Sam 32 - Bislama Bible Revised 2012

Man i talemaot sin blong hem, mo Hae God i fogivim hem(Sing ya, Deved i wokem.)(Tok i go long ol man.)

1 Rom 4.7,8 Man we Hae God i fogivim hem,

mo i tekemaot ol sin blong hem,

hem i save harem gud.

2Man we Hae God i no moa jajem hem

from ol samting nogud we hem i mekem,

mo we i no moa giaman long laef blong hem,

hem i save harem gud.

(Tok i go long Hae God.)

3-5Taem mi no talemaot ol sin blong mi long yu,

mi mi slak we mi slak,

from we evri dei nomo, mi stap krae kasem tudak.

Long dei mo long naet,

yu stap panisim mi.

Paoa blong mi i lus olgeta,

olsem wota we bigsan i bonem,

nao i drae olgeta.

Ale, mi talem se,

“Bambae mi talemaot sin blong mi long Hae God.”

Nao mi talemaot ol sin blong mi long yu,

mi no moa haedem ol samting nogud

we mi mi mekem.

Nao yu yu fogivim mi,

yu tekemaot ol sin blong mi.

6From gudfala fasin ya blong yu,

i gud olgeta man

we tingting blong olgeta i stap strong long yu,

oli prea long yu.

Nao taem bigfala trabol i kam,

olsem we bigfala wota i ron i kam,

bambae i no save kasem olgeta.

7Yu yu ples blong haed blong mi,

yu stap blokem ol trabol

oli no kasem mi.

Mi mi stap sing bigwan

from paoa blong yu we i sevem mi,

from we yu yu stap blokem mi,

yu stap lukaot gud long mi.

(Tok i go long ol man.)

8Hae God i talem se,

“Mi bambae mi tijim yu

long rod we i stret blong yu yu folem.

Bambae mi stap givim gudfala tingting long yu,

mo mi stap lukaot gud long yu.

9I nogud yu mekem stronghed,

olsem hos no hafkas* dongki,

we man i mas putum rop long maot blong hem,

blong mekem hem i folem tingting blong hem.”

10Ol man nogud

bambae oli harem nogud tumas

long bodi blong olgeta,

be olgeta we oli trastem Hae God,

hem bambae i stap lukaot gud long olgeta

from we oltaem hem i lavem man tumas.

11Yufala we fasin blong yufala i stret,

i gud yufala i glad,

yufala i harem gud from ol samting ya

we Hae God i mekem.

Yufala we i stap obei long hem,

i gud yufala i singsingaot

from we yufala i glad.