Job 32 - Bislama Bible Revised 2012

Elihu i tok(Job 32.1—37.24)

1Nao from we Job i bilif strong se hem i no mekem wan samting we i nogud, trifala fren ya blong hem i no moa traem blong givim ansa long hem bakegen.

2Be i gat wan man i stap klosap long olgeta, we nem blong hem Elihu. Hem i pikinini blong Barakel we i kamaot biaen long wan olfala bifo we nem blong hem Bus, we olfala ya i laen blong Ram. Elihu ya i kros tumas from we Job i stap talem se hem i wan stret man, mo i stap putum stamba blong trabol ya blong hem i go long God.

3Mo hem i kros tu long trifala fren ya blong Job, from we trifala i no save faenem rod blong givim ansa long hem, nao ol toktok blong olgeta i kam olsem we God i mekem i no stret.

4Be Elihu i no olfala olsem olgeta ya, mo from samting ya, hem i stap wet go kasem we oli finisim ol toktok blong olgeta.

5Be taem hem i luk we trifala ya i no save givim ansa long Job, hem i no moa save holem kros blong hem,

6nao i tok.

Hem i talem se, “Olgeta.

Mi mi wan yangfala nomo

mo yufala i olfala,

mo from samting ya,

mi mi fraet blong talemaot

tingting blong mi long yufala.

7Mi mi stap ting

se i gud yufala nomo i tok,

i gud yufala ol olfala nomo

i talemaot ol waes blong yufala.

8-9Be sipos man i olfala,

hemia i no min se hem i waes,

mo sipos hem i stap longtaem,

hemia tu i no min se hem i save ol stret fasin.

God i gat olgeta paoa,

mo stamba blong waes i stap long hem nomo.

Spirit blong hem i stap kam long ol man

blong givim waes long olgeta.

10From samting ya,

plis yufala i lesin long mi,

yufala i letem mi

mi talemaot tingting blong mi.”

Elihu i tok long trifala fren blong Job

11Nao Elihu i talem se,

“Trifala.

Taem yufala i stap tok,

we yufala i stap lukaot ol waestok

blong talem,

mi mi wet blong harem yufala,

mo mi stap lesin gud nomo.

12Mi stap lesin gud long yufala,

be mi luk

we tingting blong yufala i sot,

i no gat wan long yufala

i save soemaot we Job i rong.

13I nogud yufala i stap talem

se yufala i waes.

God nomo i mas givim ansa long Job,

from we yufala i no naf.

14Job i stap toktok long yufala,

be sipos hem i stap toktok long mi,

bambae mi mi no save givim ansa long hem

olsem we yufala i givim.”

Elihu i tok long Job

15Nao Elihu i talem se,

“Job,

trifala ya i sot long tok finis,

mo trifala i no gat ansa

blong givim long yu.

16Taem trifala i stap kwaet olsem,

be mi mi no save wet moa.

Trifala ya i no moa gat samting blong talem,

17nao mi mi mas givim ansa blong mi

long ol poen ya blong yu.

Mi tu mi mas talemaot tingting blong mi.

18Mi no save wet,

mi no save holem tok blong mi.

19Sipos mi no tok,

bambae mi bosta ya,

olsem olfala skin blong nani*

we oli fulumap niu waen long hem.

20Mi no save holem mi,

mi mas tok.

21Job,

mi mi no save saed wetem yu,

mo mi no save saed wetem trifala ya tu.

Mo bambae mi no save traem switim wan long yufala.

22Mi mi no save mekem fasin ya.

God i mekem mi,

mo sipos mi traem mekem fasin olsem,

kwiktaem nomo,

hem bambae i panisim mi.