1Nao King Sagon, hem i king blong Asiria, mo hem i talem long bos blong ol komanda blong ol soldia blong hem blong oli go mekem faet long wan bigfala taon blong ol man Filistia, we nem blong hem Asdod.
2Be fastaem, taem we samting ya i no hapen yet, Hae God i talem long Profet Aesea, pikinini blong Amoj se, “Aesea. Yu mas tekemaot rabis klos ya we yu stap werem, wetem sandel blong yu, blong soemaot we yu yu harem nogud, mo yu mas wokbaot wetem smol kalsong nomo.” Mo profet i mekem olsem we Hae God i talem. Hem i tekemaot klos blong hem wetem sandel blong hem, nao i stap wokbaot we i putum smol kalsong nomo.
3Nao taem ol soldia blong ol man Asiria oli winim taon ya Asdod, oli holem, profet ya i talemaot long ol man Isrel* we Hae God i talem se, “Olgeta. !Yufala i luk! Tri yia nao, we man ya blong wok blong mi i stap wokbaot wetem smol kalsong nomo, we i no putum klos mo i no putum sandel tu. Hemia i wan saen blong soemaot ol samting we bambae oli kasem ol man Ijip wetem ol man Itiopia.
4Taem king ya i go long tufala kantri ya, bambae hem i holem ol man blong tufala kantri ya, mo bambae hem i lidim olgeta oli goaot, we bambae oli stap wokbaot wetem smol kalsong nomo olsem. Nating we ol man ya oli yangfala no oli olfala, be bambae oli wokbaot we oli no putum sandel mo oli no putum klos, we ol man bambae oli save luk as blong olgeta, mo samting ya bambae i mekem bigfala sem long olgeta.
5Long taem ya, olgeta ya we oli stap putum tingting blong olgeta long ol man Itiopia, mo oli stap tok flas from ol man Ijip, bambae tingting blong olgeta i foldaon olgeta, from we ol samting we oli stap tingbaot bambae i no moa save kamtru.
6Nao ol man Filistia we ples blong olgeta i stap klosap long solwota, bambae oli talem se, ‘Yu luk. !Yumi stap putum tingting blong yumi long olgeta ya, blong oli blokem king blong Asiria blong i no kam holem yumi, be hem i holem olgeta finis! ?Olsem wanem nao? ?Bambae yumi save ronwe long hem olsem wanem?’ ”
Who We AreWhat We EelieveWhat We Do
2025 by iamachristian.org,Inc All rights reserved.
