1Nao long taem ya we kwin i livim kakae, long namba tri dei blong hem, hem i putum ol nambawan klos blong hem, nao i go long smol yad ya long haos blong king we i insaed olgeta, nao i stanap, i lukluk i go long rum ya we bigfala jea blong king i stap long hem. King i stap insaed, i stap sidaon long bigfala jea ya blong hem, i stap lukluk i kam long doa.
2Mo taem hem i luk kwin we i stap stanap afsaed long yad ya, hem i glad tumas blong luk hem, nao i tekem wokingstik ya blong hem we oli wokem long gol, i poenem hem long hem. Nao kwin i go klosap, i tajem en blong stik ya.
3Nao king i askem long hem se, “?Esta, olsem wanem? ?Yu wantem wan samting? Sipos yu talemaot wanem samting long mi we yu yu wantem, nating sipos yu askem haf blong olgeta samting we mi mi gat long kingdom blong mi, be bambae mi save givim long yu.”
4Nao kwin i talem long hem se, “King. Plis mi wantem se tede bambae yu mo Haman, yutufala i kam kakae long haos blong mi. Mi stap mekemrere kakae blong yutufala, mo sipos yutufala i save kam, bambae mi mi glad tumas.”
5Nao king i sanem tok i go long Haman blong i kam kwiktaem, blong bambae tufala i go kakae long haos blong kwin. Mo taem hem i kamtru, hem wetem king, tufala i go long kakae ya we kwin i mekem blong tufala.
6Nao taem trifala i stap dring waen, king i talem long kwin se, “Kwin, sipos yu talemaot long mi wanem samting we yu yu wantem, bambae mi save givim long yu naoia. Nating sipos yu askem haf blong olgeta samting we mi mi gat long kingdom blong mi, be bambae mi save mekem olsem we yu yu wantem.”
7Nao kwin i talem se,
8“King, sipos i tru we yu yu glad blong givim samting we bambae mi askem long yu, plis mi wantem tumas blong yutufala i kambak bakegen long ples ya tumora. Bambae mi mekemrere wan narafala kakae blong yutufala, mo sipos yu save mekem olsem, bambae mi mi glad tumas. Nao tumora bambae mi talemaot long yu samting ya we mi mi wantem.”
Haman i mekem plan blong kilim Modekae i ded9Nao taem trifala i kakae finis, Haman i aot blong gohom we i harem gud tumas, mo tingting blong hem i glad we i glad. Be taem hem i stap wokbaot i go, hem i luk Modekae i stap sidaon long ofis blong hem, long doa* blong bigfala stonwol blong yad blong king, be hem i no girap blong ona long hem, mo taem hem i pas long ples ya, Modekae i no mekem wan saen nating blong ona long hem, nao hem i kros we i kros.
10Be hem i taetem hem nomo, i wokbaot i go long haos blong hem. Nao hem i singaot ol fren blong hem oli kam long haos blong hem, mo i singaot woman blong hem Seres tu, i kam joen wetem olgeta.
11Nao hem i stap tok flas long fes blong olgeta, i stap talem se hem i wan rijman we i gat plante pikinini boe blong hem, mo we king i mekem hem i holem wan wok we i gat hae nem long hem, mo we hem i kam namba wan haeman blong king, i winim ol narafala haeman blong hem.
12Mo hem i talem se, “!Yufala i luk! Antap long ol samting ya, tede nomo, Kwin Esta i mekem wan gudfala kakae blong mi mo king, we i blong mitufala nomo, i no blong ol narafala man. Mo tumora, hem i wantem blong mitufala i go kakae long haos blong hem bakegen.
13Be i gat wan samting yet we i stap spolem tingting blong mi. Taem mi luk Modekae, laen* ya blong Isrel* we i stap sidaon long ofis blong hem long doa blong bigfala stonwol blong yad blong king, samting ya i mekem mi mi harem nogud tumas, nao mi luk ol gudgudfala samting ya i olsem samting nating nomo.”
14Nao woman blong hem mo ol fren ya blong hem oli talem long hem se, “I gud yu wokem wan ples blong hangem man we bambae i hae we i hae, i kasem twanti faef meta. Nao tumora long moning, bambae yu save askem long king, blong ol man blong hem oli hangem Modekae long hem. Ale biaen, bambae yu save go long kakae ya we tingting blong yu i glad.”
Nao Haman i harem se plan ya i gud, nao hem i talem long ol man blong hem blong oli wokem wan ples blong hangem man, blong bambae oli hangem Modekae long hem.
Who We AreWhat We EelieveWhat We Do
2025 by iamachristian.org,Inc All rights reserved.
