evriwan, mo smok blong hem bambae i goaot i kasem olgeta laen* blong Isrel.*”

5Hae God i Masta* blong yumi, mo hem i talem long mi se, “Yu luk Jerusalem* ya. Mi putum hem i stap long medel blong wol ya, mo ol narafala kantri oli stap raonabaot long hem.

6Be ol man blong hem oli stap girap agens long ol tok blong mi, mo oli stap soemaot we oli nogud moa i winim ol man blong ol narafala kantri ya. Oli no obei long mi nating, oli nogud moa, i winim ol kantri ya. Oli sakem ol tok blong mi, oli no wantem nating, mo oli no wantem holem ol loa blong mi.

7“Ol man Jerusalem. Yufala i mas harem tok blong mi. Mi mi Hae God, mi Masta blong yufala. Fasin ya we yufala i no obei long ol loa blong mi, mo yufala i no holem ol tok blong mi, hem i mekem tumas trabol long mi, i winim ol narafala kantri ya we oli stap raonabaot long yufala. Yufala i stap folem ol kastom blong olgeta ya,

8mo from samting ya, mi mi talem long yufala, se mi mi enemi blong yufala. Bambae mi jajem yufala, stret long fes blong ol narafala kantri ya.

9From we yufala i stap mekem ol samting we mi mi no wantem nating, bambae mi givim wan panis long yufala we neva mi givim long yufala samtaem, mo biaen bambae mi no moa save panisim yufala bakegen olsem.

10Krae 4.10Bambae yufala i gat hadtaem blong kasem kakae, nao sam long yufala bambae oli kakae ol pikinini blong olgeta, mo sam long ol pikinini bambae oli kakae ol olfala blong olgeta. Bambae mi panisim yufala, mo haf blong yufala we i stap laef bambae mi ronemaot olgeta oli go stap olbaot long ol narafala kantri.

11“Mi Hae God, mi Masta blong yufala. Mi mi laef, mi stap we mi stap, mo tok blong mi i olsem. From we yufala i mekem haos* blong mi i kam doti long ol samting nogud ya we yufala i stap mekem, bambae mi spolem yufala we mi no gat sore long yufala nating.

12Bambae mi seraot yufala long tri kampani. Fas kampani bambae oli hanggri mo oli sik gogo oli ded insaed long taon ya. Mo seken kampani, bambae ol enemi oli kilim olgeta long faet afsaed long taon. Mo namba tri kampani, bambae mi mekem olgeta oli go wanwan olbaot long ol narafala kantri, mo bambae mi tekem naef blong faet blong mi, mi ronem olgeta i go.

13“Long fasin ya, bambae mi soemaot we mi kros we mi kros tumas long yufala, be taem mi panisim yufala finis, bambae kros blong mi i finis, nao mi harem gud bakegen. Nao bambae yufala i save haremsave we mi Hae God, mi tok from we mi harem nogud long yufala. Bambae mi panisim yufala from we tingting blong yufala i no moa stap strong long mi, yufala i tanem baksaed long mi, nao yufala i girap, yufala i biaen long ol narafala god.

14Mi bambae mi spolemgud yufala, nao olgeta man blong ol kantri we oli stap raonabaot long yufala we oli wokbaot long ples ya bambae oli luk yufala, mo oli stap laf nogud long yufala.

15“Taem mi kros we mi kros long yufala, bambae mi panisim yufala, mo olgeta kantri ya bambae oli fraet we i fraet. Bambae oli lukluk long yufala, oli ting rabis long yufala, nao bambae oli laf nogud long yufala.

16Bambae mi mekem yufala i sot long kakae, nao bambae yufala i stap hanggri gogo yufala i harem i nogud we i nogud, olsem we man i sutum yufala long ara we i sap we i sap, blong kilim yufala i ded.

17Rev 6.8Bambae mi mekem ol pikinini blong yufala oli ded long hanggri, mo bambae mi sanem ol wael anamol tu oli kam blong kilim olgeta oli ded. Mo yufala, bambae mi letem yufala i ded long rabis sik mo long faet. Mi mi Hae God, mo hemia tok blong mi.”