1 we naoia i gat bel, bambae i bonem wan pikinini boe blong hem, mo bambae i putum nem blong hem, se Emanuel, we i min se ‘God i stap wetem yumi.’
15Taem pikinini ya i gat tutri yia blong hem, bambae yumi gat ol nambawan kakae blong yumi bakegen, blong hem i kakae.
16Naoia, yu yu fraet tumas long tufala king ya, be yu wet. Bambae i no kasem taem ya yet we pikinini ya i gat tutri yia blong hem olsem, be ol graon blong tufala king ya, bambae i no moa gat wan man nating i stap long hem.
17“Be Hae God bambae i tekem trabol i kam long yu, mo long olgeta famle blong yu, mo long olgeta man blong yu. Trabol ya bambae i kam nogud moa, i bitim olgeta trabol ya bifo we oli kasem kantri ya blong yumi, i stat long taem ya we kantri ya blong yumi mo kantri ya Isrel* tufala i seraot, i kam kasem tede. Hem bambae i tekem king blong kantri ya Asiria wetem ol soldia blong hem oli kam long ples ya.
18“Long taem ya, hem bambae i singaot i go long ol man Ijip, blong oli aot long ol reva ya we i longwe, oli kam long ples ya olsem hip blong flae. Mo bambae hem i singaot i go long ol man Asiria, blong oli aot long ples blong olgeta, oli kam olsem hip blong sugabag.*
19Nao bambae oli kam fulap long ol krik long medel blong ol hil, mo long ol hol blong ston, olsem ol flae we oli stap hanghang plante olbaot long ol rabis rop, mo long ol gras we ol anamol oli stap kakae.
20“Long taem ya, bambae hem i singaot wan prapa man blong katem hea, i aot long Yufretes Reva, i kam. Hemia king blong Asiria ya, wetem ol soldia blong hem. King ya bambae i pulum resa long mustas blong yufala, mo bambae i katemaot hea blong yufala, wetem olgeta hea long bodi blong yufala tu.
21“Long taem ya, sipos man i save holem wan smol kao mo tu nani, trifala i stap gud, hem bambae i save harem gud.
22Trifala anamol ya bambae i givim plante melek long hem, nao bambae hem i gat plante kakae blong hem. Long taem ya, olgeta evriwan we i stap yet, bambae oli gat plante kakae blong olgeta, we oli harem gud long hem.
23“Long taem ya, ol gudfala plantesen blong rop ya grep,* we long wan plantesen i gat taosen stamba blong grep long hem, mo we praes blong wan plantesen, faef handred taosen vatu,* be bambae oli fulap gud long ol rabis rop nomo, mo long ol rop we i gat nil.
24Bambae ol man oli tekem bonara blong olgeta, oli go lukaot mit long ol plantesen ya. Long taem ya, kantri blong yumi bambae oli fulap gud long ol rabis rop ya.
25Ol ples ya olbaot long ol hil, we naoia yumi stap mekem garen long hem, bambae oli kam fulap long ol rabis gras nomo. Mo ol man bambae oli no moa wantem go long ples ya, bambae oli kam ples blong kakae blong buluk mo sipsip nomo.”
Who We AreWhat We EelieveWhat We Do
2025 by iamachristian.org,Inc All rights reserved.
